جىلى جۇزدەسۋ بارىسىندا الەكسەي ۆولكوۆ ءدىن باسشىسىنا 130 ەتنوس پەن ءتۇرلى ءدىن كونفەسسيالارى بەيبىت پەن كەلىسىمدە عۇمىر كەشەتىن قازاقستان سوڭعى 25 جىل ىشىندە ەكونوميكاسى قارقىندى دامىپ كەلە جاتقان دەربەس مەملەكەتكە اينالعانىن اتاپ ءوتتى. قازاقستان وكىلى ەلىمىزدە يسلامنان باسقا پراۆوسلاۆيە ءدىنىنىڭ كەڭ تاراعانىن ايتتى. بۇل ورايدا, ول قازاقستان قوعامىنىڭ ومىرىندە ءداستۇرلى كونفەسسيالاردىڭ, اتاپ ايتقاندا يسلام مەن پراۆوسلاۆيەنىڭ اتقاراتىن ەرەكشە رولدەرىنە توقتالدى.
الەكسەي ۆولكوۆ پراۆوسلاۆيە ءدىنىنىڭ قازاقستان مەن گرەكيا اراسىنداعى دوستىق پەن بىرىگۋدىڭ فاكتورى ەكەنىنە نازار اۋداردى. وسى كونتەكستە, قازاقستاندىق ديپلومات ەكى مەملەكەت اراسىندا دوستىق كوپىرى سانالاتىن ەلىمىزدە ءومىر سۇرەتىن كوپساندى گرەك دياسپوراسىنىڭ ماڭىزدىلىعىن ءسوز ەتتى.
ساياسي ماسەلەلەر مەن قازاقستاننىڭ حالىقارالىق باستامالارىن تالقىلاۋ بارىسىندا, ەلشى مەملەكەتىمىزدىڭ كونفەسسياارالىق جانە ۇلتارالىق كەلىسىمدى ساقتاۋ جانە دە قازاقستان پرەزيدەنتى ن.نازارباەۆتىڭ جاھان شەڭبەرىندە دىنارالىق ديالوگتى العا تارتۋداعى جەكە ۇلەسىنە ەرەكشە ءمان بەردى. وسى ورايدا, ا.ۆولكوۆ ارحيەپيسكوپ يەرونيم II-ءنى قازاقستاندا قۇرىلعان ديالوگ الاڭى – الەمدىك جانە ءداستۇرلى دىندەر ليدەرلەرىنىڭ كەزەكتى سەزىنە اتسالىسۋعا شاقىردى.
ءوز كەزەگىندە, ارحيەپيسكوپ يەرونيم ΙΙ قازاقستان ەلشىسىن بەرىلگەن اقپارات پەن ەلدەرىمىز اراسىندا دوستىقتى نىعايتۋ باعىتىندا قوسىپ كەلە جاتقان ۇلەسى ءۇشىن شىنايى العىسىن ءبىلدىردى. ول قازاقستاننىڭ دىنارالىق ديالوگتى دامىتۋداعى تاجىريبەسىن مۇقيات زەرتتەۋگە نيەتىن بىلدىرە وتىرا, 2018 جىلى وتەتىن الەمدىك جانە ءداستۇرلى دىندەر ليدەرلەرىنىڭ كەزەكتى VI سەزىنە قاتىساتىنىن جەتكىزدى.
