جەرلەسىمىز 175,7 شاقىرىمعا سوزىلعان جارىس جولىن 4 ساعات 24 مينۋت جانە 58 سەكۋندتا باعىندىردى. ەكىنشى بولىپ مارە سىزىعىن «Dimension Data» كومانداسىنىڭ وكىلى ەريترەي مەرحاۆي قيىپ ءوتتى. ول لۋتسەنكودان 42 سەكۋندقا قالىپ قويدى. ال قولا جۇلدەنى يسپاندىق ۆەلوشاباندوز مارك سولەر («Movistar», +0.56) جەڭىپ الدى.
الەم چەمپيونى الەكسەي لۋتسەنكو قازىر 24 جاستا. بۇل جەڭىس – ۆەلوشاباندوزدىڭ گراند-تۋر كەزەڭىندەگى قول جەتكىزگەن ەڭ العاشقى تولايىم تابىسى.
جالپى ەسەپتە, الەكسەي لۋتسەنكو ازىرگە +18:43 ۋاقىتپەن 78-ورىندا كەلەدى. ال كوپكۇندىكتە ۇلىبريتانيا ۆەلوشاباندوزى, «Sky» كومانداسىنىڭ مۇشەسى كريس فرۋم كوش باستاپ تۇر. ونىڭ ناتيجەسى – 18:07:10. «استانا» كومانداسىنىڭ كوشباسشىسى فابيو ارۋ بولسا, +0:49 ۋاقىتپەن جەتىنشى ورىنعا تابان تىرەگەن.
جالپى, «يسپانيا ۆۋەلتاسى» كوپكۇندىگى ءۇش اپتاعا سوزىلاتىن تۋر دە فرانس جانە دجيرو د’يتاليا سىندى ايگىلى ۆەلوبايگەلەرىمەن دەڭگەيلەس جارىس.
ەسكە سالساق, 2006 جىلى ءبىزدىڭ اتاقتى جەرلەسىمىز, لوندون-2012 وليمپياداسىنىڭ چەمپيونى الەكساندر ۆينوكۋروۆ بۇل تۋرنيردە جەڭىمپاز بولعان.
قايرات جۇنىس ۇلى,
«ەگەمەن قازاقستان»
