تەحنيكا عىلىمدارىنىڭ دوكتورى, پروفەسسور, قازاقستان ۇلتتىق ينجەنەرلىك جانە جوعارى مەكتەپ اكادەميالارىنىڭ اكادەميگى ءاشىمجان سۇلەيمەن ۇلىنىڭ ش.ەسەنوۆ اتىنداعى اقتاۋ مەملەكەتتىك ۋنيۆەرسيتەتىندەگى رەكتورلىق قىزمەتىنە توقتالۋدى ءجون كوردىم. سەبەبى ءوزىم دە سول ۋنيۆەرسيتەتتىڭ رەكتورى قىزمەتىن اتقارعان ەدىم. تاجىريبەلى ۇيىمداستىرۋشى ءا.احمەتوۆ 2001 جىلى اتالعان ۋنيۆەرسيتەتتىڭ رەكتورى بولىپ تاعايىندالادى.
ول كىسىنىڭ باسشىلىققا كەلۋىمەن ۋنيۆەرسيتەتتە كۇردەلى قۇرىلىمدىق وزگەرىستەر باستالدى. ۋنيۆەرسيتەتتىڭ ماتەريالدىق-تەحنيكالىق بازاسى جاقساردى. جوعارى وقۋ ورنى ءوزىنىڭ شيرەك عاسىرلىق تاريحىندا جاڭا بەلەسكە كوتەرىلدى. عيماراتتارى جوندەۋدەن ءوتىپ, جاڭا كەيىپكە كەلتىرىلدى, قۇرىلىستار سالىندى. وڭىردەگى ورنى ايقىندالا, بەدەلى ارتا ءتۇستى. جاڭا ساپالىق دەڭگەيگە كوتەرىلىپ, زاماناۋي جوعارى وقۋ ورنى مارتەبەسىنە قادام جاسادى. ەلىمىزدىڭ باتىس وڭىرىندەگى وقۋ-تاربيە ۇدەرىسىن ۇيىمداستىرۋدىڭ سونى تالاپتارىنا سايكەس كەلەتىن ەڭ ءىرى جوعارى وقۋ ورنى رەتىندە قالىپتاستى.
ەلباسىنىڭ «قازاقستان-2030» ستراتەگياسىنا سايكەس, ۋنيۆەرسيتەتتىڭ عىلىمي كەڭەسىندە 2002-2007 جىلدارعا ارنالعان دامۋ تۇجىرىمداماسى قابىلداندى جانە 2004-2007 جىلدارعا ارنالعان دامۋ جوسپارى جاساقتالدى. ۇجىم جۇمىسى مەملەكەتتىك باعدارلامادا, تۇجىرىمدامادا جانە جىل سايىنعى ەلباسى جولداۋلارىندا كورسەتىلگەن ماقساتتارعا قول جەتكىزۋگە باعىتتالدى. وقۋ مەن باسقارۋ ۇدەرىسىنە جاڭا اقپاراتتىق تەحنولوگيالار ەنگىزۋگە ەرەكشە كوڭىل ءبولىندى. قاشىقتىقتان وقىتۋ ورتالىعىنىڭ جۇمىسى جولعا قويىلا باستادى. سوڭعى مودەلدەگى كومپيۋتەر مەن ينتەرنەت سىنىپتارى اشىلدى. سونداي-اق شارۋاشىلىق كەلىسىمشارت جۇمىستارى ورىندالا باستادى. نەگىزگى تاپسىرىس بەرۋشىلەر مۇناي كومپانيالارى, ونەركاسىپتەر مەن ۇيىمدار بولدى.
وسىلايشا, 2006 جىلى 30 جىلدىق مەرەيتويى قارساڭىندا ش.ەسەنوۆ اتىنداعى اقتاۋ مەملەكەتتىك ۋنيۆەرسيتەتى وقۋ-تاربيە جۇمىسىنىڭ ۇيىمداستىرىلۋى جولعا قويىلعان قۋاتتى عىلىمي-ءبىلىم بەرۋ قۇرىلىمى رەتىندە قالىپتاستى. الدىنا ءوڭىر ونەركاسىبى مەن ەكونوميكاسىن جوعارى بىلىكتى كادرلارمەن قامتاماسىز ەتۋ ماقساتىن قويىپ, جاس ۇرپاقتىڭ جول تابۋىنا جان-جاقتى كومەكتەسۋگە باعىت ۇستانعان ەدى.
ەل اعاسى اتانعان ءاشىمجان سۇلەيمەن ۇلى قاي كىزمەتتى اتقارسا دا اركەز قازاقستاننىڭ عىلىمى مەن ءبىلىمىن دامىتۋعا اتسالىسقان جان. ول ۇلتىمىزدىڭ وركەنيەتتى ەلدەر قاتارىنان ورىن الۋىن تىلەيتىن جانە وعان تەك تەرەڭ ءبىلىم ارقىلى جەتە الاتىنىمىزدى ۇنەمى تىلگە تيەك ەتەتىن. بۇگىندە ش.ەسەنوۆ اتىنداعى اقتاۋ مەملەكەتتىك ۋنيۆەرسيتەتىندە ءاشىمجان سۇلەيمەن ۇلى اتىنداعى زاماناۋي وقۋ اۋديتورياسى بار. بۇل اۋديتوريا ستۋدەنت جاستاردىڭ ءبىلىمىن شىڭداۋعا قىزمەت ەتىپ كەلەدى. «جاقسىنىڭ اتى, عالىمنىڭ حاتى ولمەيدى» دەگەندە, ەل الدىنداعى وسىنداي ەرەسەن ەڭبەك ەسكە تۇسەدى.
ءابدىمۇتالىپ ءابجاپپاروۆ,
ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ رەكتورى, تەحنيكا عىلىمدارىنىڭ دوكتورى, پروفەسسور
كوكشەتاۋ
