- ۆلاديمير اندرەەۆيچ, چەرنوگوريا جانە فرانتسيا جاستار قۇرامالارىنا قارسى دايىندىق تۋرالى پىكىر بىلدىرسەڭىز.
- تامىز ايىندا ىشكى چەمپيوناتتاعى ءۇزىلىستى پايدالانىپ, تالعاردا قىسقا مەرزىمدى وقۋ-جاتتىعۋ جيىنىن وتكىزدىك. جاتتىعۋ جيىنى كوماندا ءۇشىن وتە ماڭىزدى. قىركۇيەك ايىندا چەرنوگوريا جانە فرانتسيا قۇرامالارىمەن وتكىزەتىن ويىن الدىندا فۋتبولشىلاردىڭ كۇشىن سىناپ كورەتىن سوڭعى سىناق بولدى.
- جارتىلاي قورعاۋشى, كوماندا كاپيتانى ديدار جالمۇقاننىڭ ويىنىنا توقتالىپ وتسەڭىز؟
- سوڭعى وقۋ-جاتتىعۋ جيىنىندا ىرىكتەۋ ويىندارىندا ءۇمىت ارتاتىن نەگىزگى فۋتبولشىلاردىڭ بارلىعىن جينادىق. ديدار جالمۇقان ءبىزدىڭ ويىنىمىزدىڭ نەگىزگى تىرەگى سانالادى. ول بارلىق شابۋىلعا بەلسەنە ارالاسادى. جاستار قۇراماسىنىڭ ساپىندا ءوزىن جاقسى جاعىنان كورسەتەدى دەپ ۇمىتتەنەمىز.
- قارسىلاسىمىز چەرنوگوريا قۇراماسى تۋرالى قانداي ويداسىز؟
- ىرىكتەۋ كەزەڭىندە ءبىز ءۇشىن ءالسىز قارسىلاس جوق. 2019 جىلعى ەۋروپا چەمپيوناتىنىڭ ىرىكتەۋ كەزەڭىندە بىزگە قارسى وينايتىن بارلىق كوماندانىڭ شەبەر ويىنشىلارى بار. چەرنوگوريا مەن فرانتسيا قۇرامالارىنداعى فۋتبولشىلاردىڭ جەكەلەي شەبەرلىگى مىقتى. ءال بىز كوماندالىق ويىن مەن تاكتيكاعا باسا نازار اۋدارامىز. فۋتبولشىلاردان جانكەشتىلىك تالاپ ەتىلەدى.
- چەرنوگوريا قۇراماسىنا قارسى ماتچ اقتوبەدە وتەدى. بۇل قالانىڭ فۋتبول تاريحىندا ءسىزدىڭ ەڭبەگىڭىز دە جازىلعان. جانكۇيەرلەردىڭ قولداۋى وسى ويىنعا اسەر ەتە مە؟
- قازاقستان جاستار قۇراماسىنىڭ ويىنىنا جانكۇيەرلەردىڭ كوپ جينالعانىن قالايمىن. اقتوبەدە فۋتبولدى قالاي جاقسى كورەتىنىن, ءوز كومانداسىنا قالاي قولداۋ كورسەتەتىنى بارىنە ايان. ءبىزدىڭ ويىنشىلارعا جانكۇيەرلەردىڭ قولداۋى ۇلكەن كۇش بەرەدى. اقتوبەدەگى قوبىلاندى باتىر اتىنداعى ورتالىق ستاديوننىڭ اتموسفەراسى ۇلكەن كومەك بولادى دەپ سەنەمىن.
