ءتورت مۇنارالى مەشىتتى سالۋعا اۋىل بولىپ اتسالىسىپتى. ديزاين, كوركەمدەۋ تۇرعىسىنداعى يدەيالار كوپ جاعدايدا ەل بولىپ اقىلداسىپ شەشىلگەنىن ايتادى جۇرت. ءدىننىڭ ماقساتى – ىرىتكى سالۋ ءۇشىن ەمەس, ۇيىتۋ, ۇيىستىرۋ ەكەنىن ەسكەرسەك, بىرلىك اۋىلىنداعى بۇل قۇداي ءۇيى اۋىلدىڭ اۋىزبىرشىلىگىنەن تۋعان, ەندى جاماعاتتىڭ باۋىرمالدىعى ءۇشىن قىزمەت ەتەتىن بولادى.
ەكىنشى مەشىت اۋدان ورتالىعى سارقان قالاسىندا بوي كوتەردى. قالادا وسىعان دەيىن ءبىر عانا مەشىت بولعان. دەمەك, بۇل دا ەل تىلەگى تۇرعىزعان كيەلى عيمارات. بۇل عيبادات ءۇيى دە ەل ازاماتتارىنىڭ بىرىگۋىمەن, قولداۋىمەن سالىنعان. قۇرىلىسى 4 جىل بۇرىن باستالعان ساۋلەتتى, ەڭسەلى عيمارات ەندىگىدە قۇداي دەگەن جانعا قۇشاعىن اشاتىن, ءار مەرەكە, ءار جۇما سايىن ەلدىڭ باسى قوسىلاتىن ورداعا اينالادى.
مەشىتتەردىڭ اشىلۋ سالتاناتى دا ۇلكەن كولەمدە, جالپىحالىقتىق مەرەكە دەڭگەيىندە اتالىپ ءوتتى. باس ءمۇفتي ەرجان قاجى مالعاجى ۇلى, استاناداعى «حازرەت سۇلتان» مەشىتىنىڭ باس يمامى, نايب ءمۇفتي سەرىكباي وراز, سارقان اۋدانىنىڭ باس يمامى سەرىكبول اسقار, اۋدان اكىمى ەرعازى قوشانبەكوۆ باستاپ, اۋىل, اۋدان تۇرعىندارى مەن ءار وڭىردەن كەلگەن قوناقتاردىڭ قاتىسۋىمەن بولعان مەرەكەدە مەشىتتەردە ينە شانىشار ورىن بولعان جوق. العاشقى اشىلۋىن قاسيەتتى كۇنگە تۋرالاپ, جيىلعان جۇرتپەن بىرگە جۇما نامازىن وقىعان باس ءمۇفتي ەلىمىزدە اشىلعان ءار مەشىتتىڭ ورنى بولەك ەكەنىن, ءدىني باسقارما ءۇشىن عانا ەمەس, بۇكىل ەل ءۇشىن, مەملەكەتىمىز ءۇشىن زور قۋانىش ەكەنىن ايتتى.
سونداي-اق, مەشىت – تەك عيبادات ورنى عانا ەمەس, اۋىلدىڭ ءسانى ەكەنى ءسوزسىز. سوندىقتان دا ايشىقتى ءۇيدىڭ ساۋلەتى دە تارتىمدى بولۋ كەرەگىنە دەن قويۋ كەرەك. ايتالىق, بىرلىك اۋىلىنداعى ءبىر جارىم گەكتار جەردى الىپ جاتقان مەشىتتىڭ اينالاسى كوگالداندىرىلىپ, الداعى ۋاقىتتا, ءتىپتى, بالالار وينايتىن الاڭ سالۋدى جوسپارلاپ وتىر. بۇل – جاڭا باستاما دەۋگە بولادى. ءدىن مەن حالىقتى جاقىنداتۋ, جاسوسىپىرىمدەردىڭ جات اعىمدارعا ىلەسىپ كەتپەۋىنە ىقپال ەتۋدىڭ بىردەن ءبىر جولى دا وسى بولسا كەرەك.
باسقا ەمەس, مەشىتتىڭ الاڭىندا جۇرگەنىن ۇمىتپاي, اۋىزدارىن باعىپ, بىلاپىت ءسوز ايتۋدان ساقتانا ويناپ جۇرگەن بۇلدىرشىندەر كەلەدى كوز الدىڭا.
الماس ءنۇسىپ,
«ەگەمەن قازاقستان»
الماتى وبلىسى
