پورتۋگاليا ۇلتتىق قۇراماسى مەن «رەال» كومانداسىنىڭ شابۋىلشىسى كريشتيانۋ رونالدۋ فيفا نۇسقاسى بويىنشا جىلدىڭ ۇزدىك ويىنشىسى اتاندى. بۇل اتاققا ول وسىمەن ەكىنشى جىل قاتارىنان قول جەتكىزىپ وتىر.
ۇزدىك ويىنشىلاردىڭ ۇشتىگىن كافۋ, ەنتسو فرانچەسكولي, ديەگو مارادونا, كارلەس پۋيول, كارلوس ۆالدەرراما جانە ەدۆين ۆان دەر سار سەكىلدى فۋتبول جۇلدىزدارىنان قۇرالعان ارنايى كوميسسيا قۇردى. ولار بۇل ۇشتىككە پورتۋگاليالىق ويىنشىدان بولەك ليونەل مەسسيدى جانە نەيماردى ەنگىزگەن بولاتىن.
داۋىس بەرۋ ناتيجەسى بويىنشا رونالدۋ رونالدۋ: 43.16%, مەسسي: 19.25%, نەيمار: 6.97% داۋىسقا يە بولدى.
بۇدان بولەك فيفا مىنا اتالىمدار بويىنشا جىلدىڭ ۇزدىكتەرىن انىقتادى:
ۇزدىك جاتتىقتىرۋشى: زينەدين زيدان («رەال»)
ۇزدىك قاقپاشى: دجانلۋيدجي بۋففون («يۋۆەنتۋس»)
ۇزدىك ايەل فۋتبولشى: ليكە مارتەنس («رۋسەنگورد»/«بارسەلونا»)
ۇزدىك ايەل جاتتىقتىرۋشى: سارينا ۆيگمانن (نيدەرلاند ۇلتتىق قۇراماسى)
«فەير-پلەي» سىيلىعى: فرانسيس كونە
فەرەنتس پۋشكاش سىيلىعى (جىلدىڭ ۇزدىك گولى): وليۆە جيرۋ («ارسەنال»)
ۇزدىك جانكۇيەرلەر: «سەلتيك»
جىلدىڭ ۇزدىك قۇرامى: قاقپاشى: دجانلۋيدجي بۋففون («يۋۆەنتۋس»); قورعاۋشىلار: داني الۆەس («يۋۆەنتۋس»/«پاري سەن-جەرمەن»), مارسەلو («رەال»), سەرحيو راموس («رەال»), لەوناردو بونۋچچي («يۋۆەنتۋس»/«ميلان»); جارتىلاي قورعاۋشىلار: لۋكا مودريچ («رەال»), توني كرووس («رەال»), اندرەس ينيەستا («بارسەلونا»); شابۋىلشىلار: ليونەل مەسسي («بارسەلونا»), نەيمار («بارسەلونا»/«پاري سەن-جەرمەن»), كريشتيانۋ رونالدۋ («رەال»).
فيفا وسىمەن ەكىنشى جىل قاتارىنان France Football-دان («التىن دوپ») بولەك ۇزدىكتەردى انىقتاپ كەلەدى. داۋىس بەرۋگە ۇلتتىق قۇرامالاردىڭ كاپيتاندارى مەن باپكەرلەرى, جۋرناليستەر, سونداي-اق جانكۇيەرلەر قاتىستى.
