كوميتەت مۇشەلەرى س.ەڭسەگەنوۆ, م.بورتنيك, م.جولداسباەۆ, ءا.قۇرتاەۆ, م.كوبەنوۆ, ە.مامىتبەكوۆ, ە.سۇلتانوۆ, ع.دۇيسەنباەۆ جۇمىس ساپارى بارىسىندا بارلىق مۇددەلى تاراپتاردىڭ قاتىسۋىمەن سولتۇستىك كاسپي يننوۆاتسيالىق دامۋ جوباسى جانە «ۇلتتىق يندۋستريالىق مۇنايحيميا تەحنوپاركى» ارنايى ەكونوميكالىق ايماعىنىڭ قىزمەتى ماسەلەلەرى بويىنشا اشىق تىڭداۋ وتكىزدى.
كومىرسۋتەگى شيكىزاتىن 4-5 شەگىنە دەيىن تەرەڭ وڭدەۋدى دامىتۋ ارقىلى پوليمەر ونىمدەرىنىڭ ءوندىرىسىن وزىندىك قۇنى جوعارى تەحنولوگياسى تىزبەگىن تولىق اياقتاۋ ارنايى ەكونوميكالىق ايماقتى دامىتۋدىڭ نەگىزگى باعىتتارى بولىپ تابىلادى. ولاردىڭ قاتارىنا نەگىزگى اۋىر سالماقتى ونىمدەر شىعاراتىن كاسىپورىن دا, ماشينا-اسپاپ جاساۋ, حالىق تۇتىناتىن تاۋارلار مەن قۇرىلىس سالاسىنىڭ اۋقىمدى ونىمدەرىن وندىرەتىن شاعىن جانە ورتا بيزنەس كاسىپورىندارى دا كىرەدى.
2008 جىلدان بەرى «ۇلتتىق يندۋستيالىق مۇنايحيميا تەحنوپاركى» ارنايى ەكونوميكالىق ايماعىنا قاتىسۋشىلار 234,4 ميلليارد تەڭگە ينۆەستيتسيا اكەلگەن بولاتىن, ونىڭ ىشىندە: «Kazakhstan Petrochemical IndustriesInc» جشس - 77 908 ميلليون تەڭگەنى, «Polymer Production» جشس - 15 724,4 ميلليون تەڭگەنى, «KLPE» جشس - 37 833 ميلليون تەڭگەنى, «Karabatan Utility Solutions» جشس -103 ميلليارد تەڭگە قۇرادى.
دەپۋتاتتارعا ارنايى ەكونوميكالىق ايماقتىڭ جاڭا نىساندارى جانە مەملەكەتتىك-جەكەمەنشىك ارىپتەستىك اياسىنداعى ايماققا ينۆەستيتسيالىق كاپيتال تارتۋ مۇمكىندىكتەرى تانىستىرىلدى.
سەناتورلار اتىراۋ وبلىسىنىڭ ينۆەستيتسيالىق تارتىمدىلىعىن اتاپ ءوتىپ, مەملەكەتتىك-جەكەمەنشىك ارىپتەستى دامىتۋ الەۋمەتتىك ماڭىزدى جوبالاردى ىسكە اسىرۋعا جاڭا سەرپىن بەرەتىنىنە جانە بيزنەستىڭ مەملەكەتپەن ۇزاق مەرزىمدى ءارى تەپە-تەڭ ىنتىماقتاستىعىنا ىقپال ەتەتىنە سەنىم ءبىلدىردى.
مۇناي مەن گازدى كەشەندى تۇردە دايىندايتىن «بولاشاق» قوندىرعىسىنىڭ جۇمىسشىلارىمەن «سامال» ۆاحتالىق اۋىلىندا بولعان كەزدەسۋدە يندۋستريالىق دامۋ جانە ەكونوميكانى جاڭعىرتۋ ماسەلەلەرى بويىنشا پىكىر الماسىلدى.
سەناتورلار سونداي-اق قاشاعان كەنىشىندەگى مۇناي وندىرۋگە جانە جەر قويناۋىنا گازدى كەرى ايداۋعا ارنالعان «د» جاساندى ارالىندا – تەڭىز وپەراتسيالارى ورتالىعىنىڭ, تۇيىرشىكتەلگەن كۇكىرت وندىرەتىن زاۋىتتىڭ جۇمىسىمەن تانىستى.
دەپۋتاتتار ماحامبەت اۋدانىندا «حان وردالى سارايشىق» مۇراجاي-قورىعىمەن, اتىراۋمەن قاتار ەلىمىزدەگى جانە رەسەيدىڭ كوشىلەس وبلىستارىن دا ساپالى ونىمدەرمەن قامتاماسىز ەتەتىن «ۆ.رازمەتوۆ» شارۋا قوجالىعىنىڭ جۇمىسىمەن تانىستى. اۋىل ەڭبەككەرلەرىمەن ايماقتاعى اگروونەركاسىپ سالاسىن دامىتۋ كەلەشەگى جانە «سىباعا», «قۇلان» جانە «التىن اسىق» مەملەكەتتىك باعدارلامالارىن ىسكە اسىرۋ ماسەلەلەرى تالقىلاندى.
دەپۋتاتتار اتىراۋ وبلىسىنداعى جۇمىس ساپارىن قۇرامىنا مۇناي مەن گازدىڭ ءىرى كەنىشتەرى: قاشاعان, قالامقاس-تەڭىز, قايراڭ, اقتوتى جانە وڭتۇستىك-باتىس قاشاعان ەنەتىن سولتۇستىك كاسپي ەرەكشە جوباسىنىڭ نىساندارىن ارالاۋمەن قورىتىندىلادى. مۇندا وندىرىلەتىن ءونىم 13 ميلليارد باررەلگە (2 ميلليارد توننا) دەيىن جەتەدى.
سەناتتىڭ ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ توراعاسى اسقار بەيسەنباەۆ ساپاردى قورىتىندىلاي كەلىپ, ۇلت كوشباسشىسىنىڭ قازاقستاندى ءۇشىنشى جاڭعىرتۋ باستاماسىنا سايكەس, ەلىمىزدى ستراتەگيالىق دامىتۋدا يننوۆاتسيالىق جانە ونەركاسىپتىك وركەندەۋدىڭ باسىمدىقتارىن ىسكە اسىرۋ بارىسىندا ايماقتىڭ الەۋەتى تولىق اشىلاتىنىنا سەنىم ءبىلدىردى.
