جىل سايىن ءداستۇرلى تۇردە وتكىزىلەتىن پسيحو-فيزيولوگيالىق سىناق شاراسى بۇل جولى العاش رەت استانا قالاسىندا ۇيىمداستىرىلدى. وعان قازاقستان رەسپۋبليكاسى قاۋىپسىزدىك كەڭەسىنىڭ اسكەري قاۋىپسىزدىك جانە قورعانىس ءبولىمىنىڭ جەتەكشىسى گەنەرال-مايور مۋسليم التىنباەۆ پەن ۇلتتىق ۇلان باس قولباسشىسى گەنەرال-لەيتەنانت رۋسلان جاقسىلىقوۆ جانە ەلىمىزدىڭ كۇش قۇرىلىمى ارنايى بولىمشەلەرىنىڭ, مەملەكەتتىك ورگانداردىڭ وكىلدەرى قاتىستى.
بيىلعى سىناقتا كۇرەڭ بەرەتكە ۇمىتكەر جاۋىنگەرلەر باس-اياعى 19 ءنورماتيۆتى ورىندادى.
ونىڭ ىشىندە جيىنتىق قارۋ-جاراعىن ارقالاپ 75 شاقىرىمدىق قاشىقتىقتى جۇگىرىپ شىعۋ, سۋلى وتكەلدى مالتىپ ءوتۋ, تاجىريبەلىك اتىس جانە بەلگىلەنگەن ۋاقىت ىشىندە ءۇش قارسىلاسپەن ۇرىسقا ءتۇسۋ نورماتيۆتەرى بار.
بيىل ەلىمىزدىڭ بارلىق وڭىرىنەن كەلگەن كۇرەڭ بەرەت كيۋگە ۇمىتكەر ەكى جۇزگە جۋىق اسكەري قىزمەتشى كۆاليفيكاتسيالىق سىناق تاپسىرۋعا ىنتا تانىتتى. ونىڭ تەك 91-ءى عانا جارىس جولىنا جىبەرىلگەن.
ەكى كۇنگە جوسپارلانعان سىناقتا 18 جاۋىنگەر عانا اقتىق سىنعا دەيىن جەتتى.
سونداي-اق, بيىل اتالمىش سىناقتى ساپالى وتكىزۋ ماقساتىندا جانە كۇرەڭ بەرەتكە ۇمىتكەرلەردىڭ نورماتيۆتەردى ورىنداۋىن باقىلاۋ ءۇشىن ونىڭ بارلىق كەزەڭىندە «كۇرەڭ بەرەت» ورتالىق كەڭەسىنىڭ مۇشەلىگىندە تۇرعان 37 نۇسقاۋشى جانە اعا نۇسقاۋشىلار تارتىلدى.
ولارعا باسشىلىق تاراپىنان سالتاناتتى جاعدايدا كۇرەڭ بەرەت پەن «بۇركىت» كەۋدە بەلگىسى تابىس ەتىلدى.
وسى جولى سىناقتان سۇرىنبەي وتكەن 18 جاۋىنگەردەن بولەك, ارنايى ماقساتتىڭ ەكى جاۋىنگەرى كۇرەڭ بەرەت كيۋ مارتەبەسىنە يە بولدى. ولار الماتى مەن اقتوبە قالاسىندا وتكەن ارنايى وپەراتسيالاردا ەرلىك كورسەتكەن ەرجۇرەك جاۋىنگەرلەر. وسىلايشا, بيىلعى جىلى 20 جاۋىنگەر كۇرەڭ بەرەت يەسى اتاندى.
«كۇرەڭ بەرەت كيۋ مارتەبەسى يەسىنە ەشقانداي ماتەريالدىق كومەك الىپ كەلمەيدى. ولاردىڭ جالاقىسى بۇرىنعىشا قالا بەرمەك. ولار تەك وتاندى قورعاۋ كەزىندە العى شەپكە شىعىپ, العاشقىلاردىڭ ءبىرى رەتىندە اتتانۋعا قۇقىعى بار. بۇل وتانعا رياسىز بەرىلگەن ازاماتتار رەتىندە بولىپ قالا بەرەدى. ءبىزدىڭ ماقساتىمىز وسىنداي ازاماتتاردى ىرىكتەپ, ەلىمىزدىڭ تىنىشتىعىن قامتاماسىز ەتۋ», دەيدى ۇلتتىق ۇلان باس قولباسشىسى گەنەرال-لەيتەنانت رۋسلان جاقسىلىقوۆ.
نۇرلىبەك دوسىباي,
«ەگەمەن قازاقستان»
