استانا مەملەكەتتىك قىزمەت حابى قر ۇكىمەتى جانە بۇۇ دامۋ باعدارلاماسىمەن بىرگە ۇيىمداستىرعان «باعالاۋدىڭ ۇلتتىق جۇيەسىن قۇرۋ: قازاقستان تاجىريبەسى» اتتى سەمينار «باعالاۋ سالاسىنداعى ۇلتتىق الەۋەت» V عالامدىق كونفەرەنتسيا اياسىندا ءوتتى.
قاتىسۋشىلارعا استانا حابى باسقارۋشى كوميتەت توراعاسى ءاليحان بايمەنوۆ, قر ۇلتتىق ەكونوميكا ۆيتسە-ءمينيسترى ايباتىر جۇماعۇلوۆ, ىستانبۇلداعى بۇۇ دب وڭىرلىك حابى مەنەدجەرى گەرد تروگمانن جانە قازاقستاننىڭ بۇۇ دب قازاقستانداعى تۇراقتى وكىلىنىڭ ورىنباسارى مۋنحتۋيا التانگەرەل جىلى لەبىزىن ءبىلدىردى.
ءاليحان بايمەنوۆ ء«وزارا تاۋەلدىلىك پەن ءوزارا ىقپالداستىق ارتىپ وتىرعان زاماناۋي الەمدە مەملەكەتتىك باسقارۋدىڭ ساپاسى شەشۋشى ءرول اتقارادى. ال مەملەكەتتىك باسقارۋ ساپاسىن ارتتىرۋ ءۇشىن اۋديت پەن باعالاۋدىڭ ءتيىمدى جۇيەسىنىڭ بولعانى ماڭىزدى», - دەدى.
سەمينار ۆيتسە-مينيستر ايباتىر جۇماعۇلوۆتىڭ قازاقستاننىڭ مەمەلكەتتىك باسقارۋ سالاسىن رەفورمالاۋ تاجىريبەسىنە جاساعان شولۋى مەن قازاقستاندىق ساراپشىلاردىڭ باعالاۋدىڭ ۇلتتىق جۇيەسىنىڭ دامۋى جايلى پرەزەنتاتسيالارمەن باستالدى. قاتىسۋشىلار قازاقستاننىڭ باعالاۋ جۇيەسىنىڭ تاريحي جانە اكىمشىلىك العىشارتتارىمەن, نەگىزگى مەحانيزمدەرى جانە ادىستەمەلەرىمەن تانىستى.
ۆيتسە-مينيستر «باعالاۋدىڭ قازاقستاندىق جۇيەسى 7 جىلدان استام ۋاقىت جۇمىس ىستەيدى. بۇل جۇيە مەملەكەتتىك باسقارۋ جۇيەسىن جەتىلدىرۋ مەن مينيسترلىكتەر, جەرگىلىكتى ورگانداردىڭ جۇمىسىن جانداندىرۋدىڭ ءتيىمدى قۇرالى رەتىندە تانىلدى» دەپ اتاپ ءوتتى.
سونىمەن بىرگە استانا حابىنا قاتىسۋشى ەلدەر - ەستونيا, گرۋزيا جانە ءازىربايجان قۇزىرلى ورگاندار وكىلدەرى ءوز ەلدەرىندەگى باعالاۋ جۇيەسى جايلى باياندادى.
سەمينار پراكتيكالىق تاجىريبە, يننوۆاتسيا جانە باعالاۋدىڭ ۇلتتىق جۇيەسىن ازىرلەۋ پەرسپەكتيۆالارى بويىنشا پىكىر الماساتىن سۇحبات الاڭىنا اينالىپ, قاتىسۋشىلار اراسىنداعى بايلانىستى نىعايتتى. قاتىسۋشىلار مەملەكەتتىك قىزمەت كورسەتۋ جانە ازاماتتاردىڭ ءومىر ءسۇرۋ ساپاسىن جاقسارتۋعا باعىتتالعان جۇيەلەردى جەتىلدىرۋدىڭ ءارى قارايعى جولدارىن قاراستىردى.
استانا حابى مەملەكەتتىك ورگانداردى باعالاۋ جۇيەسىن دامىتۋ سالاسىندا تىعىز ىنتىماقتاستاسۋ جانە تاجىريبە الماسۋ ماقساتىندا پراكتيكتەرگە ايماقتىق سەمينار وتكىزۋدى ۇسىندى.
