جاڭا فورماتتاعى ديالوگ الاڭى «جاستارعا قىزمەت كورسەتۋ ورتالىعىندا» ءوتىپ, وڭىردەگى جاستار ۇيىمدارىنىڭ وكىلدەرى قاتىسىپ ءوزارا پىكىر الماستىردى. سپيكەرلەر ەكى كومانداعا ءبولىنىپ, ارقايسىسى ءوز وي-پىكىرلەرىن ورتاعا سالدى.كەزدەسۋ مودەراتورى گۇلنار يسەنوۆا تالقىلاۋعا ارنالعان باستى تاقىرىپتاردى جاريالادى, ولار: «ايەلدىڭ ورنى اس- ۇيدە» جانە «ايەلدەر مەن ەرلەر ساياساتتا جانە بيلىكتە». ءبىرىنشى توپتىڭ باس سپيكەرى ورازالى سارسەنوۆ, ال ەكىنشى توپتىڭ باس سپيكەرى ەريك بەككەر بولدى.
جاس سپيكەرلەر توبى «ايەلدىڭ ورنى اس ۇيدە مە نەمەسە بيلىك باسىندا ما؟» دەگەن ماسەلەنى قىزۋ تالقىلادى. ءبىرىنشى توپ وكىلدەرىنىڭ پايىمداۋىنشا, ءبىزدىڭ قوعامدا ايەلدىڭ ورنى اس-ۇيدە دەگەن تۇسىنىك باسىم. ويتكەنى, كىشكەنتاي كۇنىنەن قىزدارعا مانساپتان گورى وتباسىلىق قۇندىلىقتاردى دارىپتەيتىن تاربيە بەرىلەدى. ال, قارسى پىكىر بىلدىرۋشىلەر كەرىسىنشە, ايەلدەر ەرلەرمەن قاتار بيلىكتە قىزمەت جاساۋعا قۇقىلى دەگەن پىكىردە بولدى. مىسالى, ساياساتكەر ايەلدەر كلۋبىنىڭ ءتورايىمى يرينا فوگەلدىڭ پىكىرىنشە, ايەلدەر ءۇي شارۋاسىمەن قاتار مانسابىن بىرگە الىپ جۇرە الادى.
–ارينە, ايەل ءۇشىن وتباسىلىق قۇندىلىقتار ەڭ باستى ورىندا بولۋى ءتيىس. ءوزى ءومىر سۇرەتىن قوعامدا دا ءوزىن تۇلعا رەتىندە كورسەتۋگە دە قۇقىلى, – دەيدى «جاس وتان» جاستار قاناتىنىڭ قالالىق ءبولىمىنىڭ باسشىسى ايگەرىم ماناباەۆا.
ەكسپەرتتىك كوميسسيا مۇشەلەرى جاس سپيكەرلەرگە باعا بەرىپ, ديالوگ قۇرۋ جولدارىن نۇسقاپ وتىردى. ال, «ايەلدىڭ ورنى اسۇيدە» توبى ناقتى فاكتىلەرگە سۇيەنە وتىرا, ۇيلەسىمدى, يلانىمدى دۇنيەلەر ايتىپ, كوش باستادى. ناتيجەسىندە, ەكى كوماندا دا ەلىمىزدە گەندەرلىك ساياسات بار, ونى بەلسەندى تۇردە دامىتۋ قاجەت, الايدا, ايەلدىڭ باستى مىندەتى-وتباسىن قۇرىپ, سۇيىكتى جار, بالالى انا بولۋى كەرەكتىگىن ۇمىتپاۋعا ءتيىس دەگەن پىكىرگە كەلدى. ديالوگ الاڭى اياقتالعان سوڭ «5+5+1» ءادىسى بويىنشا ساۋالناما دا جۇرگىزىلدى.
فاريدا بىقاي,
«ەگەمەن قازاقستان»
پاۆلودار
