زادى, ۇلكەن سپورتتا جۇرگەن اتلەتتەردىڭ سىڭبىرۋگە ۋاقىتى بولمايدى. جارىس پەن جارىستىڭ اراسىن جالعاپ جاتاتىن جاتتىعۋلار وزگە تىرلىككە مويىن بۇرۋعا دا مۇرشا بەرمەيتىنى راس. كەزىندە قامقور جانداردىڭ اقىلى مەن كومەگىنىڭ ارقاسىندا وقۋعا ىلىگىپ, ودان كەيىن ديپلوم الىپ, ساناتقا قوسىلىپ كەتكەندەرى كوپ, ارينە. ال نە العان ديپلومى, يا بولماسا ۇيرەنگەن كاسىپ-ماماندىعى جوق بۇرىنعى سپورتشى قايدا بارماق؟ ءبارى بىردەي ەمەس-اۋ, بىراق ءبىرازىنىڭ قىلمىستىق الەم سەركەلەرىنىڭ قولتىعىنا ەنەتىنى امبەگە ايان.
جاسىراتىنى جوق, قىلمىستىق الەمنىڭ اككىلەرى سپورتشى قاۋىمنىڭ قىر سوڭىندا جۇرەدى. سول سەبەپتى دە سپورتتىق عۇمىرىن اياقتاپ, ەكى قولعا ءبىر كۇرەك تابا الماعان سايىپقىرانداردىڭ امالدىڭ جوقتىعىنان وسى ورتانى جاعالايتىنىنى بۇگىنگى كۇننىڭ اششى شىندىعى. بۇل, ارينە وكىنىشتى, ءبىزدىڭ قوعام ءۇشىن كۇن تارتىبىندە وتكىر تۇرعان ماسەلە.
قاراعاندىدا قازتۇتىنۋوداعىنىڭ ەكونوميكالىق ۋنيۆەرسيتەتى بار. كەڭەس وداعى كەزىندە اتاق-داڭقى دۇرىلدەپ تۇرعان بۇرىنعى كووپەراتيۆتىك ينستيتۋت. مىنە, سوڭعى جىلدارى وسى وقۋ ورنى جاسى بار, جاسامىسى بار ستۋدەنت سپورتشىلاردىڭ ورداسىنا اينالعانداي. جاقىندا عانا اتالعان ۋنيۆەرسيتەتتىڭ تابالدىرىعىن ەلىمىزگە ەسىمدەرى ءماشھۇر بوكسشىلاردىڭ ستۋدەنت رەتىندە اتتاعانى تۋرالى اقپارات رەسپۋبليكالىق باق-تى شارلاپ كەتتى. ارينە, «تالاپتى ەرگە نۇر جاۋار» دەگەن, ءبىلىمنىڭ سوڭىنا ءتۇسىپ, عۇمىر بويى تاۋسىلمايتىن رۋحاني ازىق جيعىسى كەلگەن اتاقتى سپورتشىلارىمىزدىڭ بۇل قادامىنا سۇيسىنىسپەن قارادىق.
ءبىلىم قۋعانداردىڭ ءبىرى «مەملەكەتتىك جانە جەرگىلىكتى باسقارۋ» ماماندىعىن تاڭداسا, ەكىنشىسى «كەدەن ءىسى» كاسىبى بويىنشا ماگيستراتۋراعا ءتۇسىپتى. ءبارى دە دۇرىس-اق. ءبىر عانا گاپ, وسى اتالعان سپورتشىلار ءبىلىمدى تەگىن الادى ەكەن. ءسىرا, مەملەكەتتىڭ اتىنان بەرىلگەن ءبىلىم گرانتىنا يە بولسا كەرەك.
راس, بۇل سپورتشىلار كەزىندە ەلىمىزدىڭ جاقسى اتىن جالپاق دۇنيەگە جايدى. كوك بايراقتى كوتەرتىپ, ءانۇرانىمىزدى الەمنىڭ ءار بۇرىشىندا شىرقاتتى. البەتتە, مۇنىڭ ءبارىن جوققا شىعارا المايسىز. بىراق مەملەكەتتىڭ دە ەلىم دەگەن ەرلەرىنەن ايانىپ قالعان جەرى جوق قوي. ءتيىستى سىياقىسىن ءبىر تيىنىن دا قالدىرماي تاپسىردى, جارقىراتىپ تەمىر تۇلپارىن مىنگىزدى, باس-باسىنا ءۇي بەرىپ, باسپانامەن قامتاماسىز ەتتى. ەندى كەلىپ, بۇل ازداي-اق ولاردى تەگىن وقىتۋى – ادامدى كادىمگىدەي ويلاندىرىپ تاستايتىنداي-اق ۇدەرىس.
نەگە دەيسىز عوي؟ ماسەلەن, قازىر سپورتتىڭ جولىنا ەندى تۇسكەن دارىندى جاستىڭ تالايى جوعارى وقۋ ورىندارىندا اقىلى تۇردە وقىپ ءجۇر. نەسيە الىپ, ىلدەبايلاپ جۇرگەنى قانشاما؟ مىنە, جوعارىدا اتتارى اتالعان اتاقتى سپورتشىلاردىڭ وسىلاردىڭ ەڭ قۇرىعاندا ءبىردى-ەكىسىنە دەمەۋشىلىك جاساۋعا بۇگىنگى كۇندە شامالارى ابدەن جەتەدى. بىراق بۇلارىڭىز بىرەۋگە كومەك قولىن سوزعانشا, مەملەكەتتىڭ موينىندا جۇرە تۇرعاندى الدەقايدا قولاي كورەتىن سياقتى. ەلىم مەنى كوككە كوتەردى, ەندى مەن دە سول ەلىمە قولدان كەلگەنشە تيتتەي دە بولسا پايدامدى تيگىزەيىنشى دەپ نيەت قىلسا, قانەكي؟
ماسەلە مىنادا عوي: تۇماندا البيوندا تۇرىپ وقىعان چەمپيون قاراعاندىدا قونا جاتىپ كىتاپ كەمىرەدى دەگەنگە ءوز باسىم سەنىڭكىرەمەيدى. ولاي بولسا, كۇنى ەرتەڭ «مەملەكەتتىك جانە جەرگىلىكتى باسقارۋ» ماماندىعى بويىنشا ديپلومدى شاپپاي العان سپورت شەبەرى بولاشاقتا ەلدى قالاي باسقارماق؟ كەدەنشىنىڭ ديپلومىن لەكتسياعا بارماي-اق الاتىن بولاشاق ماماننان نە كۇتۋگە بولادى؟ قاراپ تۇرساڭىز, ماقتاۋلى جىگىتتەرىمىزگە جۇمىس پەن قىزمەت داپ-دايىن تۇر ەكەن, تەك قانا جەتىسپەيتىنى الگى ءبىر جاپىراق كوك قاعاز...
بۇرىنعى سپورتشىلارىمىزدىڭ ءبىلىمدى بولعانى قوعامعا كەرەك-اق. ولارعا تەگىن ءبىلىم ۇسىنىپ جاتقان جوعارى وقۋ ورنىنا دا العىستان باسقا ايتارىمىز جوق. تەك, ەسىمى ەلگە ءماشھۇر سپورتشىلاردى جيىپ العاننان, ولارعا سىرتتاي سىدىرتىپ وقۋدىڭ ديپلومىن ۇلەستىرىپ, اتاق شىعارعاننان الما-ماتەردىڭ ابىروي-بەدەلى كوتەرىلە قويار ما ەكەن؟ ساپاسىز ءبىلىم كۇنى ەرتەڭ سان سوقتىرۋى مۇمكىن-اۋ دەپ ويلانعان ادام بار ما, ءوزى؟
ۇلكەن سپورتتا ءاربىر ساڭلاق ءوزىنىڭ اسقارالى ماقساتىنا جىلدار بويى شەلەكتەپ توككەن ماڭداي تەردىڭ ارقاسىندا جەتەدى. ەندەشە, ماڭگىلىك ەلدىڭ ەرتەڭىنە قىزمەت ەتەتىن مىعىم ءبىلىم دە ءوز الدىنا اسقار شىڭ عوي. ول مۇراتقا جەتۋ ءۇشىن دە ەرەن ەڭبەك, مول ىزدەنىس جانە زور جاۋاپكەرشىلىك كەرەك ەمەس پە؟!
