جيىندى اشقان ۇلتتىق ينتەرنەت اسسوتسياتسياسىنىڭ توراعاسى سەرىكقازى كاكىبالانوۆ دوڭگەلەك ۇستەلگە قولداۋ بىلدىرگەن ءدىن ىستەرى جانە ازاماتتىق قوعام مينيسترلىگىنە جانە سوعان قاراستى ازاماتتىق باستامالاردى قولداۋ ورتالىعىنا, سونداي-اق تالقىلاۋ الاڭىن ۇسىنىپ, اقپاراتتىق سۇيەمەلدەۋ جاساعان «ەگەمەن قازاقستان» گازەتىنە العىسىن ءبىلدىرىپ, قاراستىرىلىپ وتىرعان ماسەلەنىڭ وزەكتىلىگىنە توقتالدى.
دوڭگەلەك ۇستەل بارىسىندا ءدىن ىستەرى جانە ازاماتتىق قوعام مينيسترلىگى ازاماتتىق قوعام ىستەرى جونىندەگى كوميتەتى باسقارما باسشىسى باقداۋلەت ساريەۆ قۇزىرلى مەكەمەنىڭ اتقارىپ جاتقان شارالارىن ءسوز ەتتى.
«بۇگىنگى تاڭدا ءبىزدىڭ مينيسترلىك تاراپىنان كوممەرتسيالىق ەمەس ۇيىمداردىڭ ماسەلەلەرى بويىنشا زاڭنامالىق اكتىلەرگە وزگەرتۋلەر مەن تولىقتىرۋلار ەنگىزىلىپ جاتىر. اتالعان وزگەرىستەر ۇكىمەتتىك ەمەس الەۋمەتتىك جوبالاردى جۇزەگە اسىرۋدا اشىقتىق پەن قولجەتىمدىلىك قاعيدالارىن ەنگىزىپ, جوبانىڭ تيىمدىلىگى مەن حالىققا قىزمەت ساپاسىن ارتتىرۋعا باعىتتالعان,» دەدى ب. ساريەۆ.
القالى جيىندا ءسوز العان «ەگەمەن قازاقستان» اق باسقارما توراعاسى دارحان قىدىرالى اقپارات وكىلدەرىنىڭ قوعامداعى اتقاراتىن ءرولىن جان-جاقتى اشىپ بەردى.
«مەديا سالاسىن بەكەردەن-بەكەر ءتورتىنشى بيلىك دەپ اتامايدى. بۇقار جىراۋلار حانعا قارا حالىقتىڭ مۇڭ-مۇقتاجىن جەتكىزىپ وتىرعان, بۇگىندە ول قىزمەتتى باق اتقارىپ وتىر. «ەگەمەن گازەتىنىڭ» دە نەگىزگى ۇستانىمى وسىعان سايادى. ءبىزدىڭ مىندەت بيلىكتىڭ باعىتىن حالىققا حابارلاۋمەن شەكتەلمەي, حالىقتىڭ ءسوزىن بيلىككە جەتكىزۋ. سوندىقتان, ەلدىڭ نازارىن اۋدارىپ, قوعامدى الاڭداتقان تاقىرىپتار مەن قوردالانعان ماسەلەلەردى ءبىرىنشى بەتتەن بەرە باستادىق», – دەگەن د.قىدىرالى «ەگەمەن قازاقستان» گازەتىنىڭ قۇقىق بۇزۋشىلىققا قاتىستى كوتەرگەن تاقىرىپتارىنا توقتالىپ, باسىلىمنىڭ وسى باعىتتاعى تاجىريبەلەرىمەن ءبولىستى.
د.قىدىرالى گازەتتىڭ وزىندە قۇقىق بۇزۋشىلىققا جول بەرمەۋ ماسەلەلەرى ءجىتى قاداعالاناتىنىن مالىمدەدى. مىسالى, رەداكتسياعا كەلىپ تۇسكەن وقىرمان حاتتارى جاريالانباستان بۇرىن جان-جاقتى زەرتتەۋ جۇرگىزىلىپ, ونىڭ قانشالىقتى راس-وتىرىگى انىقتالادى. كەيبىرەۋلەر بۇقارالىق اقپارات قۇرالدارىن بوپسالاۋ ماقساتىندا پايدالانىپ, دومالاق ارىز جازۋى ىقتيمال. الدا-جالدا بۇل ماسەلە ءجىتى تەكسەرىلمەسە, ونىڭ قوعامعا تيگىزەر زيانى مول. سونىمەن ءبىر مەزگىلدە بۇقارالىق اقپارات قۇرالدارى ارزان سەنساتسيا قۋماي, قوعامدىق ومىرگە قاجەتتى سالالارعا كوڭىل ءبولۋى ءتيىس.
«ينتەرنەتتەگى 7 جاڭالىقتىڭ التاۋى نەگاتيۆكە تولى. مۇنىڭ ءوزى قۇقىق بۇزۋشىلىق. ويتكەنى, سوتسيولوگيادا جامان اقپاراتتاردىڭ كوپ بولۋى ادام جۇيكەسىنە كەرى اسەرىن تيگىزەتىنى ءمالىم. سونىمەن قاتار, ءزابىر كورگەن بالالاردىڭ اتى-ءجونىن, جاي-كۇيىن ينتەرنەتكە جاريالاپ جىبەرتىن جاعدايلار كەزدەسەدى. تاياقتىڭ ەكىنشى ۇشى بار ەكەنىن ەسكەرمەگەندەر سول بالانىڭ بولاشاعىنا, اتا-اناسىنا تۇسىرەتىن سالماعىن ەلەپ-ەسكەرە بەرمەيدى», – دەدى د.قىدىرالى.
سونداي-اق باق-تىڭ قوعامعا تيگىزەتىن العاشقى ەففەكت اسەرى دەگەن بار. تاقىرىبىن ايقايلاتىپ جاريالاعان وتىرىك اقپارات قوعامدا تەرىس پىكىر قالىپتاستىرادى. ال سول اقپاراتتىڭ جالعاندىعى ءمالىم بولعاندا باستاپقى جاڭالىقتى وقىعاندار ونىڭ وتىرىك ەكەنىنەن بەيحابار قالادى. سوندىقتان, جۋرناليستەر ەڭ اۋەلى وزدەرىنە ارتىلار جاۋاپكەرشىلىك جۇگىن سەزىنۋى ءتيىس دەپ ەسەپتەيدى گازەت باسشىسى.
دوڭگەلەك ۇستەل بارىسىندا قاتىسۋشىلار دا ءوز پىكىرىمەن ءبولىستى. بەلگىلى بلوگەر ارشات وراز قوعامداعى قۇقىق بۇزۋشىلىققا مۇلدەم توزبەۋشىلىكتى قالىپتاستىرۋداعى بلوگەرلەردىڭ ءرولى تۋرالى ءسوز ەتتى. ول «بلوگەر» دەگەن ۇعىمنىڭ ءوزى وزگەرىپ كەتكەنىنە نازار اۋداردى.
«مەن ەكى جايتتى كوتەرگىم كەلىپ وتىر. ءبىرىنشىسى – ماسەلە كوتەرىلگەندە كوبىنە جالعان نەمەسە بۇرمالانعان اقپاراتتار تاراپ جاتادى. ونىڭ سوڭى ارانداتۋشىلىققا اپارادى. سوندىقتان, اقپاراتتىڭ ارا-جىگىن اجىراتىپ الۋ كەرەك. ەكىنشىسى – بوپسالاۋشى توپتار. ولاردىڭ كامەراعا تۇسىرەتىن ارنايى جىگىتتەرى, جوعارى دەڭگەيلى تەحنيكالارى بار. قوعامدا وزەكتى ماسەلە كوتەرگەن سەكىلدى بولىپ, تۇيمەدەي نارسەنى تۇيەدەي ەتىپ جاريالايدى. نەمەسە سول ارقىلى جەرگىلىكتى ورگانداردان بەلگىلى ءبىر كولەمدە اقشا تالاپ ەتەدى. مىنە, وسى كەزدە بلوگەرلەر ءبىرىنشى بولىپ اقپاراتتىڭ راستىعىنا نازار اۋدارىپ, شىندىقتى جاريالاۋى كەرەك», – دەدى ارشات وراز.
جيىندا بەلگىلى جۋرناليست ءارى بلوگەر امانگەلدى قۇرمەت قۇقىق بۇزۋشىلىقتىڭ جويىلۋىنا تىلشىلەردىڭ قانشالىقتى ۇلەس قوسىپ جۇرگەنىن ءسوز ەتتى. ول بۇل ماسەلەدە جۋرناليست پەن قوعامنىڭ ءرولىن ايتقاندى ءجون كوردى. قازىرگى ورتادا ءالى جويىلا قوي ماعان تاپتاۋرىنداردىڭ بارىن ايتتى. ماسەلەن, قۇقىق بۇزۋشىلىقتى پوليتسەيگە جەتكىزگەن ادام «ستۋكاچ» سانالادى. بۇل تۇرعىدا ول قۇقىق بۇزۋشىلىققا توزبەۋدى قالىپتاستىرۋ ءۇشىن مەملەكەتتىڭ جانە حالىقتىڭ ءوز ارەكەتى بارىن كولدەنەڭ تارتتى.
ءوز كەزەگىندە ءسوز العان بلوگەر سىرىم ءابدىراحمانوۆ ەلىمىزدىڭ شەت ايماقتارىندا تاقىرىپقا قاتىستى كوپتەگەن ماسەلەلەردىڭ كەنجەلەپ قالعانىن ايتتى. بۇل تۇستا بلوگەرلەر دە حالىقتىڭ مۇڭ-مۇقتاجىن بيلىككە دەر كەزىندە جەتكىزىپ وتىرۋى كەرەكتىگىن ايتادى س.ءابدىراحمانوۆ.
بەلگىلى جۋرناليست قانات اۋەسباي قۇقىق بۇزباۋشىلىقتى قالىپتاستىرۋدا ەڭ ۇلكەن ءرولدى زاڭ اتقاراتىنىنا توقتالدى. ونىڭ سوزىنە سۇيەنسەك, ەلىمىزدە جەكەمەنشىك, ناقتى ءبىر مۇددەگە قۇرىلعان, ارانداتۋشىلىققا اپاراتىن اقپارات قۇرالدارى كوپ. سونىڭ سالدارىنان جۇرت اراسىن دا تىلشىلەر جايىندا كەراعار پىكىر قالىپتاسادى.
«بۇگىندە اقپارات قۇرالىن تىركەۋ اسا قيىندىق تۋدىرمايدى. اقپارات جانە كوممۋنيكاتسيالار مينيسترلىگىنە ارنايى قۇجاتتارىڭدى تاپسىرساڭ, تىركەلىپ الۋعا بولادى. ەسەسىنە ەرتەڭ وسىنداي «جارتىلاي جۇمىس ىستەيتىن» سايتتار جالعان اقپاراتتى تاراتىپ جىبەرەدى. ءوز كەزەگىندە مۇنى رەيتينگى جوعارى باسىلىمدار سىلتەمە ارقىلى جاريالاپ, جۇرتتى دۇرلىكتىرىپ قويادى. ءىستىڭ اق-قاراسى انىقتالعاننان كەيىن ءسوزدىڭ سوڭى جۋرناليستەرگە كەلىپ تيەدى», – دەدى قانات اۋەسباي.
ءدىن ىستەرى جانە ازاماتتىق قوعام مينيسترلىگى مەن ازاماتتىق باستامالاردى قولداۋ ورتالىعىنىڭ ۇيىتقى بولۋىمەن ۇيىمداستىرىلعان القالى ماجىلىستە ۇلتتىق ينتەرنەت اسسوتسياتسياسىنىڭ باسشىسى سەرىكقازى كاكىبالانوۆ وسى ماسەلەگە قاتىستى «نۇكتە.كز» سايتىنىڭ اشىلعانىن مالىمدەدى. ءىس-شاراعا جينالعان قاۋىم كوتەرىلگەن ماسەلەنىڭ ماڭىزدىلىعىن ەرەكشە اتاپ ءوتتى.
