كەزدەسۋدە جۋرناليست پرەزيدەنتكە «مىندەتتى الەۋمەتتىك مەديتسينالىق ساقتاندىرۋ رەفورماسى كەيىنگە شەگەرىلگەنمەن ودان جينالعان قارجى بار. ول – 6 ملرد تەڭگە شاماسىندا. حالىق بۇل قارجى بيزنەستى دامىتۋعا جۇمسالادى دەپ الاڭداپ وتىر. جالپى وسى قارجىنىڭ تاعدىرى قالاي بولماق؟» دەپ ءوز ساۋالىن جولدادى.
«مىندەتتى الەۋمەتتىك مەديتسينالىق ساقتاندىرۋ قورىنا جينالعان اقشا ەشقايدا كەتپەيدى. ءبىز مەديتسينالىق ساقتاندىرۋ دەگەن ماسەلەنى بىرتىندەپ قاراستىرامىز. سەبەبى, ول قاجەت. جالپى ءبىزدىڭ ادامدار ءوز دەنساۋلىعىن باعالامايدى. كەشە مەن ۇلتتىق عىلىمي كارديوورتالىقتىڭ باسشىسى يۋري پيامەن سويلەستىم. ول ماعان «جۇرەككە اشىق وپەراتسيا جاساۋ باتىستا 40-50 مىڭ دوللار ال جۇرەكتى اۋىستىرۋ 500 مىڭ دوللار تۇرادى» دەيدى. ونى اۋىستىرۋ ءار ادامنىڭ قولىنان كەلمەيدى عوي. ول جاقتا اقشا تولەيدى. ال ءبىزدىڭ جاقتا بارلىعى ۇكىمەت تولەسىن دەيدى. ال ەگەر مەديتسينالىق ساقتاندىرۋ قورى بولاتىن بولسا, ازاماتتار وزدەرىنىڭ دەنساۋلىعىنا جاۋاپ بەرەدى. ياعني قورعا اقشانىڭ ءبىر بولىگىن ازاماتتىڭ ءوزى, ءبىر بولىگىن جۇمىس بەرۋشىلەر, ءبىر بولىگىن مەملەكەت تولەيدى. ءۇش بولىكتەن تۇرادى. ءبىزدىڭ قازىرگى زەينەتاقى جۇيەمىزدىڭ ءوزى سونداي», - دەدى نۇرسۇلتان نازارباەۆ ءجۋرناليستىڭ سۇراعىنا.
سونىمەن قاتار مەملەكەت باسشىسى مىندەتتى الەۋمەتتىك مەديتسينالىق ساقتاندىرۋ ماسەلەسىن 3 جىلدا شەشۋ قاجەتتىگىن العا تارتتى.
«مەديتسينالىق ساقتاندىرۋعا تەزىرەك وتەمىز دەپ ويلاپ ەدىك, ساراپتاپ كەلگەندە پروبلەمالار شىقتى. قازاقستاندا قورعا اقشا تولەي المايتىن ادامدار بار ەكەن. تولەي المايتىندار ەمدەلگەن كەزدە قوردان اقشا الا المايدى. سوندىقتان ءبىز ولاردىڭ ماسەلەسىن 3 جىلدىڭ ىشىندە شەشۋىمىز قاجەت», - دەدى ول.
وسى جەردە قازاقستان پرەزيدەنتى قانداي ماسەلەنى شەشۋ قاجەتتىگىن انىق ايتتى.
«اتالعان ماسەلە ءوزىن-ءوزى جۇمىسپەن قامتىپ وتىرعان 2 ملن-نان استام ازاماتقا قاتىستى. ونى انىقتاپ قاراساق, ونىڭ جىكتەرى بار. ونىڭ 1 ملنى جۇمىس ىستەيدى. بىراق وزدەرىن جۇمىسسىزبىن دەپ ەسەپتەپ, سالىق تولەمەي وتىرادى. ونىڭ ىشىندە تۇرمەدە وتىرعاندار, كامەلەتتىك جاسقا تولماعان بالالار بار. سوندىقتان وسىنىڭ بارلىعىن شەشۋ كەرەك», - دەپ تۇيىندەدى ءسوزىن نۇرسۇلتان نازارباەۆ.
