مۇندايدى ساراپشىلار «ساياسي جانتالاس» دەپ قابىلداۋدا. ءوزىنىڭ ادامى وتپەي, باسقا ۇمىتكەر پرەزيدەنت بولسا, ا.اتامباەۆتىڭ بيلىك باسىندا بولعانداعى كەيبىر كەلەڭسىز ارەكەتتەرى جاريا بولىپ قالۋى مۇمكىن. سوندىقتان ول ءوز ادامىن وتكىزۋ ءۇشىن بارلىق قيتۇرقى ءادىس-تاسىلدەرگە جۇگىنىپ, اقىرى قىرعىز ەلىنە ەڭ جاقىن, ەڭ جاناشىر مەملەكەتتى دە ايىپتاۋعا دەيىن باردى.
باسقاسىن ايتپاعاندا, قىرعىزستاندا 2010 جىلعى بولعان داعدارىس سول كەزدە ەقىۇ توراعالىعىن اتقارۋشى ەلدىڭ باسشىسى رەتىندە قازاقستان پرەزيدەنتى نۇرسۇلتان نازارباەۆتىڭ تىكەلەي بەلسەندى تۇردە ارالاسۋىنىڭ ارقاسىندا عانا ازاماتتىق سوعىسقا ۇلاسىپ كەتپەگەنىن ول ۇمىتسا دا تۋىسقان قىرعىز حالقى قاپەرىنەن شىعارعان جوق. سول كەزدە اقش-تا ءىسساپاردا بولعان ن.نازارباەۆ كۇن ۇزاق قاۋىرت جۇمىس ىستەسە دە ۋاقىت ايىرماشىلىعىنا دا قاراماي, ءتۇنى بويى قىرعىزستاننىڭ باسشىلارىمەن كەلىسسوزدەر جۇرگىزىپ, اقىرى وڭتۇستىكتەگى جەرلەستەرى مەن اعايىندارىنىڭ ورتاسىنا بارىپ, بەكىنىپ العان قۇرمانبەك باكيەۆتى لاۋازىمىنان ءوز ەركىمەن باس تارتۋعا كوندىرىپ, قازاقستاندىق تىكۇشاقپەن الىپ كەتپەگەندە, وقيعانىڭ قانشالىقتى شيەلەنىسەتىنىن بولجاۋ قيىن ەدى. تەك وسى ءىسى ءۇشىن عانا الەمنىڭ وزىق ويلى ادامدارىمەن بىرگە قىرعىز باۋىرلاردىڭ كوزى اشىق, كوڭىلى وياۋ ازاماتتارى قازاقستان باسشىسىنا ۇلكەن العىستار ايتقان. سول وقيعالاردان كەيىن قىرعىزستان ەكونوميكاسىنىڭ تۇراقتانۋىنا قازاقستاننان ارتىق ەڭبەك سىڭىرگەن ەل جوق. حالىققا جاساعان قايىرىمدىلىق كومەك, ازىق-ت ۇلىك پەن الەۋمەتتىك ماڭىزى زور تاۋارلار, جانار-جاعارماي جانە ت.ب. قۇنى ميلليونداعان دوللاردى قۇراعان بولاتىن.
پرەمەر-مينيستر باقىتجان ساعىنتاەۆتىڭ بۇرناعى كۇنگى مالىمدەمەسىندە ايتىلعانداي, قىرعىزستاننىڭ ەاەو-عا ءوتىپ, ەكونوميكاسىن ۇيىم تالابىنا سايكەس ساتىلارعا كوتەرۋى ءۇشىن 100 ملن اقش دوللارى كولەمىندە تەحنيكالىق كومەك بەرىلگەن. بۇل قىرعىزستاننىڭ ەكونوميكالىق زاڭنامالارىن, نورماتيۆتەرى مەن تارتىپتەرىن, فيتو-سانيتارلىق جانە ت.ب. بەكەتتەرىن ەاەو تالابىنا ساي قىلۋعا جانە باسقا دا كەزەك كۇتتىرمەيتىن ىستەرگە جۇمسالاتىن وتە قوماقتى قاراجات. ال قايىرىمدىلىق كومەك رەتىندە قازاقستان بىشكەك پەن وش قالالارىنا 20 ملن اقش دوللارىنا ەكى مەكتەپ سالىپ بەرگەن. سونىمەن بىرگە قازاقستان قىرعىز ەكونوميكاسىنا 820 ملن دوللار ينۆەستيتسيا قۇيعان. سونىڭ ارقاسىندا مىڭداعان جاڭا جۇمىس ورىندارى اشىلىپ, قىرعىزستاندا سوڭعى جىلدارى ءبىرشاما الەۋمەتتىك-ەكونوميكالىق تۇراقتىلىق ورنادى. ب.ساعىنتاەۆتىڭ ايتۋىنا قاراعاندا, ينۆەستيتسيا كولەمى بۇدان دا جوعارى بولماق ەكەن, الايدا قىرعىزستان باسشىلىعىنىڭ قولايلى ينۆەستيتسيالىق احۋال تۋدىرا الماعاندىعىنىڭ كەسىرىنەن قازاقستاندىق كاسىپكەرلەردىڭ ءبىرشاماسى ءوز كاپيتالدارىن قۇيۋدان باس تارتقان.
قازاقستاننىڭ دوستىققا نەگىزدەلگەن تاتۋكورشىلىك پەن بەيبىتشىل ساياساتىنىڭ ارقاسىندا مىڭداعان قىرعىزدار قازاقستان جەرىنە ەمىن-ەركىن ەنىپ, ناپاقاسىن ايىرىپ ءجۇر. مۇندا ولاردىڭ ەڭبەك ەتۋ, ءجۇرىپ-تۇرۋ, ءومىر ءسۇرۋ قۇقىقتارى ەشقانداي شەكتەلمەي, سالىق جۇيەسى دە ىڭعايلى بولىپ تۇر. پرەمەر-ءمينيستردىڭ ايتۋىنا قاراعاندا, قازىر ولاردىڭ سانى 125 مىڭ ادامعا جەتكەن. وسىنشا ەڭبەك ميگرانتىنىڭ ارقايسىنىڭ اسىراۋىندا كەم دەگەندە ءۇش ادامنان بارىن ەسكەرسەك, بۇل ءبىر ميلليونعا جۋىق قىرعىز باۋىرلاردىڭ قازاقستاننىڭ ەسەبىنەن كۇن كورىپ وتىرعانىن اڭعارامىز. تۇسىنگەن ادامعا وسىنىڭ ءبارى از جاقسىلىق ەمەس قوي.
ا.اتامباەۆتىڭ قازاقستاننىڭ زەينەتاقىسى ءىجو-گە ساي قىرعىزستاننان نەگە 20 ەسە ارتىق ەمەس دەگەنى مەملەكەت باسشىسىنىڭ اۋزىنان شىعاتىن ءسوز ەمەس. زەينەتاقى كولەمىن انىقتاۋ ءاربىر مەملەكەتتىڭ ءوزىنىڭ ىشكى جۇمىسى. ەشبىر قازاق ءبىزدىڭ زەينەتاقىمىز نەگە تومەن دەپ قىرعىزستان پرەزيدەنتىنە ارىز-شاعىم جاساپ وتىرعان جوق قوي. سوندىقتان مۇنداي مالىمدەمە وزگە ەلدىڭ ىشكى ىسىنە ارالاسۋ دەپ باعالاناتىنى ءسوزسىز.
ارينە ا.اتامباەۆ سياقتى الىستى بولجاي المايتىن, كەتەتىن بولعان سوڭ ەسىكتى قاتتى سەرپىپ تۇرعان ساياساتكەردىڭ سوزدەرى عاسىرلار بويى قالىپتاسقان قازاق پەن قىرعىز اراسىنداعى تۋىستىق پەن دوستىققا سىنا قاعا المايدى.
