بۇگىنگى تاڭدا وبلىستا ەگىن ورۋ ناۋقانى, ماساقتى ءداندى داقىلدار ءونىمىن جيناۋ جۇمىستارى اياقتالۋعا جاقىن. وبلىس اكىمدىگىنىڭ مالىمەتى بويىنشا, وسى ۋاقىتقا دەيىن ەگىن القاپتارىنان 542,2 توننا استىق جيناقتالىپ, ءوڭىر بويىنشا ورتاشا ونىمدىلىك كورسەتكىشى گەكتارىنا 23,1 تسەنتنەردى قۇراپ وتىر. بيىلعى جىلى وبلىس بويىنشا اۋىلشارۋاشىلىق داقىلدارىنىڭ ەگىستىك القابى 623,3 مىڭ گەكتارعا دەيىن جەتىپ, بىلتىرعى جىلدىڭ وسى مەزگىلىمەن سالىستىرعاندا 29,8 مىڭ گەكتارعا ارتقاندىعىن ايتۋعا بولادى. ەسەپتى ارالىقتا ەگىن ورۋ ناۋقانى بايزاق, جامبىل, مويىنقۇم, سارىسۋ جانە تالاس اۋداندارىندا تولىق اياقتالدى. ال قالعان اۋدانداردا جالعاسۋ ۇستىندە.
– بيىلعى جىلى ماساقتى ءداندى داقىلدار 257 مىڭ 867 گەكتارعا ورنالاستىرىلدى. قازىرگى تاڭدا 247 مىڭ 660 گەكتار جەر ورىلىپ ءبىتتى. ناقتى كورسەتكىش بويىنشا 96 پايىز جينالدى. سونىمەن قاتار, شارۋالار جاڭا تەحنيكامەن دە قامتاماسىز ەتىلدى. ماسەلەن, مەركى اۋدانىنا − 7, ال ت.رىسقۇلوۆ اۋدانىنا 13 تەحنيكا الىندى. سونداي-اق, وڭىردە قانت قىزىلشاسىن ەگۋ دە قارقىندى قولعا الىنىپ كەلەدى. ايتالىق, وتكەن جىلى مەركى قانت زاۋىتىنا 100 مىڭ توننا قانت وتكىزسەك, بيىل بۇل كورسەتكىشتى 170-180 مىڭ تونناعا دەيىن ۇلعايتۋ جوسپاردا بار, – دەيدى جامبىل وبلىسى اكىمىنىڭ ورىنباسارى مادەن مۇساەۆ.
ال اعىمداعى جىلى قورداي جانە ت.رىسقۇلوۆ اۋداندارىندا استىق جيناۋ ناۋقانىنىڭ جەمىستى ماۋسىمى بىلتىرعىدان بولەك بولىپ وتىر. وندا گەكتارىنان 23,5 تسەنتنەردەن استام استىق ءونىمىنىڭ الىنعانى دا وڭىردەگى ناۋقاننىڭ قىزا تۇسكەنىن كورسەتەدى. سونداي-اق, ەگىن ورۋ ناۋقانىندا كوشباسشى اۋدانداردىڭ قاتارىن مەركى جانە شۋ اۋداندارى باستاپ تۇر. ال ەگىن جيناۋ جۇمىستارىنا وبلىس بويىنشا بارلىعى 911 استىق ورۋ كومباينىنىڭ 701-ءى قاتىسۋدا. بۇل رەتتە جەر يگەرۋ ماسەلەسىنىڭ وڭ شەشىم تاپقانىن كورۋگە بولادى. ال ۇكىمەت تاراپىنان اۋىلشارۋاشىلىق تاۋار وندىرۋشىلەرىن قولداۋ ماقساتىندا جازعى-كۇزگى دالا جۇمىستارىنا 15,0 مىڭ توننا ارزانداتىلعان ديزەل وتىنى ءبولىنىپ, بۇل تۇرعىدا بارلىق مۇمكىندىك قاراستىرىلعانىن ايتا كەتۋ كەرەك. شىلدە ايىنا بولىنگەن جانارماي كولەمىنىڭ 4965 تونناسى جەتكىزىلىپ, اۋىلشارۋاشىلىق تاۋار وندىرۋشىلەرىنە 2115 توننادان استامى تاراتىلعان. سونداي-اق, جانارماي قويمالارىندا 2850 تونناعا جاقىن ديزەل وتىنى ساقتالۋدا. تاعى ءبىر ايتا كەتەرلىگى, وبلىس بويىنشا ەگىن وراعى جانە كۇزگى دالا جۇمىستارى ءوز دەڭگەيىندە جانە جوسپارلى تۇردە جۇرگىزىلىپ كەلەدى.
حاميت ەسامان,
«ەگەمەن قازاقستان»
جامبىل وبلىسى
