«اققۋ كولى» سپەكتاكلى, © Astana Opera
«استانا وپەرا» بالەتىنىڭ 80-گە جۋىق ءارتىسى تەحنيكالىق قىزمەت جۇمىسكەرلەرى, ساحنا مەحانيكتەرى, جارىق بەرۋشىلەر, گريم جاساۋشىلار, كوستيۋمەرلەر, رەكۆيزيتورلار جانە باسقا دا قىزمەتتەردىڭ جۇمىسكەرلەرىمەن بىرگە 24 قىركۇيەك كۇنى الىس جولعا شىقپاق, دەپ حابارلايدى تەاتردىڭ ءباسپاسوز قىزمەتى.
– كورولدىك وپەرا تەاترىنىڭ ساحناسىندا ونەر كورسەتۋ ءبىز ءۇشىن ۇلكەن مارتەبە. بۇل ءبىزدىڭ ومانداعى العاشقى گاسترولىمىز. ساپارىمىز اسا ماڭىزدى, سەبەبى بالەت شەبەرلىگىنىڭ جوعارى ساپاسىن كورسەتكىمىز كەلەدى. «استانا وپەرا» تەاترىنىڭ ترۋپپاسى پ.ي. چايكوۆسكيدىڭ «اققۋ كولى» بالەتىنىڭ جاڭا رەداكتسياسىن ۇسىنباق, سوندىقتان تۋرنەمىز ەكى ەسە جاۋاپتى. كەيبىر وزگەرىستەردى ەنگىزە وتىرىپ, ءبىز ل. يۆانوۆ – م. پەتيپانىڭ كانوندىق قويىلىمىن ساقتاپ قالدىق. «اققۋ كولىن» كورسەتۋگە شەشىم قابىلدادىق, سەبەبى – بۇل كلاسسيكالىق بالەتتىڭ نىشانى, الەمدىك برەند. كومپوزيتور پ.ي. چايكوۆسكي وسى مۋزىكانى ۇلى مۇرا رەتىندە بىزگە ميراس ەتىپ قالدىردى. بۇل بالەت ماڭگىلىك, ونى ءبىزدىڭ اعا بۋىن تاماشالاعان, بولاشاقتا ۇرپاقتارىمىز تامساناتىن بولادى. الدىمىزعا قويىلعان مىندەت – كورەرمەننىڭ ەرەكشە اسەر الۋى ءۇشىن بار كۇش-جىگەرىمىزدى سالۋ, - دەپ اتاپ ءوتتى التىناي اسىلمۇراتوۆا.
اققۋلاردىڭ جاس حانشايىمى پارتياسىن – نازىك ودەتتا مەن قاتتى ۇقسايتىن وديليانى «استانا وپەرانىڭ» جەتەكشى سوليستەرى, قازاقستاننىڭ ەڭبەك سىڭىرگەن قايراتكەرلەرى ءمادينا باسپاەۆا مەن ايگەرىم بەكەتاەۆا ورىندايدى. حانزادا زيگفريدتى تەاتردىڭ جەتەكشى سوليستەرى, حالىقارالىق بايقاۋلاردىڭ لاۋرەاتتارى ەركىن راحماتوللاەۆ پەن ولجان تارلانوۆ ۇسىنادى. روتبارد رولىندە بالەت ءسوليسى ارمان ورازوۆ دەبيۋت جاساسا, وماندىق تەاتر ساحناسىندا ز ۇلىم كەمەڭگەر بەينەسىندە جانىبەك يمانقۇلوۆ بولماق.
قويىلىم ماەسترو دجۋزەپپە اكۋاۆيۆانىڭ باسقارۋىمەن كارلو فەليچە تەاترىنىڭ (گەنۋيا قالاسى, يتاليا) سيمفونيالىق وركەسترىنىڭ سۇيەمەلدەۋىمەن وتەدى.
