اقپارات جانە كوممۋنيكاتسيا ءمينيسترى داۋرەن اباەۆ جاڭا ماۋسىم اياسىندا «قازاقستان» كورپوراتسياسىنا ەنەتىن بارلىق رەسۋرستارعا قاتىستى جاسالعان رەبرەندينگتىڭ ايتارلىقتاي جاڭا قادام ەكەنىن اتاپ ءوتىپ, ۇجىم قىزمەتىنە ساتتىلىك تىلەدى. ءمينيستردىڭ ايتۋىنشا, الداعى ەكى-ءۇش جىلدىڭ ىشىندە انالوگتىك حابار تاراتۋدا تولىعىمەن تسيفرلى جۇيەگە كوشۋ, سپۋتنيك جەلىسى ارقىلى تەلەاۋديتوريانى ارتتىرۋ, وتاندىق تەلەسەريال ءونىمىن كوبەيتۋ – وتاندىق تەلەارنالاردىڭ باستى مىندەتى.
جاڭا ماۋسىمداعى جاڭعىرۋ تۋرالى «قازاقستان» رترك باسقارما توراعاسى ەرلان قارين اڭگىمەلەدى. كورپوراتسيا جەتەكشىسىنىڭ ايتۋىنشا, رەبرەندينگ بارىسىندا «قازاقستان» رترك مەديا اكتيۆتەرىنە ورتاق, تانىمال لوگوتيپ بەكىتىلىپ, رەنەيمينگ, رەديزاين جۇمىستارى جۇرگىزىلدى. جاڭا لوگوتيپتى قابىلداۋ بارىسىندا كوپتەگەن الەمدىك تەلەارنالارداعى ۇردىستەر سارالانىپ, زاماناۋي ترەندتەر ەسكەرىلدى. سونداي-اق گرافيكالىق-ەستەتيكالىق ەرەكشەلىكتەردى نازارعا الا وتىرىپ, كورپوراتسيا قۇرامىنداعى ارنالار مەن راديوستانسالاردىڭ بىرتۇتاستىعىن بىلدىرەتىن ارنايى بەلگى رەتىندە ەلىمىزدىڭ مەملەكەتتىك تۋىنىڭ ءتۇسى نەگىزگە الىندى. بۇدان بىلاي «قازاقستان» ۇلتتىق ارناسى, «قازسپورت», «بالاپان» ارنالارىنىڭ لوگوتيپتەرى ءبىر نەگىزدە ءارى لاتىنشا جازىلماق. بۇل كورپوراتسيانىڭ تەحنولوگيالىق دامۋعا ۇمتىلىسىن, حالىقارالىق مەديانارىقتاعى ورنىن, ۇلكەن مەدياوتباسى رەسۋرستارىنىڭ ساباقتاستىعىن بىلدىرەدى, دەپ ءتۇسىندىردى كورپوراتسيا جەتەكشىسى. لوگوتيپ جوباسىن تانىمال قازاقستاندىق رەجيسسەر جانە ديزاينەر ساكەن جولداس دايىنداعان ەكەن.
سونداي-اق كورپوراتسيا قۇرامىنا ەنەتىن 14 ايماقتىق ارنالاردىڭ اتاۋلارى دا وزگەرتىلمەك. بۇرىنعى «قازاقستان – اقتاۋ», «قازاقستان – شىمكەنت», «قازاقستان – قاراعاندى» سياقتى اتاۋلاردىڭ ورنىنا ەندى جەكەلەگەن, سول ايماققا ۇيرەنشىكتى اتاۋلار ەنگىزىلەتىن بولادى. مىسالى, Altay, Mangystau, Ontustik, Saryarqa, Aqjaiyq, Atyrau دەپ اتالاتىن بولدى. ۇلتتىق سانانى جاڭعىرتۋ جونىندەگى ەلباسى تاپسىرماسىنا وراي جاسالعان بۇل وزگەرتۋلەر ايماقتىق ارنالارعا ىشكى تەلەنارىقتا دەربەس جۇمىس جۇرگىزۋگە جانە اۋديتوريانىڭ كەڭەيۋىنە باعىتتالعان.
ودان بولەك تەلەارنالاردىڭ گرافيكالىق بەزەندىرىلۋى, مۋزىكالىق-توپتامالارى جانە «قازاقستان» ۇلتتىق ارناسىنىڭ رەسمي داۋىسى دا وزگەردى. جالپى, رەبرەندينگتىڭ باستى ماقساتى – كورپوراتسيانىڭ بارلىق مەديا اكتيۆتەرىنە ءتان, ۇلتتىق ءداستۇردى ايگىلەيتىن, كورپوراتسيانىڭ جاڭا الەمدىك ستاندارتتارعا تالپىنىسىن كورسەتەتىن ءبىرتۇتاس تانىمال بەلگى قۇرۋ.
ەلىمىزدىڭ كورىكتى تابيعات ورىندارىن ناسيحاتتاۋ ماقساتىندا گرافيكالىق ID روليكتەر تارتىمدى شىققانىن ايتا كەتۋ كەرەك. جارناما روليكتەرىنىڭ بەزەندىرىلۋى دە ماۋسىمدىق ەرەكشەلىكتەرگە نەگىزدەلگەن. سونىمەن بىرگە اڭداتپا, جاڭالىقتار توپتاماسى, اۋا رايى ىسپەتتى كۇندەلىكتى ەفيرلەردىڭ بەزەندىرىلۋىندە, داۋىس, اۋەن مەن مۋزىكالىق كوركەمدەلۋىندە دە وزگەشەلىك بار. ساۋند-ترەكتەردى دايىنداعان بەلگىلى كومپوزيتور ارمان مۇقاتاي.
جاڭا ماۋسىمدا «قازاقستان» ۇلتتىق ارناسى كورەرمەندەرىن ءتۇرلى باعىتتاعى جوبالارىمەن قۋانتپاق. اتاپ ايتقانا, جىبەك جولى بويىنداعى ەلدەردىڭ جاس تالانتتارىنىڭ باسىن قوساتىن «جىبەك جولى جۇلدىزى», ءتول ونەردى ۇلىقتايتىن «مەن قازاقپىن» حالىقارالىق مۋزىكالىق مەگاجوبالارى, ۇلتتىق ەسترادانى ناسيحاتتايتىن «Hit Qazaqstan» مۋزىكالىق ءان-شەرۋى جاڭا ماۋسىمدا ەفيرگە ەنسە, ويىن-ساۋىقتىق باعدارلامالارعا قوسا قوعامدىق, ينتەللەكتۋالدىق باعىتتاعى باعدارلامالاردىڭ دا سانى ارتادى. بۇگىنگى زاماننىڭ سۇرانىسىنا ساي كەلەتىن رەاليتي-شوۋ جانرىنداعى باعدارلامالار كورسەتىلەدى. كاسىپكەرلىكتى ناسيحاتتايتىن «ۇمىتكەر», تابيعاتتىڭ تىلسىم كۇشى مەن قۇدىرەتىن كورسەتەتىن «24 ساعات تابيعات قۇشاعىندا» ەكشن رەاليتي-شوۋى, وتانىمىزدىڭ كورىكتى جەرلەرىن تانىستىراتىن «ەل ىشىندە», وتباسىلىق قۇندىلىقتاردى دارىپتەيتىن «ەنە مەن كەلىن», جاس ۇرپاققا ءتالىم-تاربيە بەرەتىن «ارۋ انا», ءتۇرلى ماماندىقتىڭ سىرى مەن قىرىن كورسەتەتىن «سەنىڭ ورنىڭدا» سىندى الەۋمەتتىك, رۋحاني, قوعامدىق باعدارلامالار قاتارى كوبەيەدى.
سونىمەن قاتار, ەفيردەن بىرقاتار دەرەكتى فيلمدەر توپتاماسى دا ورىن الادى. ونىڭ ىشىندە, قازاقستاننىڭ كوپشىلىككە بەيمالىم تاريحى تۋرالى اڭگىمەلەيتىن «كيەلى قازاقستان», ەلىمىزدىڭ ايگىلى ادامدارى جايلى سىر شەرتەتىن « ۇلى دالا ۇلاعاتى», اقتاڭداقتار تاريحى تۋرالى «الاشتىڭ اماناتى» ءوز كورەرمەنىن تاپپاق. سونداي-اق «قازاقستان» تەلەارناسىنىڭ سەريالدارى جىلدان جىلعا كوبەيىپ كەلە جاتقانىن, اتالعان ونىمدەر كورشى ەلدەردىڭ تەلەنارىعىندا سۇرانىسقا يە بولا باستاعانىن ايتا كەتكەن ءلازىم. 2009 جىلدان بەرى تەلەارنا الۋان تاقىرىپتى قامتيتىن 77 تەلەحيكايا ۇسىنعان ەكەن. بيىل ۇلتقا دەگەن ۇلى ماحاببات ء«ومىر داستانى» تاريحي دراماسىندا, تىگىنشى قىزدىڭ ءومىرىن بەينەلەيتىن «ىڭكار جۇرەك» تەلەحيكاياسىنىڭ ەكىنشى ماۋسىمى, ىزگىلىك پەن مانساپ تارازىعا تۇسكەن «ەكى ءجۇز», ءومىردىڭ وكتەمدىگىنە مويىماعان «انا قادىرى», ءتۇرلى ۇلت پەن ۇلىسقا مەكەن بولعان «تۋعان جەر», استارلى ءازىل ارقىلى ماعىنالى وي ايتا بىلگەن «جاڭا قونىستىڭ» ەكىنشى ماۋسىمى, شىنايى ماحاببات جولىنداعى تارتىستار كۋاسى «قوزى كورپەش-بايان سۇلۋ», سەنىم مەن ءۇمىتتى ارقاۋ ەتكەن «ساعان سەنەمىن» سياقتى كورەرمەندەر سۇرانىسىنا يە سەريالدار كوشى جالعاسىن تابا بەرمەك.
رەبرەندينگ اياسىندا بۇرىنعى باعدارلامالاردىڭ دا فورماتى وزگەرەدى. 28 تامىزدان باستاپ «قازاقستان» ۇلتتىق ارناسى «Alma TV», «ID TV» سياقتى ەلدەگى ءىرى كابەلدىك وپەراتورلار ارقىلى HD فورماتتا حابار تاراتاتىن بولادى.
ال وتاندىق تەلەكەڭىستىكتەگى تۇڭعىش سپورت ارناسى سانالاتىن «قازسپورت» بيىلعى كۇزدە ەلىمىزدەگى ەڭ تانىمال سپورت تۇرلەرىنەن, اسىرەسە, كۇرەس, بوكس جانە دزيۋدودان وتەتىن الەم چەمپيوناتتارىنان ترانسلياتسيا جاسايدى. UEFA چەمپيوندار ليگاسى مەن ەۋروپا ليگاسىنان, ونىڭ ىشىندە «استانا» كلۋبىنىڭ ەۋروكۋبوكتاعى بارلىق كەزدەسۋىنەن جانە باسقا دا ءىرى سپورتتىق جارىستاردان كورسەتىلىم, كاسىبي سپورتشىلاردىڭ ءومىرى تۋرالى دەرەكتى فيلمدەر مەن ارنايى رەپورتاجدار, ءدۇبىرلى دودا ورتاسىنان بەرىلەتىن «ماتچ قارساڭىندا», «ماتچتان كەيىن» باعدارلامالارى جانە باسقا دا جوبالار مەن تەلەويىندار ەفيرگە شىعادى.
12 جاسقا دەيىنگى كورەرمەندەر اۋديتورياسىن قامتيتىن, ەلىمىزدەگى العاشقى بالالار ارناسى «بالاپان» كەلەشەك ۇرپاقتىڭ كوكجيەگىن كەڭەيتۋدە, قارىم-قابىلەتىن ارتتىرۋدا, وتانشىلدىققا تاربيەلەۋدە ماڭىزى زور باعدارلامالاردى جارىققا شىعارىپ كەلەدى. بالالارعا باستى بازارلىق رەتىندە بيىل بۇل ارنادا «قالقانقۇلاق» اتتى تۇڭعىش قيال-عاجايىپ جانرىنداعى بالالار تەلەحيكاياسى, «ساياحات» رەاليتي-شوۋى, «الان مەن قوزىقا» انيماتسيالىق ءفيلمى, «بالاپان جۇلدىز» شوۋ-كونتسەرتى جارىققا شىعاتىنىن ايتۋعا بولادى.
كورپوراتسيا قۇرامىنداعى «قازاق», «شالقار», «استانا» جانە «كلاسسيك» راديو جەلىلەرى ەنەتىن «قازاق راديولارى» كومپانياسىنىڭ دا جاڭالىقتارى جەتەرلىك. اۋە تولقىنىندا «كەزەڭ», «الاشناما», «الەم ادەبيەتى», «قاۋىرسىن قالام», «ايتىس», «جىر-كەرۋەن», «الداسپان», «سارباز», «اق وتاۋ» جانە باسقا دا كوپتەگەن رۋحاني باعدارلامالاردى شىعارىپ كەلە جاتقان راديولاردىڭ جەتەكشىسى م.ماناتبەكتىڭ ايتۋىنشا, ەندى راديونى پلانشەت, كومپيۋتەر, سمارتفون سياقتى قۇرىلعىلار ارقىلى دا تىڭداۋعا بولادى. راديو ۇجىمى «جان جىلۋى» باعدارلاماسى ارقىلى قالتالى ازاماتتار مەن مۇقتاج جاندار اراسىندا دانەكەر بولىپ, كوپتەگەن قايىرىمدىلىق ىستەردى اتقارىپ كەلەدى. سونداي-اق ء«ۇي تاپسىرماسى» اتتى جاڭا باعدارلاما ارقىلى وقۋشىلار كۇندەلىكتى ساباققا ازىرلەنە الادى.
تاريحى العاش رەت 1958 جىلدىڭ 8 ناۋرىزىندا الماتى ستۋدياسىندا ەفيرگە شىققان قازاق تەلەۆيزياسىنان باستاۋ الاتىن «قازاقستان» تەلەراديوكورپوراتسياسى بۇگىندە 3 رەسپۋبليكالىق, 14 ايماقتىق تەلەارنا, 4 راديو, 36 ينتەرنەت-سايتتىڭ باسىن قوسقان, ەلىمىزدىڭ اقپارات الامانىندا قورعاسىنداي سالماعى بار مەديارەسۋرس. 60 جىلدىق قارساڭىنداعى بيىلعى وزگەرىستەردىڭ مەملەكەت باسشىسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» ماقالاسىنداعى مىندەتتەر مەن تاپسىرمالار اياسىنان تابىلاتىنىن جەتكىزگەن كورپوراتسيا جەتەكشىسى ە.قارين الەمدەگى وزگەرىستەرگە ىلەسىپ كەلە جاتقان ەلىمىزدىڭ تىنىس-تىرشىلىگىن جەتكىزۋدە الدىمەن تەلەارنانىڭ ءوزى وزگەرە ءبىلۋى كەرەكتىگىن ايتا كەلىپ: بۇگىنگى ۇرپاققا قانداي دۇنيە كورسەتسەك, ەرتەڭ سونداي قوعام قالىپتاسادى. سوندىقتان, تەلەۆيزيا جاڭا قوعامدىق قۇندىلىقتاردى, زور تالعامدى قالىپتاستىرۋدا قىزمەت ەتىپ, ينتەلەكتۋالدى ۇرپاقتىڭ وسۋىنە ىقپال ەتۋى كەرەك. ءبىز ەلىمىزدىڭ كيەلى اتاۋىن يەلەنگەن بىردەن-ءبىر ۇجىمبىز. بۇل ءبىز ءۇشىن ەرەكشە ماقتانىش ءارى جاۋاپكەرشىلىك, دەدى.
دۋمان اناش,
«ەگەمەن قازاقستان»
