سۋرەت: Tengrinews.kz
جامبى اتۋ ەرەجەسى بويىنشا اتپەن شاۋىپ كەلە جاتىپ جىگىتتەر ەكپىنىن باسەڭدەتپەستەن قۇرۋلى باقان ۇستىندەگى نىسانانى اتىپ قۇلاتۋعا ءتيىس. مەرگەندىك پەن توزىمدىلىكتى سىنايتىن قازاق حالقىنىڭ ۇلتتىق ويىنىن جاستار اراسىندا قايتا جاڭعىرتۋ كەرەك دەيدى ۇيىمداستىرۋشىلار.
− ۇلتتىق ساداق اتۋدان الەمگە اتى ايگىلى كاششاي لايوش سىندى مەرگەنى بار ماجارستاننان چەمەز فاركاس باپتاعان ۆەنگر سۇرمەرگەنى نامەتي كريستوف العاش رەت جامبى سايىسىندا باق سىناماق. وزدەرىن تۇركى جۇرتىنىڭ ءبىر بۇتاعى ساناپ, ەجەلگى قىپشاق ۇرپاعىمىز دەيتىن ماجارستان حالقى ات ۇستىنەن ساداق اتۋ ءداستۇرىن ۇزاق جىلدان بەرى ناسيحاتتاۋمەن كەلەدى. ۆەنگريادا ەۋروپا كولەمىندەگى ءداستۇرلى ساداق اتۋ جارىستارى ءجيى ۇيىمداستىرىلادى. قازىرگى كەزدە ءبۇتىن ەۋروپاعا ماديار ساداقشىلارىنىڭ مەرگەندىك داڭقى كەڭ جايىلعان. «التىن جەبە» تۋرنيرىنە كەلەتىن نامەتي كريستوف قۇرالايدى كوزگە اتقان مەرگەندەردىڭ ءبىرى, - دەدى قر ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان.
ۇيىمداستىرۋشىلاردىڭ ايتۋىنشا, الداعى ۋاقىتتا جامبى اتۋعا ەندى جاسوسپىرىمدەر مەن قىز بالالاردى دايىنداۋ ءداستۇرى العا قويىلماق. استانادا وتەتىن حالىقارالىق تۋرنيرگە تۇڭعىش رەت موڭعوليادان قىز بالا قاتىسقالى وتىر.
مەرگەندەرگە بەس ورىنعا دەيىن جۇلدە بەرىلەدى. باس جۇلدە 1,5 ملن تەڭگەنى قۇرايدى.
ايتا كەتەيىك, حالىقارالىق «ەكسپو-2017» كورمەسى اياسىندا ۇيىمداستىرىلىپ وتىرعان تۋرنير قر مادەنيەت جانە سپورت مينيسترلىگى, قر ۇلتتىق سپورت تۇرلەرى قاۋىمداستىعى جانە تۇركى حالىقتارىنىڭ ءداستۇرلى سپورت تۇرلەرى قاۋىمداستىعى جانە الەۋمەتتىك سەرىكتەس – «Samruk-Kazyna Trust» الەۋمەتتىك جوبالاردى دامىتۋ قورىنىڭ قولداۋىمەن وتەدى.
