قاسىم-جومارت توقاەۆ ەلىمىزدىڭ حالىقارالىق ارەناداعى ماڭىزدى سەرىكتەسى سانالاتىن ەىدۇ-مەن ىنتىماقتاستىققا قازاقستان ايرىقشا ءمان بەرەتىندىگىن باسا ايتتى.
«ەىدۇ ەلدەرى قازاقستان بوي تۇزەيتىن باعدار بولىپ سانالادى», - دەدى ق.توقاەۆ.
تاراپتار قازاقستانمەن ىنتىماقتاستىق جونىندەگى ەىدۇ-نىڭ ەلدىڭ باعدارلاماسىن جۇزەگە اسىرۋ جايىن تالقىلاپ, ونىڭ ونىمدىلىگى مەن تالاپ ەتىلەتىندىگىن اتاپ ءوتتى. ەىدۇ-نىڭ قازاقستانعا ارنالعان ەلدىك باعدارلاماسى ەكونوميكانىڭ ينكليۋزيۆتى جانە تۇراقتى ءوسىمى, شاعىن جانە ورتا بيزنەستىڭ دامۋى ءۇشىن جاعداي جاساۋعا, حالىقتىڭ ءالسىز توبىنا قولداۋ كورسەتۋگە, سونىمەن قاتار گەندەرلىك ماسەلەلەردى شەشۋگە باعىتتالعان. ەلدىك باعدارلاما قاراستىرىلعان جۇمىستاردىڭ ۇشتەن ءبىرى الەۋمەتتىك ماسەلەلەرگە ارنالعان.
ا.گۋرريا قازاقستاندا جۇرگىزىلىپ جاتقان رەفورمالارعا جوعارى باعاسىن بەرىپ, ەىدۇ-نىڭ ەلىمىزگە قاجەتتى كونسۋلتاتسيالىق كومەك بەرۋگە دايىن ەكەندىگىن اتاپ ءوتتى. ەىدۇ باس حاتشىسى قازاقستاندا ەۋرازيا اپتالىعىن وتكىزۋگە قولداۋ بىلدىرگەنى ءۇشىن العىسىن ءبىلدىرىپ, ۇيىمنىڭ پارلامەنتتىك جەلىسى اياسىندا ىنتىماقتاستىقتى دامىتۋدى ۇسىندى.
سونىمەن قاتار ول سەنات توراعاسىن ۇيىمنىڭ پارلامەنتتىك سەگمەنتىگىنىڭ جۇمىسىنا قاتىسۋعا شاقىردى. كەزدەسۋ سوڭىندا ق.توقاەۆ قازاقستان ۇزاقمەرزىمدى پەرسپەكتيۆادا ەل ەكونوميكاسىنىڭ قارىشتى دامۋىن قامتاماسىز ەتۋ ءۇشىن ەىدۇ-عا مۇشە مەملەكەتتەردىڭ تاجىريبەسى مەن ەكسپەرتتىك الەۋەتىن بارىنشا پايدالانۋعا نيەتتى ەكەندىگىن ايتتى.
