ءالىپبي اۋىستىرۋ ءۇشىن جاڭا ءارىپ ويلاپ تابۋدىڭ قاجەتى جوق. قازاق تىلىنە ءتان دىبىستار كومپيۋتەردىڭ پەرنەتاقتاسىندا ورنالاسقان كلاسسيكالىق لاتىن گرافيكاسىنا ابدەن لايىق. جۋىردا ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق كوورديناتسيالىق-ادىستەمەلىك ورتالىعى وسىنداي ۇلگىدەگى 25 ءارىپتى جاڭا ءالىپبيدى پارلامەنتتىك تىڭداۋعا ۇسىنعانى, ونىڭ قوعامدا قىزۋ تالقىلانىپ جاتقانى ايان. اسىرەسە, ءالىپبي قۇرامىنداعى قوسارلانعان داۋىستى ديفتونگتار جايلى كوزقاراس ارقيلى. ۇسىنىلعان جاڭا گرافيكاعا قاتىستى جيىننىڭ ءبىرى تالدىقورعانداعى ءتىل سارايىندا ءوتتى.
«لاتىن ءالىپبيى: جاڭعىرۋ جازۋدان باستالادى» دەگەن تاقىرىپپەن وتكەن جيىننىڭ ۇيىمداستىرۋشىسى وبلىستىق تىلدەردى دامىتۋ جونىندەگى باسقارما. اسسامبلەيا مەن ءتۇرلى ۇيىم مۇشەلەرى, مەكەمە قىزمەتكەرلەرى, ءوڭىردىڭ زيالى قاۋىم وكىلدەرى قاتىسقان كەڭەستە وبلىستىق تىلدەردى دامىتۋ جونىندەگى باسقارما باسشىسى ايدار باشباەۆ ەل دامۋى ءۇشىن ۇسىنىلىپ جاتقان ۇلى يدەيالاردى تەك تۇسىنۋمەن شەكتەلمەي, ولاردىڭ ىسكە اسۋىنا بەلسەنە اتسالىسۋ قاجەتتىگىن ايتتى.
ال وبلىستىق «جەتىسۋ» گازەتى باس رەداكتورىنىڭ ورىنباسارى ءنۇسىپباي ءابدىراحىمنىڭ ايتۋىنشا «كەز كەلگەن باستامانىڭ ءساتتى جۇزەگە اسۋى ءۇشىن وعان قوعام تاراپىنان سۇرانىس بولۋى كەرەك. ال لاتىن قارپىنە كوشۋگە قاتىستى ماسەلە قوعام تاراپىنان زور قولداۋعا يە. وزدەرىڭىز جاقسى بىلەسىزدەر, حالقىمىزدىڭ ءالىپبيى بىرنەشە رەت وزگەردى. كونە تۇركى تاڭباسىن بىلاي قويىپ, قازاقتار ون ەكى عاسىر بويى اراب جازۋىن پايدالانىپ كەلدى. تاريحىمىزدىڭ قانشاما بولىگى, ۇلكەن قاتپارى اراب جازۋىمەن جازىلعان ەدى. كەيىن ا.بايتۇرسىن ۇلىنىڭ رەفورماسى نەگىزىندە توتە جازۋعا كوشتىك. توتە جازۋدان كەيىن از ۋاقىت لاتىن ءالىپبيى قولدانىلىپ, بىردەن كيريلليتساعا اۋىستىق». سونىمەن بىرگە ءالىپبيدىڭ ءجيى اۋىسۋى جاس ۇرپاقتىڭ وتكەنىن تانۋعا كەدەرگى كەلتىرەتىنىن, اراب پەن كيريلل تاڭباسىندا قالىپ قويعان قازاق تاريحىن قايتا قوتارۋ قيىندىق تۋعىزباي قويمايدى. سوعان قاراماستان حالىقتىڭ 95 پايىزى لاتىن الىپبيىنە كوشۋگە دايىن ەكەنىن دە اتاپ ءوتتى.
وبلى ستىق قازاقستان حالقى اسسامبلەياسىنىڭ حاتشىلىق مەڭگەرۋشىسى عابيت تۇرسىنباي ۇلى لاتىن الىپبيىنە كوشۋ ۇلت ءۇشىن قاجەتتى باستامانىڭ ءبىرى بولىپ تابىلاتىنىن, پارلامەنتتەگى القالى جيىندا ايتىلعان ۇتىمدى ويلار مەن ۇسىنىستار ەل ءۇشىن جاسالىپ جاتقان يگى قادام ەكەندىگىن تىلگە تيەك ەتىپ, بۇل جۇمىستى تياناقتىلىقپەن, جاۋاپكەرشىلىكپەن جۇرگىزۋ كەرەكتىگىن العا تارتتى. جيىندا سويلەگەن وزگە قاتىسۋشىلاردىڭ باسىم كوپشىلىگى ۇسىنىلعان نۇسقانى قولدايتىنىن جەتكىزدى.
الماس ءنۇسىپ,
«ەگەمەن قازاقستان»
الماتى وبلىسى
