بۇگىنگى تاڭدا ەلىمىزدەگى كاسىپورىندار مەن مەكەمەلەردە, جەرگىلىكتى جانە ورتالىق مەملەكەتتىك ورگانداردا سابيلەرى مەكتەپكە دەيىنگى مەملەكەتتىك ۇيىمدارعا باراتىن جۇزدەگەن مىڭ اتا-انا ەڭبەك ەتىپ ءجۇر. ولار ءۇشىن قازىر ءوز بۇلدىرشىندەرىن بالاباقشادان ۋاقىتىندا الۋ ماسەلەسى ەلەۋلى پروبلەماعا اينالىپ وتىر. سەبەبى بىرىنشىدەن, ەلىمىزدەگى مەكتەپ جاسىنا دەيىنگى مەملەكەتتىك بالالار مەكەمەلەرى, نەگىزىنەن, تاڭعى ساعات 7.30-دان كەشكى 18.00-گە دەيىن عانا جۇمىس ىستەيدى. اتا-انالاردىڭ كوپشىلىگىنىڭ جۇمىس ۋاقىتى دا 18.00-گە دەيىن بولعاندىقتان, ولار بالاباقشالارعا بەلگىلەنگەن مەرزىمدە بارىپ ۇلگەرە الماي, قيىندىق كورىپ ءجۇر.
ەكىنشىدەن, كەي جەرلەردە (مىسالى, استانا قالاسىندا) بالالار مەن ولاردىڭ تاربيەشىلەرىنىڭ ساعات 18.00-دەن كەيىن بالاباقشا عيماراتى ىشىندە قالۋلارىنا رۇقسات ەتىلمەگەندىكتەن, ولار اتا-انالاردى اۋا رايىنىڭ قانداي جاعدايىندا بولسىن سىرتتاعى اۋلادا كۇتۋگە ءماجبۇر. الداعى قىسقى مەزگىلدە بۇعاناسى بەكىمەگەن, نازىك سابيلەردىڭ ءوز اتا-انالارىن بالاباقشانىڭ اۋلاسىندا, سۋىقتا ۇزاق كۇتىپ قالۋى ولاردىڭ دەنساۋلىعىنا دا زارداپ تيگىزەرى انىق.
ۇشىنشىدەن, تاربيەشىلەرگە بەكىتىلگەن جۇمىس ۋاقىتىنان تىس قىزمەت كورسەتكەنى ءۇشىن قوسىمشا اقى تولەۋ قاراستىرىلماعاندىقتان, ولار بالالارىن ۋاقىتىندا الا الماعان اتا-انالارعا رەنىش ءبىلدىرىپ, ءوزارا كيكىلجىڭ تۋىنداۋدا.
تورتىنشىدەن, كەيبىر اتا-انالار بالاباقشاعا تەزىرەك جەتۋ ءۇشىن اسىعىپ, جەكە كولىكتەرىنىڭ جىلدامدىعىن اسىراتىندىقتان, ولار ءىرى ەلدى مەكەندەردە, اسىرەسە ۇلكەن قالالاردىڭ كوشەلەرىندە ءتۇرلى اپاتتىق جاعدايلار تۋعىزىپ جۇرگەندىگى دە جاسىرىن ەمەس. سونداي-اق جۋىردا استانا قالاسىنداعى بالاباقشالاردان شىعىپ, اتا-انالارىن كۇتىپ تۇرعان سابيلەردى بوتەن, سەنىمسىز كىسىلەردىڭ تاربيەشىلەردى الداپ, سۇراپ الىپ كەتۋگە ارەكەتتەنۋ فاكتىلەرى ورىن العاندىعى دا الاڭداتپاي قويمايدى. مۇنىڭ ءوزى قوعامدا كەيىنگى كەزدە جيىلەپ كەتكەن پەدوفيليا قىلمىسىنىڭ قايتالانۋشىلىعىنا اكەلىپ سوقتىرۋ قاۋپىن تۋعىزاتىندىعىن ەسكەرگەن ءجون.
وسىعان وراي سايلاۋشىلارمەن كەزدەسۋلەر بارىسىندا بىزگە اتا-انالار ورىندى شاعىمدار ءبىلدىرىپ, ەلىمىزدەگى مەملەكەتتىك بالاباقشالاردىڭ جۇمىس ۋاقىتىن كەشكى 19.00-گە دەيىن ۇزارتۋعا, نەمەسە كەزەكشى توپتار ۇيىمداستىرۋعا جاردەمدەسۋىمىزدى ءوتىندى. سونىمەن قاتار, قازىرگى كەزدە مەكتەپكە دەيىنگى مەملەكەتتىك ۇيىمدار تاربيەشىلەرىنىڭ كەشكى ساعات 18.00-دەن كەيىن اتا-انالاردىڭ بالالارىن الىپ كەتكەنشە جۇمىس ىستەگەن ۋاقىتى ءۇشىن قوسىمشا ەڭبەكاقى تولەنبەي وتىرعاندىعى قولدانىستاعى ەڭبەك زاڭناماسىن بۇزۋشىلىق بولىپ تابىلاتىندىعىنا ءسىزدىڭ نازار اۋدارىپ, ونى بولدىرماۋ جونىندە ءتيىستى شارا قولدانۋدىڭ قاجەتتىگىن كورىپ وتىرمىز.
جوعارىدا ايتىلعان جايلاردى ەسكەرە وتىرىپ, وسىناۋ وزەكتى ماسەلەنى رەسپۋبليكا كولەمىندە جان-جاقتى قاراستىرىپ, ونى وڭىنان شەشۋدى وتىنەمىز, دەپ ءبىز, دەپۋتاتتار بەيبىت مامراەۆ, ارتۋر پلاتونوۆ – ۇشەۋمىز پرەمەر-ءمينيستردىڭ ورىنباسارى ەربولات دوساەۆقا دەپۋتاتتىق ساۋال جولدادىق. تاربيەشىلەردىڭ جۇمىس ۋاقىتىن 1 ساعاتقا ۇزارتۋ, ول ءۇشىن مەملەكەتتەن بولماسا اتا-انالاردىڭ وزىنە اقى تولەتۋگە رۇقسات بەرۋ – قيىن ماسەلە ەمەس قوي, سوندىقتان وڭتايلى شەشىلەر دەگەن ۇمىتتەمىز.
كارىباي مۇسىرمان,
ءماجىلىس دەپۋتاتى
