تال بەسىكتەن العان تاربيەنىڭ سپورتتاعى باپكەر مەن سپورتشى اراسىنداعى قارىم-قاتىناسقا دا تىكەلەي اسەرى بار. ء بىر-بىرىنە دەگەن سىي-قۇرمەتى ارتىپ, بەرەكە-بىرلىگى جاراسقان ۇستاز بەن شاكىرتتىڭ باعىندىرماس بيىگى جوق. ال ەندى, ەكەۋىنىڭ اراسىنا سىزات تۇسسە, تابىس شىركىننىڭ قوس ات الىپ قۋساڭ دا جەتكىزبەسى بەلگىلى...
وسىدان ءبىراز ۋاقىت بۇرىن ءبىزدىڭ سپورتتا وعاش وقيعا ورىن الدى. تەننيستەن قازاقستاننىڭ ءبىرىنشى راكەتكاسى, WTA رەيتينگى بويىنشا الەمدەگى 50-ورىنداعى يۋليا پۋتينتسەۆانىڭ باپكەرى رومان كيسليانسكيدى ءدۇيىم جۇرتتىڭ كوزىنشە جەردەن الىپ, جەرگە سالعانىن عالامتوردان كورمەگەن ادام كەمدە-كەم. اقش-تىڭ نيۋ-حەيۆين قالاسىندا وتكەن ءتۋرنيردىڭ ءبىرىنشى اينالىمىندا فرانتسۋز قىزى اليزە كورنەدەن 0:3 ەسەبىمەن جەڭىلىپ جاتقان پۋتينتسەۆا باپكەرىن شاقىرىپ الىپ, «تاز اشۋىن تىرنادان الادى» دەمەكشى, جەڭىلىپ جاتقانىن جاتتىقتىرۋشىسىنان كورىپ, اۋزىنا كەلگەنىن ايتقانى شىنىندا دا جاعا ۇستاتتى. جانە مۇنداي سوراقى قىلىقتى ەلىمىزدىڭ اتىنان سىنعا ءتۇسىپ جۇرسە دە, رەسەيدەن كەلگەن تىكباقاي تەننيسشى كورسەتتى عوي دەپ ءوزىمىزدى جۇباتۋدىڭ ەش قاجەتى جوق. اينالىپ كەلگەندە, بۇل ءبارىبىر دە ءبىزدىڭ سپورتتىڭ بەدەلىنە نۇقسان كەلتىرگەن ەرسى قىلىق, ابىرويسىز ءىس بولدى.
ارينە, كەيىن دولىلىعىن دودادا كورسەتۋگە ءتيىس تەننيسشى قىز جاريا تۇردە جاتتىقتىرۋشىسىنان, جانكۇيەرلەرىنەن كەشىرىم سۇراعان بولدى. بىراق, جۇرەكتە دىق قالىپ قويدى.
وسىدان پالەنباي جىل بۇرىن سول كەزدە اتاعى دۇركىرەپ تۇرعان ءبىر بوكسشىنىڭ سپورت زالىندا باپكەرىمەن سوزگە كەلىپ قالعانىنىڭ كەزدەيسوق كۋاسى بولعان ەدىك. جاڭاعى اۋمەسەر ءوزىن بالا كۇنىنەن باعىپ-قاعىپ, بۇگىنگى بيىگىنە جەتكىزگەن ۇستازىنا بالاعات ءسوز ارالاستىرىپ, ۇرىپ جىبەرەردەي ءتونىپ-ءتونىپ كەلىپ, ءبىراز «اڭگىمە» ايتىپ تاستاعانى بار-تىن. «ەستىگەن قۇلاقتا جازىق جوق», جەرگە كىرىپ كەتە جازداپ ءبىز تۇردىق...
قازىر عوي, سول بوكسشى ءوزى دە شاكىرت باپتاپ جۇرگەن جاتتىقتىرۋشى. بىراق, بىرنەشە جىلدىڭ مۇعدارى بولدى, قانشا جەردەن مونشاقتاپ تەر توكسە دە ءبىر دە ءبىر شاكىرتىنىڭ جەتىستىككە جەتكەنىن كورمەدىك. ء تىپتى دارىندى دەگەن كەيبىر شاكىرتتەرىنىڭ باسقا باپكەرلەرگە «قاشىپ» كەتىپ, مۇنىڭ جاتتىعۋ كەزىندەگى وسپادار قىلىقتارىن جۇرتقا ايتىپ جۇرگەنىن دە قۇلاق شالعان. مىنە, العاشقى باپكەرىن, ۇستازىن سىيلاماعاننىڭ بۇگىنگى كەيپى وسىنداي. «اتاڭا نە قىلساڭ, الدىڭا سول كەلەدى» دەگەننىڭ كەبى وسى بولار...
وسىنداي جايتتارعا قاراپ وتىرىپ, «ۇيادا نە كورسەڭ, ۇشقاندا سونى ىلەسىڭ» دەگەن اتام قازاقتىڭ اتالى سوزىنە تاعى ءبىر مارتە ءتانتى بولاسىڭ. راس, جوعارىداعى ەكى جاعدايدىڭ دا تامىرى تۇپتەپ كەلگەندە تاربيەدە جاتىر-اۋ. باپكەرىن بەتتەن العان شاكىرتتەن, اتا-اناسىن سىيلاماعان بالادان ءتۇپتىڭ تۇبىندە ۇلتىن سۇيمەيتىن ۇرپاق ءوسىپ شىعاتىنىنا كۇماندانۋدىڭ دا قاجەتى جوق.
قازىر كوپتەگەن اتا-انالار مەكتەپكە, ال مەكتەپتەگىلەر اتا-اناعا سەنىپ, ەكى ورتادا بالا بەتىمەن كەتەدى. تاعى ءبىر جاعدايدا, اتا-انالار بالاسىن قورعاپ شىعا كەلەدى. باياعىدا مەكتەپكە جەتەلەپ اپارعان اكە-شەشەمىز مۇعالىمگە «ەتى سەنىكى, سۇيەگى مەنىكى» دەگەن جالعىز اۋىز ءسوز ايتۋشى ەدى. ال قازىرگى بالالاردى ءتۇرتىپ قالماق تۇگىل, داۋىسىن كوتەرگەن مۇعالىمدى اتا-انا سوتقا سۇيرەيدى. ءتىپتى, وقۋشىنىڭ مۇعالىمگە تاپ بەرىپ, ساباپ تاستاعان وقيعالارى عالامتوردا ۇيرەنشىكتى كورىنىسكە اينالعان. سۇمدىق!
جوعارىداعى ۇستاز بەن شاكىرت اراسىنداعى قارىم-قاتىناسقا قايتا ورالايىقشى. باپكەرىن اكەسىندەي سىيلاعان سپورتشىلاردىڭ الەمدىك دەڭگەيدەگى دودالاردا ايدىك تابىستارعا قول جەتكىزگەنىن تالاي كوردىك. سونىڭ جارقىن مىسالىنىڭ ءبىرى – لوندون وليمپياداسىنىڭ چەمپيونى سەرىك ساپيەۆ. ءبىر عانا مىسال, وسى سەرىك 2007 جىلى الەمنىڭ ەكى دۇركىن چەمپيونى بولىپ قاراعاندىعا ورالعان كەزدە وزىنە سىيعا تارتىلعان پاتەردى باپكەرى الەكساندر سترەلنيكوۆكە بەرگەنى ەستە. ءبىر عانا بۇل ەمەس, چەمپيون تالاي جەردە الدىمەن ۇستازىن تورگە شىعارىپ, تورەدەي كۇتەتىن. مىنە, وسىنداي ىزەتتى ءىلتيپات, بەرىك ۇستانىم سەرىك ساپيەۆتەي بىلعارى قولعاپ شەبەرىن قازاق سپورتىنىڭ ءىرى تۇلعاسىنا اينالدىردى ەمەس پە؟!
ءيا, ۇستازىن سىيلاماعان ۇياتقا قالدىرادى. ال ۇستازىن ۇلىق كورىپ, ءپىر تۇتقاننىڭ ۇپايى عانا تۇگەل بولمايدى, وسكەلەڭ ۇرپاق الدىنداعى ۇلگى تۇتارلىق تۇلعاسى دا زورايا بەرمەك!
قايرات ءابىلدا,
«ەگەمەن قازاقستان»
