قايرات كەلىمبەتوۆ فوتو ©ياروسلاۆ رادلوۆسكي, tengrinews.kz
ق.كەلىمبەتوۆ حالىقارالىق ورتالىقتىڭ رەسمي ءتىلى – اعىلشىن ءتىلى ءارى تمد كەڭىستىگى ەلدەرىنىڭ اراسىندا اعىلشىندىق قۇقىق قاعيداتىمەن جۇمىس ىستەيتىن تۇڭعىش قارجى ينستيتۋتى ەكەنىن اتاپ ءوتتى. بۇگىندە الەمدىك قارجى ورتالىقتارىنىڭ 90 پايىزى وسى اعىلشىن قاعيداتتارىنا سۇيەنەدى ەكەن. قازىرگى تاڭدا دۇنيەجۇزىندە ەكى نەگىزگى قۇقىقتىق جۇيە بار بولسا, ونىڭ ءبىرى – كونستيتۋتسيا مەن زاڭداردىڭ باپتارىنا سۇيەنەتىن رومان-گەرماندىق قۇقىقتىق جۇيە, ەكىنشىسى – اعىلشىندىق قۇقىقتىق قاعيداتى. الەمنىڭ بيزنەسمەندەرى سوڭعىسىنا كوبىرەك ارقا سۇيەيتىن سەبەبى, بريتان تاسىلىندە تاۋەلسىز سوت ءار ءىستى ادامگەرشىلىك-مورالدىق تۇرعىسىنان قاراستىرىپ, بۇعان دەيىنگى سوتتاردىڭ دانالىق شەشىمدەرىنە, ءوزىنىڭ تاجىريبەسىنە, ۇستانىمىنا, ىشكى رۋحاني قۇندىلىقتارىنا سايكەس شەشىم شىعارادى. بۇل شەشىم وتە ءادىل ءارى اشىق بولادى. بىلاي قاراساڭىز, اعىلشىندىق سوتىنىڭ تابيعاتى قازاقتىڭ ەرتەدەگى بيلەر سوتىنا كەلەدى. مۇنداي جۇيەمەن جۇمىس ىستەيتىن قارجى ينستيتۋتتارىنا كاسىپكەرلەر نەمەسە ينۆەستورلار ەرەكشە سەنىممەن قاراپ, قارجىسىن قۇياتىنى دا سوندىقتان.
«استانا» حالىقارالىق قارجى ورتالىعىنىڭ نەگىزگى قۇرىلىمدارىمەن تانىستىرعان قايرات نەمات ۇلى ورتالىق قۇرامىندا جاڭا ايماقتىق بيرجا قۇرىلاتىنىن, ونىڭ جۇمىسىن جاڭا قۇرىلىم – قارجى قىزمەتتەرىن رەتتەۋ كوميتەتى ۇيلەستىرەتىنىن جەتكىزدى. بۇدان بولەك, جىلدىڭ اياعىنا دەيىن xالىقارالىق اربيتراج ورتالىعى مەن تاۋەلسىز قارجى سوتى قۇرىلادى. «وسىلايشا, بيرجا, قارجى قىزمەتتەرىن رەتتەۋشى, اربيتراج ورتالىعى مەن قارجى سوتى – «استانا» ورتالىعىنىڭ باستى ورگاندارى بولادى. ورتالىق ناقتى التى باعىتقا باسىمدىق بەرەدى. ولار – كاپيتال نارىقتارىن دامىتۋ, مەملەكەتتىك اكتيۆتەردى باسقارۋ, جاڭا قارجى تەxنولوگيالارىن دامىتۋ, جەكە ادامداردىڭ ءال-اۋقاتىن باسقارۋ, يسلامدىق قارجىلاندىرۋ مەن تسيفرلاندىرۋدى دامىتۋ», دەدى ق.كەلىمبەتوۆ.
قىمبات توقتامۇرات,
«ەگەمەن قازاقستان»
