جايدارمانشىلار بۇگىنگى ويىندا ەلىمىزدەگى سوڭعى جاڭالىقتار مەن وزگەرىستەردى تىلگە تيەك ەتىپ, ساپالى ويىن كورسەتتى. اسىرەسە لاتىن قارپىنە كوشۋ, «ەكسپو-2017» حالىقارالىق كورمەسىنىڭ اياقتالۋى, «رۋحاني جاڭعىرۋ» باعدارلاماسى تۋرالى ءجيى ايتىلدى. 16 كوماندانىڭ ىشىنەن «جاڭا عاسىر», «قىز جىبەك», ء«ىت» كوماندالارى ءادىل قازى القالارىنىڭ جوعارى باعاسى مەن كورەرمەندەردىڭ ىستىق ىقىلاسىنا يەلەندى.
سايىس ناتيجەسى بويىنشا, «ۇزدىك ويىنشى» نوميناتسياسى «الا-توو» كومانداسىنىڭ ويىنشىسى ايبەك بەكتەمىروۆكە تابىستالدى. «قىز جىبەك» كومانداسى 3-ورىن مەن 200000 تەڭگەنى قانجىعاسىنا باستى. تالدىقورعاندىق «شاپالاق» كومانداسىنا 2-ورىن بۇيىردى جانە 300000 تەڭگە اقشالاي سىيلىقپەن ماراپاتتالدى. ويىننىڭ باستى سىيلىعى, استانا قالاسى اكىمىنىڭ كۋبوگى مەن 1 ميلليون تەڭگەنى «جاڭا عاسىر» كومانداسى ۇتىپ الدى. جەڭىمپازداردى استانا قالاسى اكىمىنىڭ ورىنباسارى ەرمەك ءامىرحان ۇلى امانشاەۆ ماراپاتتادى.
قاتىسۋشى كوماندالار اراسىندا تەك تاجىريبەلى توپتار ەمەس, جاس قۇرامالار, ءتۇرلى رەسپۋبليكالىق ليگالاردىڭ جەڭىمپازدارى, سونىمەن قاتار كورشىلەس قىرعىزستاننان «الا-توو» قۇراماسى كەلدى. فەستيۆال فورماتىندا وتكەن ويىن بيىل 9-رەت ۇيىمداستىرىلىپ وتىر.
قاتىسۋشىلاردىڭ ونەرىنە تانىمال تەلەجۇرگىزۋشىلەر بەرىك ءۋالي مەن اسحات سادىرباي جانە دانا نۇرجىگىت, قوعام قايراتكەرى مۇرات ابەنوۆ, ءماجىلىس دەپۋتاتى باقتيار ماكەن سەكىلدى قازىلار قۇرامى تۇلعالار باعا بەردى.
