ءسويتىپ پرەمەر-مينيستر سيندزو ابە ءوزىنىڭ پوزيتسياسىن بارىنشا نىعايتىپ الدى. ونىڭ نەگىزگى قارسىلاسى, توكيو قالاسىنىڭ باسشىسى يۋريكو كويكە حانىمنىڭ ء«ۇمىت پارتياسى» تەك 50 ورىن شاماسىندا عانا دەپۋتاتتىق مانداتقا يە بولدى. پارتيا باسشىسىنىڭ ءوزى بۇل ناتيجەنى «وتە ناشار قورىتىندى» دەپ باعالادى.
ەكونوميكالىق قۋاتى جونىنەن الەمدە ءۇشىنشى ورىندا تۇرعان بۇل مەملەكەتتىڭ ىشىندەگى تىنىشتىق پەن تۇراقتىلىق قازاقستان ءۇشىن دە ماڭىزدى. ويتكەنى جاپونيا قازاقستاننىڭ ۇلكەن ەكونوميكالىق ارىپتەستەرىنىڭ قاتارىنا جاتاتىن مەملەكەت.
ۇستىمىزدەگى جىلدىڭ قىركۇيەك ايىندا سيندزو ابە پارلامەنتتىڭ تومەنگى پالاتاسىن تاراتۋ تۋرالى باستاما كوتەرىپ, وعان يمپەراتور قول قويىپ, مەرزىمىنەن بۇرىن وتكىزىلەتىن جاڭا سايلاۋدى 22 قازانعا بەلگىلەگەن بولاتىن. س.ابەنىڭ پارتياسى پارلامەنتتە ونسىز دا كوپشىلىك بولاتىن, الايدا پرەمەر-مينيستر جاڭا سالىق ساياساتىن ەنگىزۋ مەن سولتۇستىككورەيالىق قاۋىپتىڭ ۇلعايۋىنا بايلانىستى حالىقتىڭ مولىراق قولداۋىنا يە بولۋىم كەرەك دەگەن ماقساتتى العا تارتىپ, تومەنگى پالاتانى قايتا سايلاۋعا قۇلشىنىس بىلدىرگەن. ءبىر جاعىنان بۇل ۇلكەن تاۋەكەل دە ەدى, ويتكەنى سوڭعى ايلاردا جاپون ەلەكتوراتى اراسىندا جۇرگىزىلگەن سالماقتى ساۋالدارعا قاراعاندا, ليبەرالدى-دەموكراتيالىق پارتيانىڭ رەيتينگى ءبىرشاما تومەن ەكەنى انىقتالعان.
ال پرەمەر-ءمينيستردى قولداۋشىلار ۇلەسى 70 پايىزدان 23 پايىزعا دەيىن قۇلدىراعان. شىلدە ايىندا وتكىزىلگەن توكيو قالالىق جينالىسىنىڭ سايلاۋىندا لدپ 127 دەپۋتاتتىق مانداتتىڭ 23-نە عانا يە بولعان. بۇل پارتيا تاريحىنداعى ەڭ تومەنگى كورسەتكىش. وسى سايلاۋدان كەيىن, تامىز ايىندا س.ابە ۇكىمەتتى تولىقتاي وتستاۆكاعا جىبەرىپ, مينيسترلەر كابينەتىن قايتا جاساقتاعان بولاتىن. وندا بارلىق 19 ءمينيستردىڭ بەسەۋى عانا ورىنتاقتارىن ساقتاپ قالعان. بۇل ماسەلە دە ەلەكتوراتتىڭ كوزقاراسىنا تەرىس ىقپال ەتەتىن فاكتورلاردىڭ ءبىرى.
الايدا, پرەمەر-مينيستر وسىنداي تاۋەكەلدەرگە قاراماي جاڭا سايلاۋ بولعانىن قالاپ, وندا ءوزىنىڭ ساياساتىن حالىقتىڭ قولدايتىندىعىنا انىق كوزىن جەتكىزىپ, پارلامەنتتىڭ ۇشتەن ەكى داۋسىنا يە بولدى. ەندى ول ءوزىنىڭ كوزدەگەن ماقساتىنىڭ ءبىرى – تۇتىنۋ سالىعىن 8-دەن 10 پايىزعا دەيىن ارتتىراتىن بولادى. حالىق ءوزىنىڭ قولايىنا جاعا قويمايتىن بۇل شاراعا بەيىلدىلىك تانىتىپ وتىر. ويتكەنى ارتتىرىلعان سالىقتان تۇسكەن قاراجات سولتۇستىككورەيالىق قاۋىپتىڭ ءوسىپ وتىرعان جاعدايىندا ۇلتتىق قاۋىپسىزدىكتى نىعايتا تۇسۋگە قولدانىلاتىنى پرەمەر-مينيستر تاراپىنان بۇرىن انىق ايتىلعان. ارينە سيندزو ابە ءوزىنىڭ قازىرگى جاعدايىندا دا ۇلتتىق قاۋىپسىزدىكتى نىعايتۋ قاجەتتىگىن العا تارتىپ, سالىقتى وسىرۋگە شاماسى كەلەتىن.
بىراق ءوز ىسىنە حالىق سەنىمىنىڭ قانشالىقتى دارەجەدە بولاتىنىن كورۋدى كوزدەگەن ساياساتكەر ءوز پارتياسى مەن جەكە باسىنىڭ بيلىكتەن ايىرىلىپ قالۋ تاۋەكەلىنە قاراماي وسىنداي قادامعا باردى جانە ءوزىنىڭ ساياسي باعىتىنىڭ دۇرىستىعىنا حالىقتىڭ كوزى جەتىپ وتىرعانىن كوردى. ەندى ول ۇلتتىق قاۋىپسىزدىكتى نىعايتۋ باعىتىنا باتىل كىرىسەتىنى ءسوزسىز. سايلاۋ الدى مالىمدەمەلەرىندە س.ابە بىرنەشە رەت سولتۇستىك كورەياعا قاتىستى باتىل جانە قاتاڭ ساياسات ۇستاناتىنىن ايتقان بولاتىن.
جالپى, پارلامەنت سايلاۋىنا بارلىق ەلەكتوراتتىڭ 52,7 پايىزى عانا قاتىستى. دەگەنمەن جاپونيانىڭ زاڭدىلىعى بويىنشا مۇنداي جاعدايدا كۆورۋم بار دەپ ەسەپتەلەدى.
جاقسىباي سامرات,
«ەگەمەن قازاقستان»
