حالىقارالىق دەڭگەيدە ۇيىمداستىرىلعان شارانىڭ اشىلۋ سالتاناتىنا ىشكى ىستەر ءمينيسترى, پوليتسيا گەنەرال-پولكوۆنيگى قالمۇحانبەت قاسىموۆ پەن ۇلتتىق ۇلان باس قولباسشىسى گەنەرال-لەيتەنانت رۋسلان جاقسىلىقوۆ جانە وفيتسەرلەر مەن ساربازدار, ءوزارا قارىم-قاتىناس ورگاندارىنىڭ باسشىلارى, قوعامدىق ۇيىمدار مەن اسكەري-پاتريوتتىق ۇيىمداردىڭ وكىلدەرى, مەكتەپ وقۋشىلارى قاتىستى.
قۇتتىقتاۋ ءسوز سويلەگەن ىشكى ىستەر ءمينيسترى ق.قاسىموۆ سپورتشىلارعا ساتتىلىك تىلەدى.
«جەكپە-جەك ۇرىستى اسكەردىڭ قولدانبالى سپورت ءتۇرى رەتىندە كەڭ ناسيحاتتاپ, اسكەريلەر اراسىندا سپورت پەن سالاماتتى ءومىر سالتىن قالىپتاستىرۋ ماقساتىندا ۇلتتىق ۇلان باس قولباسشىسىنىڭ كۋبوگىنە ارنالعان ءتۋرنيردى وتكىزۋ يگى داستۇرگە اينالدى. ەلباسىمىز نۇرسۇلتان نازارباەۆتىڭ «قازاقستان 2050» ستراتەگياسىندا دەنە شىنىقتىرۋ مەن سپورت ۇنەمى مەملەكەتتىڭ ەرەكشە قامقورلىعىندا بولاتىندىعىن ناقتى كورسەتكەن. ول ءۇشىن مەملەكەت باسشىسى مەن ۇكىمەت تاراپىنان ءجىتى كوڭىل بولىنەتىنى ايتىلعان», دەدى ۆەدومستۆو باسشىسى.
شارا اياسىندا قالمۇحامبەت نۇرمۇمحامبەت ۇلى سالتاناتتى شاراعا ارنايى قوناق رەتىندە كەلگەن «ريو-2016» جازعى وليمپيادا ويىندارىنىڭ جەڭىمپازى, بوكسشى دانيار ەلەۋسىنوۆتى ورتاعا شاقىرىپ, ىشكى ىستەر ورگاندارى قىزمەتكەرلەرى اراسىندا بۇقارالىق سپورتتى دامىتۋعا قوسقان ۇلەسى ءۇشىن «ىشكى ىستەر ورگاندارىنىڭ قۇرىلعانىنا – 25 جىل» مەرەيتويلىق كەۋدە بەلگىسىمەن ماراپاتتادى.
ايتا كەتەيىك, ۇلتتىق ۇلان باس قولباسشىسى كۋبوگىنە ارنالعان جەكپە-جەك جارىسى جىل سايىن ۇيىمداستىرىلىپ كەلەدى. بيىلعى شاراعا ەلىمىزدىڭ كۇش قۇرىلىمدارىنداعى سپورت كوماندالارىنان بولەك رەسەي فەدەراتسياسى ۇلتتىق گۆاردياسىنىڭ اسكەرلەرى مەن قىتاي حالىق رەسپۋبليكاسى حالىقتىق قارۋلى پوليتسياسى جانە قىرعىزستان رەسپۋبليكاسى ۇلتتىق ۇلانىنىڭ سپورت كوماندالارى قاتىسۋدا. ەكى كۇنگە سوزىلاتىن تۋرنير اياسىندا 150-گە تارتا سپورتشىدان قۇرالعان 15 كوماندا باق سىنايتىن بولادى.
نۇرلىبەك دوسىباي,
«ەگەمەن قازاقستان»
