العاشقى قازىعى وسىدان ءۇش اي بۇرىن, «تۋعان جەرگە تۋىڭدى تىك» اكتسياسىندا قاعىلعان نىساندى سالۋعا سەرىكتەستىك ەسەبىنەن 30 ميلليون تەڭگە بولىنگەن. 100-دەن اسا جاس كوشەت پەن ساندىك اعاشتار وتىرعىزىلىپ, كوگالداندىرىلعان. زامانعا ساي تولىقتاي اباتتاندىرىلعان ساياباقتا اۋىل ادامدارىنىڭ دەمالۋىنا بارلىق جاعداي جاسالعان. ادەتتە اۋىل دەسە, كوشەنى شاڭداتىپ ويناپ, جول بويىندا دوپ قۋىپ جۇرەتىن بالا-شاعا ەلەستەيتىن. «شىبىق ءمىنىپ ءوستىم» دەيتىن ءسوز پوەزيامەن استاسقاندا, بۇرىنعىلاردىڭ بالالىق شاعىنا قاتىستى ايتىلعاندا جاراساتىن. ال بۇگىن باسقا زامان. ۋاقىتتىڭ تالابى بولەك. راسىندا, شىبىقتى ات قىپ ءمىنىپ جۇرگەن بالانى كورمەيسىڭ قازىر. سەبەبى باسقا دا قىزىقتار, كوڭىل اۋدارار دۇنيەلەر از ەمەس. ءتىپتى «بالامىز ۇيدەن شىقپايتىن بولدى, سمارتفوننان كوز المايدى», دەپ شاعىناتىندار دا از ەمەس. ال اۋىلىڭدا زامانعا ساي (سمارتفوننان كورىپ جۇرگەن) جەتىلدىرىلگەن ساياباق تۇرسا, اڭگىمە باسقا. وسى جاعىنان العاندا, وزدەرى تۋىپ-وسكەن اۋىلعا شاعىن فۋتبول الاڭى, بالالاردىڭ ويناۋىنا ارنالعان ءتۇرلى الاڭقايلار, ستريتبولعا ارنالعان شاعىن الاڭ, 130 ورىندىق كونتسەرتتىك ساحنا ورناتىلعان باق سالىپ بەرۋ اۋىلدىڭ كوركىن كىرگىزۋمەن قاتار, ءبىرتالاي ماسەلەنى شەشىپ بەرەتىنى انىق.
«كوپكە ۇلگى بولاتىن ءىس», دەپ جاتتى كولدەنەڭ جۇرت. بۇل, الدىمەن, جاڭا باستاما. ساياباق, ارنايى جابدىقتالعان ويىن الاڭدارى دەگەنىڭىز تەك ورتالىقتىڭ, قالانىڭ بالالارىنا عانا تيەسىلى دۇنيەدەي كورىنەتىن. وسىدان كەيىن, ء«بىزدىڭ اۋىلدا ساياباق بار» دەپ ماقتانۋ ادەتكە اينالار. بۇل ءوز كەزەگىندە ءبىراز ازاماتتارعا وي سالار. وسى كۇنگە دەيىن مەشىت سالۋمەن عانا شەكتەلىپ كەلگەن قالتالى ازاماتتار بۇدان بىلاي اۋىلداستارىن, ءىزباسارلارىن باسقا جاعىنان دا قۋانتۋدى ويعا الار. ءسويتىپ جاڭا ۇرپاق «قالادا مىناداي ەكەن, شەتەلدە اناداي نارسەلەر بار دەيدى» دەپ الىسقا كوز ساتىپ, جارىم كوڭىل وسۋدەن ارىلار.
اتالمىش پاركتىڭ اۋماعى 1 گەكتار. جوعارىدا اتالعان ويىندار عانا ەمەس, ءوز قالاۋلارى بويىنشا ۆولەيبول, باسكەتبول سياقتى سپورت تۇرلەرىمەن دە اينالىسۋعا مۇمكىندىكتەرى بار. ساحنانىڭ ورىن تەبۋى, الدىمەن كەش باتسا-اق نە ىستەرگە بىلمەي, سەندەلىپ, كوشە كەزىپ جۇرەتىن اۋىل جاستارىنا پايدالى. ناعىز مادەني ورتالىق. اسقار جانە دينارا سابىروۆتارعا ەلدىڭ ريزاشىلىعى الابوتەن. ءوڭىر باسشىسى دا پاركتىڭ اشىلۋىنا ارنايى قاتىسىپ, «ەلگە دەگەن پەيىلىن, جەرگە دەگەن مەيىرىن ىقىلاسپەن كورسەتە العان» كاسىپكەرلەرگە ەلدىڭ اتىنان, ءوزىنىڭ اتىنان العىس ايتتى. بۇل العىستى كەلەشەك ۇرپاق تا ايتادى. «اتاڭنان مال قالعانشا, تال قالسىن» دەيتىن ەل, بۇگىنگى جاس شىبىق ەرتەڭ بايتەرەككە اينالعاندا, ساياسىنا وتىرعان سايىن العىس جاۋدىرارى ءسوزسىز.
ال سابىروۆتار مۇنىمەن توقتامايمىز دەپ وتىر. الداعى جوسپار – ءدال وسىنداي ساياباقتى ج.قايىپوۆ جانە قازاقستان اۋىلدارىنان اشۋ. «Amal Bio»-نىڭ يگىلىگىن وسىندا جۇمىس ىستەپ, ناپاقا تاۋىپ جۇرگەن اۋىلدىق وكرۋگتىڭ 100-دەن اسا تۇرعىنى عانا ەمەس, ەندىگىدە ساياباقتا وينايتىن بالا-شاعا دا كورەتىن بولادى.
الماس ءنۇسىپ,
«ەگەمەن قازاقستان»
