ۆەتنام مادەنيەت, سپورت جانە تۋريزم ءمينيسترى نگۋەن نگوك تحەننىڭ ايتۋىنشا, ۆەتنامدا كۇن, جەل ەنەرگياسى جانە بيوماسسا ەلدەدى ۇلتتىق ەنەرگيانى دامىتۋ باس جوسپارىنا ەنگىزىلگەن. 2015 جىلى ۆەتنام ۇكىمەتى ەلدىڭ 2030 جانە 2050 جىلعا قاراي جاڭارتىلاتىن ەنەرگيانىڭ دامۋ ستراتەگياسىن جاريالادى.
«قازاقستاندى «بولاشاق ەنەرگياسى» تاقىرىبىنداعى ەكسپو-2017 حالىقارالىق مامانداندىرىلعان كورمەسىن ءساتتى وتكىزۋىمەن قۇتتىقتايمىن. ۆەتنام سوتسياليستىك رەسپۋبليكاسى - استانا قالاسىنداعى كورمەگە قاتىسۋىن راستاعان العاشقى مەملەكەتتەردىڭ ءبىرى. پاۆيلوننىڭ تاقىرىبى: ء«داستۇرلى جانە زاماناۋي ەنەرگەتيكا قوسىلىسى– ۆەتنامنىڭ بولاشاق ەنەرگياسى». مەملەكەت پاۆيلونى تازا ەنەرگيا كوزدەرىنە نەگىزدەلگەن, سونداي-اق ءداستۇر مەن ەرەكشە مادەني قۇندىلىقتاردى سيپاتتايدى», - دەدى نگۋەن نگوك تحەن.
ءوز كەزەگىندە ءماجىلىس توراعاسىنىڭ ورىنباسارى ۆلاديمير بوجكو ۆەتنامنىڭ ەكسپوزيتسياسى ەكسپو-2017 كورمەسىندەگى ەڭ قىزىقتى پاۆيلونداردىڭ ءبىرى ەكەندىگىن اتاپ ءوتتى.
«ۆەتنام سوتسياليستىك رەسپۋبليكاسىنىڭ ۇلتتىق پاۆيلونى كورمەگە كەلۋشىلەردىڭ نازارىن اۋداراتىندىعى ءمالىم. ستاتيستيكا بويىنشا سوڭعى جىلدارى مەملەكەت وزىق يننوۆاتسيالاردى ءتيىمدى ەنگىزۋ ارقىلى ازياداعى ەكونوميكاسى قارقىندى دامىعان ەلدەر قاتارىنان ورىن الدى. ۆەتنام ۇكىمەتى ۇلتتىق ەنەرگەتيكالىق جۇيەنى, اسىرەسە جاڭارتىلاتىن ەنەرگيانىڭ بالامالى كوزدەرىن دامىتۋعا ەرەكشە نازار اۋدارادى»,- دەپ قورىتىندىلادى ءماجىلىس توراعاسىنىڭ ورىنباسارى.
ۆەتنام سوتسياليستىك رەسپۋبليكاسى - ازيانىڭ وڭتۇستىك-شىعىسىندا, سونداي-اق ۇندىقىتاي تۇبەگىنىڭ شىعىس بولىگىندە ورنالاسقان جانە كوركەم تابيعاتى, كونە عيباداتحانا كەشەندەرى جانە مادەني مۇراسىمەن بەلگىلى. دۇنيەجۇزىلىك بانك ەسەبىندە ۆەتنامنىڭ سۋ ەنەرگەتيكالىق الەۋەتىن دامىتۋ تۇرعىسىنان الەمدەگى جەتەكشى 14 ەل قاتارىندا ەكەندىگى ەسكەرىلگەن. سونداي-اق, ۆەتنامنىڭ جەل ەنەرگياسىن ءوندىرۋ جانە كۇن ەنەرگياسىن پايدالانۋ مۇمكىندىگى زور.
