استانا قالاسىندا 130-دان استام رەسمي قاتىسۋشىنى بىرىكتىرگەن ەكسپو-2017 كورمەسى ۇكىمەتتەر مەن ازاماتتار اراسىندا «بولاشاقتىڭ ەنەرگياسى» تاقىرىبىندا جاھاندىق ديالوگقا باستاۋ بولدى. بۇل تۋرالى حالىقارالىق كورمەلەر بيۋروسىنىڭ ارنايى كۇنى بارىسىندا حكب باس حاتشىسىنىڭ ورىنباسارى ديميتري كەركەنتزەس ايتتى. ول ءوز سوزىندە حالىقارالىق ماڭىزدى شارانى تابىستى وتكىزۋگە كومەك كورسەتكەندەرگە, سونداي-اق كورمە قوناقتارىنا العىس ءبىلدىردى.
«ەكسپو-2017 كورمەلەر تاريحىندا اسىل مۇرا قالدىرادى. وعان كەلۋشىلەر اعىمداعى جىلدىڭ جاز ايلارىندا اسەرلى ساۋلەت عيماراتتارى مەن قۇرىلىستاردى تاماشالادى. حالىقارالىق كورمەلەر بيۋروسى الداعى مامانداندىرىلعان كورمەلەرگە ەكسپو-2017 كورمەسىن ۇلگى تۇتادى. سوندىقتان وسى جيىندى ۇيىمداستىرۋشىلارعا ريزاشىلىعىمىزدى جەتكىزگىمىز كەلەدى. كورمەنىڭ ءساتتى وتكىزىلۋى – ادال ەڭبەكتىڭ ناتيجەسى», دەدى ديميتري كەركەنتزەس.
سالتاناتتى جيىندا «استانا ەكسپو-2017» ۇك» اق باسقارما توراعاسى احمەتجان ەسىموۆ حالىقارالىق شاراعا 115 مەملەكەت پەن 22 ۇيىم قاتىسقانىن ەسكە سالدى. كورمەنىڭ ءۇش اي جۇمىسى ارالىعىندا 40 مەملەكەت باسشىسى, 9 ۇكىمەت باسشىسى, 72 سىرتقى ىستەر ءمينيسترى ارنايى رەسمي ساپارمەن كەلگەن. ا.ەسىموۆ جوبانىڭ بارلىق سەرىكتەستەرىنە ەكسپو-2017 كورمەسىنىڭ دايىندىعىنا جانە ونىڭ تابىستى وتۋىنە قوسقان ۇلەستەرى ءۇشىن العىس ءبىلدىردى. «بۇل اۋقىمدى جوبا ەل ەكونوميكاسىنا وڭ اسەرىن تيگىزدى جانە شامامەن 50 000 جاڭا جۇمىس ورىندارىن اشۋعا مۇمكىندىك بەردى. كورمەلەردىڭ تاجىريبەلەرىنە جاسالعان جەتە تالداۋ بارىسىندا اتالعان جوبالار مۇرالارىنىڭ ماڭىزى زور ەكەندىگىن بايقادىق. قازىرگى كەزدە ەكسپو-دان كەيىنگى كەزەڭنىڭ باعدارلاماسى اياقتالۋعا جاقىن. كورمەنىڭ ءاربىر شارشى مەترىن الداعى ۋاقىتتا ماقساتتى قولدانۋ جونىندە ناقتى جوسپار بەكىتىلگەن. ەڭ باستىسى, 4 ميلليون كورمە قوناعى ۇمىتىلماس اسەر الدى. حالىقارالىق پاۆيلوندارعا كەلۋشىلەردىڭ سانى 30 ميلليوندى قۇرادى جانە اتالعان كورسەتكىش ءۇشىن قاتىسۋشى مەملەكەتتەر ۇسىنعان قىزىقتى كونتەنتكە العىس ايتامىن», – دەدى باسقارما توراعاسى.
حكب ارنايى كۇنىنىڭ مادەني باعدارلاماسى اياسىندا استانا, قىتاي جانە بىرىككەن اراب امىرلىگىنىڭ شىعارماشىلىق ۇجىمدارى ونەر كورسەتتى.
اسحات رايقۇل,
"ەگەمەن قازاقستان"
سۋرەتتى تۇسىرگەن ەرلان ومار,
"ەگەمەن قازاقستان"
