القالى جيىنعا ءدىن ىستەرى جانە ازاماتتىق قوعام ۆيتسە-ءمينيسترى بەرىك ارىن, پارلامەنت ءماجىلىسىنىڭ دەپۋتاتى باقىتبەك سماعۇل, قازاقستان مۇسىلماندارى ءدىني باسقارماسى توراعاسىنىڭ ورىنباسارى, «نۇر استانا» مەشىتىنىڭ باس يمامى ناۋرىزباي وتپەنوۆ, استانا قالاسىنداعى قاسيەتتى-ۋسپەن كافەدرالدى سوبورىنىڭ اعا ءدىني قىزمەتكەرى, پروتەيەرەي دميتري بايدەك, سونداي-اق, ەلىمىزگە بەلگىلى وزگە دە ءدىنتانۋشىلار مەن ساراپشىلار قاتىستى.
كونفەرەنتسيادا العىسوزدى العان بەرىك ارىن سوڭعى جىلدارى حالىق اراسىندا دىنگە بەتبۇرۋشىلىقتىڭ جىلدام ارتقانى, الايدا, بەلگىلى ءبىر بولىگى راديكالدى توپتارعا ەرىپ كەتكەنىن ايتتى. وسى رەتتە ول ەلباسى ماقالاسىندا ايتىلعانداي ءدىني ەكسترەميزمگە مۇلدەم توزبەۋشىلىكتى قالىپتاستىرۋىمىز ماڭىزدى ەكەنىن تاعى ءبىر مارتە ەسكە سالىپ ءوتتى.
بولاشاق جاستاردىڭ قولىندا. سوندىقتان وسكەلەڭ ۇرپاققا دۇرىس تاربيە بەرۋ ءۇشىن ەڭ الدىمەن ءبىلىم وشاعىنا نازار اۋدارىلۋى كەرەك. بۇل رەتتە ۆيتسە-مينيستر مەكتەپ باعدارلاماسىنان ءدىنتانۋ ساباعى الىنىپ, ونىڭ ورنىنا قوعام جانە ءدىنتانۋ ءپانى ەنگىزىلەتىنىن جەتكىزدى.
– قازىر وسىعان بايلانىستى ارنايى جۇمىستار جۇرگىزىلىپ, وقۋلىقتار ازىرلەنىپ جاتىر. ەندى ءبىلىم جانە عىلىم مينيسترلىگىنە قاراستى عىلىمي كەڭەستىڭ تالقىسىنان ءوتۋى كەرەك. ناقتى قاي ۋاقىتتان باستاپ مەكتەپ باعدارلاماسىنا ەنگىزىلەتىنىن ايتا المايمىن. بىراق كەلەسى وقۋ جىلىنان باستاۋ الۋى مۇمكىن, – دەدى بەرىك ارىن
ال ءماجىلىس دەپۋتاتى باقىتبەك سماعۇل تەرروريزمنىڭ الدىن الۋ ءۇشىن ۇلتتىق قۇندىلىقتارىمىز كەڭىنەن ناسيحاتتالۋى قاجەت ەكەنىن, وسى ءۇشىن بارىنشا جاعداي جاسالۋى كەرەكتىگىن ايتتى.
– قازىر ءتۇرلى اعىم وكىلدەرى ءدىني ساۋاتى از جاستاردى وزدەرىنە تارتىپ, تۋرا جولدان اداستىرىپ ءجۇر. ال ۇلتتىق قۇندىلىقتارىمىدى ناسيحاتتاۋ ارقىلى جاستارىمىزدى تاربيەلەپ, رۋحاني سۋسىنداۋىنا جاردەم ەتەمىز. بۇگىندە بەدەلدى قوعامدىق ۇيىمداردىڭ باسى-قاسىندا حالىقتى سوڭىنا جيناي الاتىن, بىرلىكتى ناسيحاتتاي بىلەتىن ازاماتتار بار. وسىنداي ازاماتتارىمىزدىڭ ارقاسىندا ەل ىشىندەگى تىنىشتىقتى, تاتۋلىقتى ساقتاۋىمىزعا بولادى. سوندىقتان مۇنداي ۇيىمدار ەكسترەميزمگە قارسى ءىس-قيمىل جۇمىستارىنا نەعۇرلىم كوبىرەك تارتىلۋى كەرەك, – دەدى باقىتبەك سماعۇل.
جيىندا ءسوز العان قازاقستان مۇسىلماندارى ءدىني باسقارماسى توراعاسىنىڭ ورىنباسارى ناۋرىزباي وتپەنوۆ يسلام ءدىنىنىڭ ارتىقشىلىقتارى تۋرالى قىسقاشا ءتۇسىندىرىپ ءوتتى. ول يسلام ءسوزى بەيبىتشىلىك, اماندىق دەگەن ۇعىمداردى بىلدىرەتىنىن, سوندىقتان ءدىن كەز كەلگەن قانتوگىسكە قارسى ەكەنىن ايتتى.
– بۇگىندە ءدىن اتىن جامىلعان ءتۇرلى ەكسترەميستىك توپتار كوبەيىپ كەتتى. وكىنىشكە قاراي, ولاردىڭ ۇيىمداستىرعان ءاربىر ارەكەتتەرى يسلامعا كۇيە جاعىپ وتىر. ولاردىڭ بىلىمسىزدىگىنە, جات اعىمداردىڭ جەتەگىنە كەتكەنى ءۇشىن يسلام دىنىنە كىنا ارتۋعا بولمايدى. سەبەبى, دىندە ەشقانداي زورلىق جوق. مۇسىلماندار تەك بەيبىت ءومىردى قولدايدى, – دەدى ناۋرىزباي وتپەنوۆ.
ءيا, ايتىلعاننىڭ ءبارى راس. بۇگىندە تەرىس اعىمنىڭ جەتەگىندە كەتىپ, جۇرت اراسىنا ىرىتكى سالىپ وتىرعانداردىڭ سانى قانشاما. ولاردىڭ بىلىمسىزدىگى مەن ناداندىعىنان قاراپايىم حالىق زارداپ شەگىپ وتىرعانىن جاسىرىپ قالۋعا بولماس. ال وسىنداي القالى جيىندار جاستاردىڭ بويىندا دىنمەن بىرگە تۋرا جولدى ناسيحاتتايتىنىن ايتا كەتكەن ءجون.
ايان ءابدۋالي,
«ەگەمەن قازاقستان»
