وبلىستىڭ زيالى قاۋىمى, جاستار, وقۋشىلار جانە باق وكىلدەرى قاتىسقان جيىندا الاش ءۇشىن ارداقتى باۋكەڭنىڭ, باۋىرجان مومىش ۇلىنىڭ كەلىنى تاعىلىمدى ويلارىمەن ءبولىستى. سىرلاسۋ كەشىن ادەت-عۇرىپ جانە سالت-ءداستۇر ورتالىعىنىڭ ديرەكتورى جانىبەك تاعاەۆ جۇرگىزىپ وتىردى.
– باقىتجان دۇنيەدەن وتكەننەن كەيىن كۇيرەپ قالعانداي كۇي كەشتىم, – دەدى باتىردىڭ كەلىنى. – قازاقتا كوڭىل ءشاي دەگەن بولادى. وسىنداي كۇيزەلىپ جۇرگەنىمدە وڭتۇستىك قازاقستان وبلىسىنىڭ حالقى كوڭىل شايعا شاقىرىپ, قايعىمدى جەڭىلدەتتى, ءوز-وزىمە كەلۋىمە جاردەمدەستى. سوندىقتان, حالقىمىزدىڭ سالت-داستۇرلەرىن بارىنشا ۇستايتىن, ۇلتتىڭ ۇيىتقىسىنا اينالعان وڭتۇستىكتىڭ ورنى مەن ءۇشىن قاشاندا ەرەك.
ادەمى ءازىل, جاراسىمدى سىرلاسۋمەن وتكەن كەشتە تالاي اڭگىمەنىڭ تىعىنى اعىتىلدى.
«جاقسى ۇيگە تۇسكەن كەلىن – كەلىن, جامان ۇيگە تۇسكەن كەلىن – كەلساپ». قازاقتىڭ تاعىلىمدى قاناتتى سوزدەرىنەن تۇزدىق جاساعان زەينەپ احمەتوۆا ۇلتتىق قاسيەتتى ارداقتاۋ جايىن ايتتى. سالت-ءداستۇر دەگەندە كوپشىلىكتىڭ بەسىككە سالۋ, تۇساۋ كەسۋ, بەتاشار سياقتى عۇرىپتاردى بەر جاعىنان عانا بىلەتىندىگىن مىسالعا كەلتىردى.
ۇلتتىڭ تاربيەسى – انادان. سوندىقتان دا, «انا ءبىر قولىمەن – بەسىكتى, ءبىر قولىمەن الەمدى تەربەتەدى» دەگەن ءتامسىل بار. جازۋشى زەينەپ احمەتوۆا قازاق قىزدارىنىڭ كەيبىر بەيادەپ قىلىقتارىن سىناپ, جاقسى كەلىن بولۋعا تالپىنۋدىڭ جايىن ايتتى. ء«ار قازاق كەلىنى – ەنە مەكتەبىنەن ءوتۋ كەرەك» دەگەن جازۋشى ەنەلەردىڭ وسى قاسيەتتى اتاۋعا لايىقتى بولۋىن جاقسى مىسالدارمەن ۇعىنىقتى جەتكىزدى. اسەرلى كەش جۇرەككە جاقىن سىرلاسۋعا ۇلاستى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
