وبالى نەشىك, ەلوردانىڭ فۋتبولشىلارى «سەلتيك پارك» ستاديونىنا جيىلعان 50 مىڭنان استام كورەرمەننىڭ ەستى شىعارعان قيقۋىنا قاراماستان, ماتچتىڭ 30-مينۋتىنا دەيىن الاڭ يەلەرىمەن تەرەزەسى تەڭ وينادى. ءتىپتى, قاقپاعا قاراي باعىتتالعان دوپ سانى جاعىنان دا باسىمدىق بىلىنبەدى. بىراق, «استانانىڭ» قاۋقارى وسىعان عانا جەتكەن ەدى. ماتچتىڭ 32-مينۋتىندا «سەلتيكتىڭ» جارتىلاي قورعاۋشىسى روگيچتىڭ وڭ قاناتتان تەپكەن دوبىن كەرى قايتارامىن دەگەن ەۆگەني پوستنيكوۆ ءوز قاقپاسىنا تۋرا باعىتتادى. مىنە, وسىدان كەيىن-اق «استانانىڭ» قورعانىسى كوبەسىنەن سوگىلدى دە جۇرە بەردى.
ارادا ون مينۋتتاي ۋاقىت وتكەندە تاياۋدا عانا ەلوردا كلۋبىنىڭ قاتارىنا قوسىلعان لەگيونەر لاسلو كلياينحايسلەردىڭ ورەسكەل قاتەلىگىن شەبەر پايدالانعان سكوتت سينكلەر قاقپاشى موكيندى قاپى قالدىردى. ءسويتىپ, ءبىرىنشى تايم بىتكەندە تابلوداعى ەسەپ 2:0 بولىپ جانىپ تۇردى...
ۇزىلىستەن كەيىن الاڭ يەلەرى شابۋىلدى ءۇستى-ۇستىنە ۇدەتە ءتۇستى. «استانا» بولسا, ابدىراپ قالعان. بەي-بەرەكەت جۇگىرىس, ويىنشىلار اراسىنداعى بايلانىستىڭ نازىك ءجىبى بىرت-بىرت ۇزىلگەن. مىقتى قارسىلاستىڭ مىسى باسسا كەرەك, ءبىزدىڭ فۋتبولشىلار اياقتارىن ماتاپ تاستاعانداي شاراسىز كۇيگە ءتۇستى دە قالدى...
كوپ ۇزاماي سينكلەر ءوزىنىڭ وسى ويىنداعى ەكىنشى گولىن سوقتى. باسقا بولسا وسى ەسەپتىڭ وزىنە توقمەيىلسىپ, بوسقا تەر توكپەس تە مە ەدى؟ بىراق, «سەلتيك» جالپاقشەشەي كلۋب ەمەس. تابلوداعى ەسەپ 3:0 بولىپ تۇرسا دا ورشەلەنە العا ۇمتىلدى. سونداعىسى – قارىمتا ماتچتا قارسىلىق كورسەتۋگە قاۋقارى قالماسىن دەگەن قارەكەت قوي!
الاڭدا تولىعىمەن ۇستەمدىك قۇرعان «سەلتيك» اياسىن با, سول ارىنمەن بارىپ تاعى دا ەكى گول سوقتى. بۇل جولى كەلتتىكتەر ساپىنان فوررەست (79) مەرگەندىگىمەن كوزگە تۇسسە, ماتچتىڭ 88-مينۋتىندا گريففيتستىڭ تەپكەن دوبى يگور ءشيتوۆتىڭ اياعىنا ءتيىپ بارىپ قاقپاعا ەندى دە, بەسىنشى گول رەتىندە حاتتاماعا جازىلدى.
قاقپاسىنا بەس بىردەي گول جىبەرگەن قاقپاشىدا قانداي قادىر بولسىن. سالى سۋعا كەتكەن الەكساندر موكيننەن وتكەن مۇڭدى ادام جوق ەدى بۇل كۇنى. مۇمكىن, وسىدان ءتورت جىل بۇرىن, وسى «سەلتيك پاركتە» قاقپاسىنا ءۇش گول جىبەرگەنى دە ەسىنە ءتۇستى مە ەكەن, كىم ءبىلسىن؟ ول كەزدە موكين «شاحتەردىڭ» قاقپاسىن قورعاعان ەدى...
نەسىن ايتاسىز, «سەلتيكپەن» ويىندا ءبىزدىڭ فۋتبولشىلاردىڭ باسەكەگە قابىلەتتى ەمەستىگى كوزگە شۇقىعانداي كورىنىپ تۇردى. ستانيمير ستويلوۆ «قىرىق ءۇش كۇن كەمدىكتىڭ» قىرى مەن سىرىن تابۋعا تىرىسار-اق. بىراق, ءبارى دە كەش سياقتى. قارىمتا ماتچتا كەلتتىكتەردىڭ قاقپاسىنا بەس نەمەسە التى گول سوعۋ دەگەنىڭىز... ول ءبىر قيال-عاجايىپتىڭ اڭگىمەسى. ال ەندى, پسج-دان 0:4 بولىپ جەڭىلىپ, قارىمتا ويىندا 6:1 قىلىپ جەڭگەن «بارسەلونانىڭ» بىلتىرعى ەرلىگىن قايتالاسا, وندا «استاناعا» التىننان ەسكەرتكىش تۇرعىزۋ كەرەك شىعار...
قارىمتا ماتچ تامىزدىڭ 22-ءسى كۇنى «استانا ارەنادا» وتەدى. ەكى ويىن قورىتىندىسىندا جەڭىسكە جەتكەن كلۋب ۋەفا چەمپيوندار ليگاسىنىڭ توپتىق كەزەڭىنە جولداما السا, جەڭىلگەن ۇجىم ءوز باعىن ەۋروپا ليگاسىندا سىنايتىن بولادى.
16 تامىز. گلازگو. «سەلتيك پارك» ستاديونى. 54016 كورەرمەن.
تورەشى – وۆيديۋ الين حەتسەگان (رۋمىنيا).
«سەلتيك» – «استانا» – 5:0 (2:0)
ەۆگەني پوستنيكوۆ, 32 – ءوز قاقپاسىنا (1:0). سكوتت سينكلەر, 42 (2:0). سكوتت سينكلەر, 60 (3:0). دجەيمس فوررەست, 79 (4:0). يگور شيتوۆ, 88 – ءوز قاقپاسىنا (5:0).
«سەلتيك»: گوردون, تيرني, شيمۋنوۆيچ, بيتتون, لۋستيگ, نچام, براۋن, سينكلەر, روگيچ (ماكگرەگور, 63), فوررەست (ارمسترونگ, 82), گريففيتس.
«استانا»: موكين, شومكو, لوگۆينەنكو (بەيسەبەكوۆ, 66), پوستنيكوۆ, شيتوۆ, ماەۆسكي, كلياينحايسلەر, مۋجيكوۆ (گراحوۆاتس 82), توماسوۆ (مۇرتازاەۆ, 77), تۆۋماسي, كابانانگا.
قايرات ءابىلدا,
«ەگەمەن قازاقستان»
