جوبالاردى باسقارۋدىڭ جاڭا تاسىلدەرىن ۇيرەتۋدى ماقسات ەتىپ وتىرعانىن ايتقان «قازاقستان-2050» جالپىۇلتتىق قوزعالىسى كەڭەسىنىڭ مۇشەسى عاني نىعمەتوۆ جوبا ماقساتىنا توقتالدى.
– جاستارعا جەكە كوشباسشىلىق قۇزىرەتتىلىگى مەن داعدىسىن ۇيرەتۋ, الەۋمەتتىك كاسىپكەرلىكتى ءتيىمدى جۇرگىزۋ بۇگىندە وتە ماڭىزدى. پرەزيدەنت جاريالاعان باعدارلامالىق ماقالادا ايتىلعان مىندەتتەردى ىسكە اسىرۋعا ءبىلىم بەرۋ ارقىلى ۇلەس قوسا الامىز. قوزعالىسىمىزعا مۇشە ازاماتتاردىڭ قاتارى جىل سايىن ارتىپ كەلەدى. ءبىلىم بەرۋ مەن وقىتۋ – رۋحاني جاڭعىرۋ باعدارلاماسىن ىسكە اسىرۋدىڭ ەڭ ءتيىمدى ءتاسىلى. وسى جايتتى ەسكەرە وتىرىپ, ءار سالا بويىنشا جاقسى ترەنەرلەردى جيناپ, 12 تاقىرىپ بويىنشا سەمينار وتكىزەمىز, - دەيدى ول.
ونىڭ ايتۋىنشا, جوباعا 25-35 جاس ارالىعىنداعى كەز-كەلگەن ەل ازاماتتارى قاتىسا الادى. ولارعا جوعارى ءبىلىمىنىڭ بولۋى, جۇمىس تاجىريبەسىنىڭ ەكى جىلدان كەم بولماۋى جانە اعىلشىن ءتىل دەڭگەيى سياقتى بىرنەشە تالاپ قويىلىپ وتىر. 29 قىركۇيەككە دەيىن موتيۆاتسيالىق حات جولداۋ ارقىلى ىرىكتەۋ تۋرىنا قاتىسۋ كەرەك.
وقىتۋ ناتيجەسىندە قاتىسۋشىلارعا تەوريالىق ءبىلىم بەرۋمەن عانا شەكتەلمەي, ناقتى ارەكەتكە باعىتتالعان ينتەراكتيۆتى ادىستەمەلەر قولدانىلماق. عىلىم مەن پراكتيكا نەگىزىندە تانىمال سپيكەرلەر باسەكەگە قابىلەتتى كادرلاردى دايارلاۋدىڭ ساپاسىن ارتتىرۋ جانە كاسىبي مىندەتتەرىن دەربەس ءارى شىعارماشىلىق تۇرعىدان شەشۋگە, كاسىبي قىزمەتتىڭ تۇلعالىق, جانە قوعامدىق ماڭىزىن ءتۇسىنۋ بويىنشا ءدارىس وقيتىن بولادى. بۇل رەتتە «Geneva Business School» اق باسشىسىنىڭ ورىنباسارى ايجان تۇسىپبەكوۆا وقىتۋ ۇدەرىسىن وقۋشىلاردىڭ ومىرلىك تاجىريبەسىنە نەگىزدەلگەن تۇلعاارالىق قارىم-قاتىناس نەگىزىندە جۇزەگە اسىرۋدىڭ ماڭىزى زور ەكەنىن ايتتى.
– GenevaBusinessSchool-دىڭ 6 ەلدە وكىلدىلىگى بار. وقىتۋ بارىسىندا وقۋشىلار ءبىر-بىرىمەن تاجىريبە بولىسە وتىرىپ, ءوز بەتىنشە جاڭا ءبىلىم مەن داعدىلاردى ۇيرەنەدى. ۇزدىك قاتىسۋشىلارعا ارناپ بىرنەشە گرانتتىق باعدارلامالار ۇسىنىپ وتىرمىز, – دەگەن ول باسەكەگە قابىلەتتىلىكتى جەتىلدىرۋ ءۇشىن قوسىمشا مۇمكىندىكتەر بەرىلەتىندىگىن جەتكىزدى.
ترەنينگ 2-17 قازان ارالىعىندا وتەدى. بارلىق قاتىسۋشىلارعا «Zhangyru» كورپوراتيۆتىك وقىتۋ» كۋرسىنان وتكەنى تۋرالى سەرتيفيكاتتار بەرىلەدى. ال ۇزدىك دەپ تانىلعان ءتورت قاتىسۋشى جوبا سەرىكتەسى «Geneva Business School» وكىلدىگى ۇسىنعان MBA باعدارلاماسى بويىنشا ءبىلىم بەرۋ گرانتى مەن ءبىلىم الۋ جەڭىلدىكتەرىنە يە بولادى. بۇگىنگى وقۋ نارىعىندا تالاپ ەتىلەتىن كاسىبي قۇزىرەت پەن مەنەدجمەنتتىڭ ءتۇرلى سالاسى بويىنشا بىلىكتىلىكتى ارتتىرۋعا مۇمكىندىك بەرەتىن بىرەگەي جوبانىڭ باس سەرىكتەسى – «سامۇرىق-قازىنا Trust» الەۋمەتتىك جوبالاردى دامىتۋ قورى. ترەنينگتەردىڭ ونلايىن كورسەتىلىمىن «قازاقستان-2050» جالپىۇلتتىق قوزعالىسىنىڭ سايتى ارقىلى دا كورۋگە بولادى.
ايا ءومىرتاي,
«ەگەمەن قازاقستان»
