توتاميدەگى قىزۋ تارتىستا 9 سالماق دارەجەسى بويىنشا جەڭىمپازدار انىقتالدى. 55 كەلى سالماقتاعى ۇزدىك ورىندى ەلىمىزدىڭ ۇلتتىق قاۋىپسىزدىك كوميتەتى كومانداسىنىڭ وكىلى ەرعالي ناحانوۆ يەلەنسە, 60 كەلى سالماقتا ءبىرىنشى ورىندى ۇلتتىق ۇلان جاۋىنگەرى باۋىرجان سۇلتانوۆ جەڭىپ الدى. ال 65 كەلىدە قىتايلىق سپورتشىمەن تەڭ ۇرىستا «دينامو» سپورت كلۋبىنىڭ سپورتشىسى شىڭعىس جانعازى جەڭىستى قولدان بەرگەن جوق. 70 كەلىدە ۇقك سپورتشىسى نازاربەك زابيەۆ جەڭىسكە جەتتى.
سونداي-اق, ۇقك-ءنىڭ تاعى ءبىر وكىلى بەكزات بەكتەمىسوۆ 75 كەلىدە قارسىلاس شىداتپادى. 80 كەلى سالماقتا مەملەكەتتىك كۇزەت قىزمەتىنىڭ جاۋىنگەرى نۇرسۇلتان بەكباتشاەۆ ءبىرىنشى ورىندى يەلەندى. 85, 90 جانە 90 كەلىدەن جوعارى سالماق دارەجەسىندە رەسەي فەدەراتسياسى ۇلتتىق گۆاردياسىنىڭ سپورتشىلارى: رۋسلان گيليازوۆ, رومان كوپىلوۆ جانە ساليمگەرەي راسۋلوۆتاردىڭ مىسى باسىم بولدى. وسىلايشا, جالپى كوماندالىق ەسەپتە ءبىرىنشى ورىندى رەسەي فەدەراتسياسى ۇلتتىق گۆاردياسىنىڭ قۇراماسى يەلەندى. جەڭىمپاز كوماندا ۇلتتىق ۇلانى باس قولباسشىسى كۋبوگىمەن قاتار 500 مىڭ تەڭگە اقشالاي سىيلىق الدى.
ال ەكىنشى ورىن ۇلتتىق ۇلان كومانداسىنا بۇيىردى. ۇلاندىقتار ارنايى سەرتيفيكاتپەن قوسا 300 مىڭ تەڭگەنى ەنشىلەدى. ءۇشىنشى ورىنمەن بىرگە 200 مىڭ تەڭگە كولەمىندەگى اقشالاي سىياقىنى مەملەكەتتىك كۇزەت قىزمەتىنىڭ قۇراماسى مىسە تۇتتى.
جەڭىمپازدار انىقتالعان سوڭ, ءتۋرنيردىڭ رەسمي جابىلۋ سالتاناتى ءوتىپ, وعان ىشكى ىستەر ءمينيسترى, پوليتسيا گەنەرال-پولكوۆنيگى قالمۇحانبەت قاسىموۆ, ۇلتتىق ۇلان باس قولباسشىسى گەنەرال-لەيتەنانت رۋسلان جاقسىلىقوۆ, وفيتسەرلەر مەن ساربازدار, ءوزارا قارىم-قاتىناس ورگاندارىنىڭ باسشىلارى, قوعامدىق ۇيىمدار مەن اسكەري-پاتريوتتىق مەكەمەلەردىڭ وكىلدەرى, مەكتەپ وقۋشىلارى قاتىستى.
سپورتتىق سايىسقا ارنايى قوناق رەتىندە كەلگەن «ريو-2016» جازعى وليمپيادا ويىندارىنىڭ جۇلدەگەرى, بوكسشى ۆاسيلي لەۆيت ورتاعا شاقىرىلىپ, قۇقىقتىق ءتارتىپ اسكەرى جاۋىنگەرلەرىنىڭ اراسىندا بۇقارالىق سپورتتى دامىتۋعا قوسقان ۇلەسى ءۇشىن «قۇقىقتىق ءتارتىپ اسكەرىنە – 25 جىل» كەۋدە بەلگىسىمەن ماراپاتتالدى. سپورتشىعا مۇنداي سىي-قۇرمەتتى ۇلتتىق ۇلان باس قولباسشىسى گەنەرال-لەيتەنانت رۋسلان جاقسىلىقوۆ تابىس ەتتى.
«بۇل جەردە سپورت جەڭىسكە جەتتى. ەلدەر اراسىنداعى ىنتىماقتاستىق پەن دوستىق سالتانات قۇردى. تۋرنيرگە قاتىسقان سپورتشىلار مەن تورەشىلەرگە, ۇيىمداستىرۋشىلارعا, رەسەي فەدەراتسياسى, قىتاي حالىق رەسپۋبليكاسى, قىرعىز رەسپۋبليكاسىنداعى ارىپتەستىرىمە, ءوز ەلىمىزدەگى كۇش قۇرىلىم ورگاندارىنىڭ جەتەكشىلەرىنە العىسىمدى بىلدىرەمىن», دەدى ول.
سونداي-اق, تۋرنير بويى ءادىل تورەلىك ەتكەن تورەشىلەر مەن ۇزدىك ونەر كورسەتكەن سپورتشىلار دا باعالى سىيلىقتارمەن ماراپاتتالدى.
نۇرلىبەك دوسىباي,
«ەگەمەن قازاقستان»
