«بىزدە رەسمي تۇردە تۇراقتى تۇراتىن 1 ميلليون ون مىڭ ادام تىركەلگەن, ۋاقىتشا تىركەۋدە تۇرعاندار سانى 205 مىڭ ادام. ءبىزدىڭ ەسەبىمىز بويىنشا, قازىر قالادا ميلليون ءجۇز مىڭ – ميلليون ءجۇز ەلۋ مىڭ ادام تۇرىپ جاتىر», - دەدى اسەت يسەكەشەۆ وبلىستىق ءماسليحاتتىڭ سەسسياسىندا.
اكىمنىڭ ايتۋىنشا, حالىق سانىن انىقتاۋعا ۋاقىتشا تىركەۋ پروتسەدۋراسىنىڭ ارقاسىنادا قول جەتكىزىلگەن.
«كوپشىلىك 1 جىلدىڭ ىشىندە 860 مىڭ بولعان تۇرعىندار سانى قالاي ميلليونعا جەتتى دەپ تاڭدانعان بولاتىن. شىن مانىندە, كوپتەگەن ادام بۇل جەردە تىركەلمەگەن ەكەن. ولار وسى كۇنگە دەيىن جامبىل, پەتروپاۆل, قاراعاندىدا تىركەۋدە تۇرعان. ۇكىمەتپەن بەكىتىلگەن ۋاقىتشا تىركەۋگە تۇرعىزۋ ماسەلەسى بىزگە تۇرعىندار سانىنىڭ ناقتى قانشا ەكەنىن انىقتاۋعا جول اشتى», - دەدى ول.
استانا اكىمى حالىقتىڭ مۇنداي تىعىزدىعى مەكتەپ, اۋرۋحانا, قوعامدىق كولىكتەردە جۇكتەمەنى كوبەيتەتىنىن ايتىپ, وسىعان بايلانىستى استانادا ەكى ميلليون حالىققا ارنالعان جوسپارلار ازىرلەنەتىنىن جەتكىزدى.
ء«بىز تمد-داعى العاشقىلاردىڭ ءبىرى بولىپ لوندون, دۋباي, سينگاپۋر, ابۋ-دابي سياقتى قالالاردا قولدانىلاتىن كەشەندى دامىتۋ جوسپارىن ازىرلەيمىز. ول حالىقارالىق ستاندارتتارعا سايكەس ەكى ميلليون تۇرعىنعا ارنالىپ جاسالادى», - دەدى يسەكەشەۆ.
«دامۋ-جوسپارىنىڭ ماقساتى – قوعامدىق كەڭىستىكتە دەر كەزىندە كەشەندى ينفراقۇرىلىمدى دامىتۋ, قوعامدىق كولىكتەر, مەكتەپ, اۋرۋحانا, تۇرعىن ءۇي كەشەندەرى مەن ساياباقتاردىڭ دامۋىن قامتاماسىز ەتۋ, جەتى جوسپارلاۋ ورتالىقتى دامىتۋ. ياعني پوليورتالىقتى دامۋ مودەلىنە كوشۋ», - دەدى اكىم.
ايتا كەتەيىك استانانىڭ ميلليونىنشى تۇرعىنى 2016 جىلى شىلدەدە دۇنيەگە كەلگەن بولاتىن. ميلليونىنشى بولىپ تۋعان نارەستەنى اسەت يسەكەشەۆ قۇتتىقتاپ, پاتەر كىلتىن تابىس ەتتى.
