ءتورتىنشى رەت ۇيىمداستىرىلعان بايراقتى باسەكەگە الەمنىڭ 25 ەلىنەن 70-تەن استام سپورتشى وزدەرىنىڭ باقتارىن سىناۋدا. حالىقارالىق تۋرنير دۇنيەجۇزىلىك توعىزقۇمالاق فەدەراتسياسى, قازاقستان رەسپۋبليكاسى مادەنيەت جانە سپورت مينيسترلىگى جانە استانا قالاسى اكىمدىگىنىڭ مۇرىندىق بولۋىمەن وتكىزىلىپ جاتىر.
جارىستىڭ اشىلۋ سالتاناتىنا دۇنيەجۇزىلىك توعىزقۇمالاق فەدەراتسياسىنىڭ پرەزيدەنتى ءاليحان بايمەنوۆ, قازاقستان رەسپۋبليكاسى مادەنيەت جانە سپورت مينيسترلىگى سپورت جانە دەنەشىنىقتىرۋ ىستەرى كوميتەتىنىڭ توراعاسى ەلسيار قاناعاتوۆ قاتىسىپ, توعىزقۇمالاقشىلارعا ساتتىلىك تىلەدى.
ءاليحان بايمەنوۆتىڭ ايتۋىنشا, ەلىمىزدە توعىزقۇمالاقپەن اينالىساتىنداردىڭ قاتارى كۇن سايىن ارتىپ كەلەدى. «توعىزقۇمالاقتان الماتىدا وتكەن تۇڭعىش رەسپۋبليكالىق سايىسقا ءتورت-اق ادام قاتىسسا, بۇگىنگى كۇنى اتالعان سپورت تۇرىمەن اينالىساتىنداردىڭ سانى 200 مىڭنان اسقان. سونىڭ ىشىندە توعىز مىڭعا جۋىق سپورتشى توعىزقۇمالاقپەن كاسىبي تۇردە اينالىسىپ كەلەدى», – دەدى ول.
سونداي-اق, توعىزقۇمالاقپەن اينالىساتىن شەتەلدىك سپورتشىلاردىڭ دا قاتارى ارتىپ كەلەدى. ونىڭ دالەلى رەتىندە بيىلعى الەم بىرىنشىلىگىنە اۆستريا, كامەرۋن, پولشا جانە ۋكراينا ەلدەرىنىڭ سپورتشىلارى تۇڭعىش رەت قاتىسىپ جاتسا, اقش, گەرمانيا, ۇلىبريتانيا, وزبەكستان, قىتاي, قىرعىزستان جانە تاعى باسقا مەملەكەتتىڭ سپورتشىلارى توعىزقۇمالاقتان الەم چەمپيوناتىنا تۇراقتى تۇردە قاتىسىپ كەلەدى.
چەمپيونات ەرلەر جانە ايەلدەر اراسىندا جەكە-جەكە كلاسسيكا, راپيد, بليتس بويىنشا وتۋدە. سونداي-اق, بيىل الەم چەمپيوناتىنىڭ تاريحىندا العاش رەت جۇپتىق كوماندالىق جارىس وتكىزىلمەك. وعان ءار مەملەكەتتەن ءبىر ەر جانە ءبىر ايەل ادام قاتىسادى.
توعىزقۇمالاقتان الەم چەمپيوناتىنىڭ ماقساتى – قازاقتىڭ ۇلتتىق زياتكەرلىك ويىنىن الەمدىك دەڭگەيدە ناسيحاتتاۋ, ونىڭ بۇقارالىق سيپاتىن ارتتىرۋ جانە وسى سپورت تۇرىندەگى ەڭ ۇزدىك سپورتشىلاردى انىقتاۋ.
ايتا كەتەيىك, توعىزقۇمالاقتان تۇڭعىش الەم چەمپيوناتى 2010 جىلى ەلوردادا وتسە, ەكىنشى چەمپيونات 2012 جىلى چەحيانىڭ پاردۋبيتسە قالاسىندا ۇيىمداستىرىلعان. ال ءۇشىنشى الەم بىرىنشىلىگى 2015 جىلى الماتىدا وتكەن بولاتىن. الەم چەمپيوناتى 8 قىركۇيەككە دەيىن جالعاسادى.
ءالي بيتورە,
«ەگەمەن قازاقستان»
