– بۇل جەر, – دەگەن-ءتىن جارىقتىق, يىعىنداعى وزىنە جاراستى ءتۇبىت ءشالىسىن تۇزەپ قويىپ, – ءبىر قاراعان ادامعا شەكسىز دە شەتسىز دالا بولىپ كورىنەدى. بىراق ونىڭ جوتالى جوندارىندا قاداۋ-قاداۋ عاجايىپتار از ەمەس. سونىڭ ءبىرى ءارى بىرەگەيى دەپ ەرەيمەنتاۋداعى ادەمى تابيعات سۋرەتتەرىن ايتۋعا بولادى. ەستە جوق ەسكى زاماننان بەرى بابالارىمىز قويعان اتاۋمەن كەلە جاتقان ولار سول جەر بەدەرىنە قالاي دالمە-ءدال كەلەدى دەسەڭشى! قويتاس دەگەن الاپقا بارساڭ, جايىلىپ جۇرگەن شوپان اتا ت ۇلىگىنىڭ وتارى كوزگە ەلەستەيدى. كۇنشالعان قىراتىنا زەر سالساڭ, باسقا توبەلەردەن بيىك تۇرعاندىقتان, وعان تاڭعى شاپاق نۇرى ەرتە تۇسەتىنىن بايقايسىڭ. بۇلتسىز كۇندەرى كەشكە قاراي ايعىرجال وڭىرىنە قاراعان ادام راسىندا دا جالىن توگىلتىپ, قۇيعىتىپ بارا جاتقان جىلقىنى كوزگە ەلەستەتەرى انىق. سونداي-اق ەرەيمەنتاۋدىڭ كوپتەگەن شوقىلارى ونداعى اڭ مەن قۇستىڭ اتىمەن اتالاتىنى بار. مىسالى, كوجەگى كوپ جەر – قوياندى, جىرتقىش قۇستار ۇيا سالعان جاقپارتاس – بۇركىتتى دەپ كەتە بەرەدى. ال, مىناۋ... ءيا, بۇل – سۇڭقارقيا!
– عاجاپ!.. كەرەمەت سۋرەت ەكەن! سوندا ول ەرەيمەننىڭ قاي ماڭايىندا, اپاي؟
– بۇرىنعى اۋماقتىق ءبولىنىستى ەسكە الساق, اقمولا وڭىرىندە سىلەتى اتتى اۋدان بولعان. قازىر ول جوق. مىنە, سونداعى يزوبيلنوە دەگەن شارۋاشىلىق وسى سۇڭقارقياعا ەڭ جاقىن قونىس دەپ ەسەپتەلەدى. ءارى ول ەرەيمەنتاۋدىڭ شەتكى نۇكتەسى دە. رەتى كەلىپ, مۇمكىندىك تۋىپ جاتسا, بارىپ كور, قاراعىم. وكىنبەيسىڭ. ويتكەنى ول تاماشالاۋعا تۇراتىن جەر.
...سودان باستاپ ولكەتانۋشى اپامىز ايتقان ايماققا بارۋعا تالاي تالاپتانعانبىز. بىراق ءتۇرلى سەبەپتەرمەن ەش رەتى كەلمەي-اق قويعان. تەك وسى جازدا عانا ول جەرگە ساپار شەگۋدىڭ ءساتى تۇسكەنى بار. دىتتەگەن جەرگە جەتىپ, تاۋ ەتەگىنەن بيىك بەتكەيگە قارادىق. بايقايمىز, سۇڭقارقيا ءبىزدىڭ قولىمىزداعى سۋرەت كورىنىسىنەن كوپ وزگەرمەگەن. بارلىق بولمىس-ءبىتىمى بۇزىلماي, سول كۇيىندە تۇر دەۋگە بولادى. قىران قۇسقا ءتان تەمىر توپشى, اۋانى ءتىلىپ ۇشار ءسۇيىر تۇمسىق, قۋاتتى كۇشپەن قومدالعان قوس قانات... وسىنىڭ ءبارى الدەبىر تىلسىم كۇش قۇدىرەتىمەن تاستان قاشالىپ جاسالىنعان دا قويعان. ارينە, بۇعان ىقىلىم زامانداردان بەرى ۇيىتقي سوققان وكپەك جەلدىڭ ءمۇجۋ اسەرى بولعان شىعار. سونداي-اق مۇندا تالاي ۋاقىت بويعى جىل مەزگىلدەرىندە جاۋعان قار مەن جاڭبىر سۋىنىڭ دا وزىندىك سالعان ىزدەرى بار ەكەندىگى انىق. بىراق قالاي دەسەك تە وعان ادام قولى تيمەگەن. سۇڭقار قۇس كەيپىندەگى بۇل تاس قيا – جارىقتىق تابيعات انانىڭ ءوز ءتول تۋىندىسى. ول مىنە, وسى قاسيەتىمەن قۇندى, وسى ەرەكشەلىگىمەن قىمبات.
جوعارىدا ءبىز سۇڭقارقيانىڭ قولىمىزداعى وسىدان كوپ جىل بۇرىنعى سۋرەتتەن كوپ وزگەرمەگەنىن ايتقان ەدىك. ءيا, سولاي. وزگەرگەن تەك ءبىر عانا كورىنىس. ول – ويپاتتاعى ورمان. ونىڭ سيرەپ كەتكەن مۇشكىل ءحالى. جولباسشىمىز, ولكەتانۋشى قاسىم اعا تاۋكەنوۆتىڭ ايتۋىنشا وعان كىنالى – ءورت. سوڭعى ۋاقىتتا بۇل وڭىردە ول كوبەيىپ كەتكەن. سول سەبەپتى جالعىز سۇڭقارقيا ەمەس, ەرەيمەننىڭ كوپ بوكتەرىندەگى اعاشتار سيرەپ, تاۋ ەتەكتەرى ءتۇرىلىپ قالعان. مۇنداي كورىنىستى كورۋ, ارينە كوڭىلسىز. قيىن. بار قولىمىزدان كەلەرى: «ەندىگىسى امان بولسا ەكەن», دەيمىز ىشتەي.
جانبولات اۋپباەۆ,
«ەگەمەن قازاقستان»
اقمولا وبلىسى,
ەرەيمەنتاۋ اۋدانى
