18-21 قىركۇيەك ارالىعىندا قازاقستان مەن ارمەنيا رەسپۋبليكاسى اراسىنداعى ديپلوماتيالىق قارىم-قاتىناستاردىڭ 25 جىل تولۋىنا وراي ەرەۆان قالاسىنداعى «ماسكەۋ» كينوتەاترىندا قازاق كينوسى اپتالىعى ءوتىپ جاتىر. مادەني ءىس-شارا كەزىندە ءار جىلدارى جارىققا شىققان ۇزدىك قازاق فيلمدەرى كورسەتىلەدى. ءىس شاراعا ارمەنيانىڭ زيالى قاۋىمى, ارمەنيا كينەماتوگرافيستەر وداعىنىڭ مۇشەلەرى, مادەنيەت مينيسترلىگى, ىسكەرلىك, مەملەكەتتىك ۇيىمدار مەن ۆەدومستۆولار, سونىمەن قاتار ديپلوماتيالىق كورپۋستىڭ وكىلدەرى قاتىسادى.
«اتالعان جوبانىڭ نەگىزگى ماقساتى كينەماتوگرافيا سالاسىنداعى ەكى ەل اراسىنداعى ەكىجاقتى قارىم-قاتىناستاردى نىعايتۋ, سونداي-اق ارميان كورەرمەندەرىن قازاقستاننىڭ قازىرگى كينوسىمەن تانىستىرۋ», دەپ ناقتىلدى ش.ايمانوۆ اتىنداعى «قازاقفيلم» اق ءباسپاسوز قىزمەتى.
مادەني ءىس-شارا بارىسىندا ش.ايمانوۆ اتىنداعى «قازاقفيلم» كينوستۋدياسى جارىققا شىعارعان باسقا دا فيلمدەر كورسەتىلەدى. رەجيسسەر رۇستەم ءابدىراشتىڭ «ستالينگە سىيلىق» (19 قىركۇيەك) جانە «بالالىق شاعىمنىڭ اسپانى» (20 قىركۇيەك) فيلمدەرى, رەجيسسەرلەر ۇلكەن سەرگەي بودروۆ, تالعات تەمەنوۆ جانە يۆان پاسسەردىڭ «كوشپەندىلەر» (21 قىركۇيەك). قازاق كينوسى اپتالىعى 22 قىركۇيەك كۇنى ەلدور ۋرازباەۆتىڭ ء«ترانسسىبىر ەكسپرەسى» فيلمىمەن اياقتالادى.
ايا ءومىرتاي
«ەگەمەن قازاقستان»
