جەرگىلىكتى شەريفتىڭ ايتۋىنشا, وقيعا ناتيجەسىندە 59 ادام قازا تاۋىپ, 527 ادام ءتۇرلى دەڭگەيدە جاراقات الدى.
وق اتۋشى ستەفەن پاددوك 28 قىركۇيەكتەن باستاپ Mandalay Bay قوناق ۇيىندە 62 جاسار مەريلۋ دەنليمەن بىرگە تۇرعان. وقيعادان سوڭ ساناۋلى ساعاتتا پوليتسيا ول ايەلدى تاۋىپ, ونىڭ بۇل جاعدايعا قاتىسى جوقتىعىن انىقتادى.
وقيعا كۇنى ستەفەن پاددوك قوناق ءۇيدىڭ 32 قاباتىنداعى تەرەزەنى جارىپ, كونتسەرتكە جينالعان 20 مىڭ ادامعا توقتاۋسىز وق اتتى. كۋاگەرلەردىڭ ايتۋىنشا, ۇزدىكسىز اتىس 10 مينۋتقا سوزىلعان. CNN حابارلاعانداي, شەريف تودد فاسۋلو اتقىشتىڭ قوناقۇيدەگى بولمەسىنەن 23 قارۋ, 1 جارىلعىش جانە بىرنەشە مىڭ وق تابىلعان.
سونىمەن قاتار, شەريف دجوزەف لامباردونىڭ ايتۋىنشا, قىلمىسكەردىڭ نەۆادا شتاتىنداعى ۇيىندە 19 قارۋ جانە تۇسىنىكسىز ەلەكتروندى قۇرىلعىلار تابىلىپ, زەرتتەۋگە جىبەرىلگەن.
وقيعا ىزىنەن «يسلام مەملەكەتى» ەكسترەميستتىك ۇيىمى وقيعانىڭ جاۋاپكەرشىلىگىن ءوز موينىنا الىپ, اتقىش بىرنەشە اي بۇرىن يسلام ءدىنىن قابىلدادى دەپ حابار تاراتتى. BBC حابارلاعانداي, فەدەرالدىق تەرگەۋ بيۋروسى (فتب) اتقىشتىڭ ەكسترەميستتىك ۇيىمدارعا قاتىسىن ازىرگە راستامادى.
شابۋىل جاساعان ادام كىم؟
ستەفەن پاددوك بۇعان دەيىن قۇقىق قورعاۋ ورگاندارىنىڭ نازارىنا تۇسپەگەن. CBS تەلەارناسىنىڭ مالىمدەۋىنشە, ول امەريكالىق ارميانىڭ قۇرامىندا ەشقاشان بولماعان جانە اسكەري وپەراتسيالارعا قاتىسپاعان. قىلمىسكەردىڭ اعاسى ەريك پاددوك CNN ارناسىنا بەرگەن سۇحباتىندا بولعان جاعدايعا سەنە الماي وتىرعانىن جەتكىزدى.
«ول ەشقاشان وق پەن قارۋعا قىزىققان ەمەس. بۇنداي كولەمدە اۆتوماتتاردى قايدان العانىن تۇسىنبەيمىن, » - دەدى ەريك.
سونداي-اق, اعايىندى ستەفەن مەن ەريك پاددوكتاردىڭ اكەسى كەزىندە فتب-نىڭ ەڭ قاۋىپتى قىلمىسكەرلەر تىزىمىندە بولعانى بەلگىلى بولدى. 1969 جىلعى قۇجاتتا ونىڭ بانك توناۋدى جوسپارلاعانى جازىلعان جانە سۋيتسيدكە بەيىمدىلىگى اتاپ وتىلگەن.
سەبەپتەر ءالى بەلگىسىز
ستەفەن پاددوك نە سەبەپتەن ادامدارعا وت اشقانى ازىرگە بەلگىسىز. پاددوكتىڭ قانداي دا ءبىر ۇيىممەن بايلانىسى تۋرالى اقپارات ازىرگە جوق.
BBC-ءدىڭ حابارلاۋىنشا, لاس-ۆەگاس قالاسى ورنالاسقان نەۆادا شتاتىندا قارۋ قولدانۋ تۋرالى زاڭ وسال. شتات تەرريتورياسىندا قارۋ ساتۋ رۇقسات ەتىلگەن جانە ونى الىپ ءجۇرۋ ءۇشىن ارنايى ليتسەنزيا كەرەك ەمەس.
بيلىكتىڭ كومەككە كەلۋى
اتىس بىتكەننەن كەيىن كلارك وكرۋگىنىڭ بيلىگى جاراقاتتانعاندارعا كوپ مولشەردە قان كەرەكتىگىن جاريالادى. ۇزاق ۋاقىت وتپەي, الەۋمەتتىك جەلىلەردە دونورلىق ورتالىقتار الدىندا جينالعان ادامداردىڭ سۋرەتتەرى پايدا بولدى. كومەككە كەلگەن ادامداردىڭ كوپ بولعانى سونشا, ەرىكتىلەر دونورلارعا تاماق پەن سۋ اكەلە باستادى. مەملەكەتتىك مەكەمەلەردەگى تۋلار ءتۇسىرىلدى.
كۋاگەرلەردىڭ سوزدەرى
«جاۋعان وق ەشقاشان بىتپەيدى دەپ ويلادىم. اينالانىڭ بارلىعى قانعا تولدى. جولداسىم ەكەۋمىز امان شىققانىمىزعا سەنە المايمىن,» - دەيدى كيمبەرلي چيلكوت ەسىمدى ازامات.
ال برايان حوپكينس ەسىمدى ايەل بولسا Mandalay Bay قوناقۇيىندەگى مۇزداتقىشتىڭ ىشىنە تىعىلۋ ارقىلى ءتىرى قالعانىن ايتتى: «مۇزداتقىشتىڭ ىشىنە 30 شاقتى ادام بولىپ تىعىلدىق. ءبىر ءبىرىمىزدى تىنىشتىق ساقتاۋعا شاقىردىق.»
اتىستىڭ تاعى ءبىر كۋاگەرى كورين لوماس كونتسەرتتە بولعان ادامداردىڭ باتىلدىعى تۋرالى ايتتى: «بارلىعىمىز وقتان تىعىلىپ تۇرعان ساتىمىزدە, كەيبىرەۋلەر اشىق الاڭدا وق ءتيىپ جاراقاتتانعاندارعا كومەكتەسۋگە تىرىسىپ, ءوز ومىرلەرىن تاۋەكەلگە بۋدى. بۇنداي جاقسى ادامدار كوپ بولدى.»
ستەفەن پاددوك تۋرالى مالىمەتتەر
شەريف لامباردو Washington Post باسىلىمىنا حابارلاعانداي, قوناق ءۇيدىڭ قىزمەتكەرلەرى پاددوكتىڭ بولمەسىندە ەشقانداي كۇدىكتى زاتتار كورمەگەن; بولمەدە تەك 10-نان استام چەمودان بولعانىن ايتقان.
قارۋ ساتىپ الۋ قۇجاتتارى بويىنشا, ستەفەن پاددوك بىرنەشە جىل ىشىندە نەۆادا شتاتىنداعى Guns & Guitars دۇكەنىنەن 20-دان استام قارۋ ساتىپ العان. دۇكەن قىزمەتكەرلەرى پاددوك قارۋلاردى زاڭعا سايكەس الىپ, پسيحولوگيالىق ساۋ ادام رەتىندە كورىنگەنىن ايتتى.
پاددوكتىڭ تۋىستارى ونىڭ ەكى ۇشاعى جانە ۇشۋ ليتسەنزياسى بولعانىن ايتادى. ول لاس-ۆەگاسقا كونتسەرت كورىپ, قۇمار ويىندار ويناۋعا ءجيى بارىپ تۇرعان ەكەن.
قىلمىسكەردىڭ كورشىسى دون دجۋدي ونىڭ ءۇيىنىڭ وزگەلەردەن ەش ايىرماشىلىعى بولماعانىن ايتتى. «قابىرعالارىندا ەشتەڭە جوق, جيھازى دا از ەدى. ونىڭ ءۇيى ستۋدەنتتەردىڭ جاتاقحاناسىنا ۇقسايتىن. ءبىر كۇنى ستەفەن ءۇيىنىڭ الدىنا «ساتىلادى» دەگەن تاقتايشا شىعارىپ, لاس-ۆەگاسقا كەتىپ بارا جاتقانىن ايتتى,» - دەدى دجۋدي.
يسلام مەن تەرروريزمدى ءبولىپ قاراي باستادى
امەريكالىق Vox.com سايتى دونالد ترامپ پرەزيدەنتىككە كەلگەلى ەلدە ورىن العان شابۋىلدارعا شولۋ جاسادى.
ينتەرنەت-باسىلىمنىڭ مالىمدەۋىنشە, بۇل ۋاقىت ارالىعىندا امەريكالىقتار كوبىنەسە يسلام دىنىنە جانە يسلام تەرروريستەرىنە قاتىسى جوق امەريكالىقتاردىڭ قولدارىنان قازا تاپقان.
مىسالى, 20 جاسار وگايو تۇرعىنى شارلوتسۆيلل قالاسىندا (ۆيرگينيا) وتكەن انتي-راسيستىك قوزعالىسقا شىققانداردى ماشيناسىمەن تاپتاپ ءوتىپ, ناتيجەسىندە 1 ايەل قازا تاۋىپ, 19 ادام جاراقاتتاندى. سونىمەن قاتار, 28 جاسار اق ءناسىلدى جىگىت بالتيموردان نيۋ-يوركقا قارا ءناسىلدى ادامداردى ءولتىرۋ ءۇشىن ارنايى بارعان. ول 66 جاسار تيموتي كوگماندى اتىپ, تەرروريزم ءۇشىن ايىپتالدى. ينتەرنەت-باسىلىم وسى سەكىلدى تاعى دا بىرنەشە قاندى وقيعالاردىڭ تىزگىنىن كەلتىرەدى.
امەريكاداعى شابۋىلدارعا قاتىستى ۆاشينگتونداعى ساراپتامالىق ورتالىق ۇلكەن زەرتتەۋ جۇرگىزىپ, 2001-2015 جىلدارى ارالىعىندا امەريكالىق ازاماتتار كوبىنەسە ءوز ەلدەرىنەن شىققان ەكسترەميستەردىڭ قولدارىنان كوز جۇمعانىن كورسەتتى.
ال 2017 جىلدىڭ ماۋسىم ايىندا Reveal and the Center for Investigative Reporting ورتالىعى «راديكال يسلام تەرروريستەرى كوبىنەسە اقش ازاماتتارى» دەگەن مالىمدەمە جاساپ, ساراپاتامالىق ورتالىقتىڭ جاڭالىعىن دالەلدەي تۇسەدى.
«سوڭعى 15 جىلدا ورىن العان شابۋىلداردىڭ بىرەۋىن دە اقش-قا كىرۋگە تىيىم سالعان ەلدەردىڭ ازاماتتارى جاساعان ەمەس. ز ۇلىمدىققا تولى ەكسترەميستىك ارەكەتتەردى ىستەيتىن تەك مۇسىلماندار, يمميگرانتتار نەمەسە ارابتار ەمەس, بۇنىڭ بارلىعىن ادام بالاسى ءوز قولىمەن ىستەپ وتىر,» دەپ حابارلادى Vox.com.
ازىرلەگەن
ايگۇل شەرنياز,
«ەگەمەن قازاقستان»
