بۇل جولعى ەلباسى كىتاپحاناسىندا وتكەن سەمينار-ترەنينگ «قازاقستان جولى: ماڭگىلىك ەل» باعدارلاماسى بويىنشا جالعاسىن تاپتى. الماتى قالاسىنداعى ىرگەلى ءبىلىم وردالارىنىڭ ءبىرى قازاق ۇلتتىق اگرارلىق ۋنيۆەرسيتەتى مەن قورقىت اتا اتىنداعى قىزىلوردا مەملەكەتتىك ۋنيۆەرسيتەتى ستۋدەنتتەرى وتانىمىزدىڭ وتكەنى مەن بۇگىنىن جارقىن بولاشاعىن سەمينار-ترەنينگتە جان-جاقتى تانىپ بىلۋگە مۇمكىندىك الدى. وسى ۋاقىتقا دەيىن «قازاقستان جولى: ماڭگىلىك ەل» كۋرسى بويىنشا 947 ادام ءبىلىمىن جەتىلدىرگەن ەكەن.
سەمينار اياسىندا كىتاپحانانىڭ عىلىمي قىزمەتكەرلەرى, سونىمەن قاتار, پروفەسسور عازيز تەلەباەۆ پەن تاريح عىلىمدارىنىڭ دوكتورى ساعىنتاي بەرداعۇلوۆا الۋان ءتۇرلى تاقىرىپتاردا دارىستەر جۇرگىزدى. ال ترەنينگ بولىمىندە ءتۇرلى ساباقتار مەن تاپسىرمالاردان, وي-تالقى مەن پىكىرسايىستاردان قۇرالعان دوڭگەلەك ۇستەل ۇيىمداستىرىلدى.
ەكىنشى كۇنى قازاقستان جاستارى كونگرەسى رەسپۋبليكالىق ۇيىمى ءباسپاسوز قىزمەتىنىڭ جەتەكشىسى ايدا سىزدىقوۆا پرەزيدەنتتىڭ رۋحاني جاڭعىرۋ جونىندەگى باستاماسى ەلدىڭ كوڭىلىنەن شىققانىن, اسىرەسە كەيىنگى ۇرپاقتى سەرپىلتكەنىن ايتىپ, قازاق جۇرتىن تورتكۇل دۇنيەگە تانىتقان ەكسپو كورمەسى كەزىندە 5 مىڭعا جۋىق ەرىكتىلەردىڭ جۇرتشىلىققا قىزمەت ەتكەنى تۋرالى جان-جاقتى باياندادى. بۇل تاۋەلسىز ەل جاستارى قانداي جۇمىستى تاپسىرسا دا مۇلتىكسىز الىپ شىعاتىنىن كورسەتتى دەگەن ول ەندى جەر-انانىڭ تاعدىرىن ويلاۋ, بولاشاقتى باعدارلاۋ ءار جاس ءوز ماقساتىن ىسكە اسىرۋ جولىندا قيمىل-قارەكەت جاساپ, سول ارقىلى جۇرەر جولىڭدى تاڭداپ, باعىتىڭدى بەلگىلەپ الۋ كەرەكتىگىن دە ەسكە سالدى. ەندىگى جەردە ەرىكتى جاستاردى قالىپتاستىرۋ, ولاردىڭ ازاماتتىق بەلسەندىلىگىن ارتتىرۋ, تاجىريبە جيناقتاۋ, الدىڭعى تولقىنعا ىزەت كورسەتە وتىرىپ, ىزباسارلارعا قامقورلىق تانىتۋ ءىسىن جولعا قويۋ, ءسويتىپ «كەمەل ەل» باعدارلاماسى ارقىلى كوش-
باسشىلار سانىن ارتتىرۋ جايىن دا تىلىنە تيەك ەتتى. ەكسپو كەزىندە ەل جاستارى ەلدىك ىسكە قاشاندا دايىن ەكەنىن تانىتىپ قانا قويعان جوق, وزدەرىنىڭ بىلىمىمەن دە, ىسكەرلىگىمەن دە, ۇيىمداستىرۋشىلىق قابىلەتىمەن دە تانىلا ءبىلدى, دەدى ا.سىزدىقوۆا.
بۇدان كەيىن الماتى مەن قىزىلوردادان كەلگەن ستۋدەنتتەر العان بىلىمدەرى تۋرالى بايانداپ, وزدەرىنىڭ ونەرلەرىن كورسەتتى. اسىرەسە ۇلى كومپوزيتور نۇرعيسا تىلەنديەۆتىڭ «القيسسا» كۇيىن قازاق ۇلتتىق اگرارلىق ۋنيۆەرسيتەتىنىڭ 3-كۋرس ستۋدەنتى ءازيز قادىرقان ۇلى كەلىستىرە ورىنداپ, جۇرتتىڭ ءىلتيپاتىنا بولەندى.
جاستارعا ارنايى سەرتيفيكاتتار مەن باعالى سىيلىقتاردى قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى ديرەكتورىنىڭ ءبىرىنشى ورىنباسارى ءامىرحان راحىمجانوۆ تاپسىرىپ, ماڭگىلىك ەل جاستارىن ەلباسى العا قويىپ وتىرعان يدەيا اياسىندا باۋلىپ, رۋحاني جەتىلدىرۋ ءىسى الدا دا جالعاسا بەرەتىنىن ايتا كەلىپ, بۇرىن قازاق جاستارى كوپ جاعدايدا العا ۇمتىلۋعا تالپىنا قويماسا, قازىر ودان ارىلىپ, الەمدىك ءۇردىستىڭ كەز كەلگەن جاقسى سالالارىن وزدەرىنىڭ ويى مەن بويىنا دارىتىپ قانا قويماي, جۇرت الدىندا كورسەتۋگە تالپىنا باستاعانىن جەتىستىك دەپ اتادى.
سۇلەيمەن مامەت,
«ەگەمەن قازاقستان»
