«ەڭ باستىسى, ول جادىگەرگە رەكونسترۋكتسيا جاساۋ كەرەك. بەرەل قورعانىنان تابىلعان جادىگەردى ساقتالعان فراگمەنتتەرى ارقىلى تولىق قالپىنا كەلتىرسە عانا, ول «التىن ادام» با, جوق پا بەلگىلى بولادى», - دەيدى ورتالىقتىڭ باسشىسى.
بەرىك ابدىعالي ۇلىنىڭ ايتۋىنشا, بەرەلدەن تابىلعان جادىگەردى بۇعان دەيىن تابىلعان اۋقىمدى تاريحي مۇرالارمەن سالىستىرۋعا كەلمەيدى. قورعانداعى تاريحي جادىگەر تابىلعان ورنىندا تولىق زەرتتەلىپ بولعاننان كەيىن رەستاۆراتورلار باس كيىمنىڭ فراگمەنتتەرى ارقىلى ونىڭ ۇلگىسىن تولىق كەلتىرە الادى. سوندىقتان, بۇل جۇمىستاردى اياقتالدى دەۋگە ءالى ەرتە.
«قازبا جۇمىستارى ءالى اياقتالعان جوق. ءالى دە كۇردەلى جۇمىستار بار. ادەتتە, كيىم-كەشەگى التىنمەن اپتالعان ادامدى «التىن ادام» دەپ ايتادى. ءبىز التىن ادام دەپ تولىقتاي التىننان قۇيىلعان ادامدى ايتامىز با, الدە التىنمەن اپتالعان كيىممەن تابىلعان ادامدى اتايمىز با - انىقتاپ الۋىمىز كەرەك. بەلبەۋىنەن دە, باس كيىمىنەن دە قالعان التىن فراگمەنتتەر جاتىر. باستى ماسەلە - ونىڭ تونالعانىندا. كومىلگەننەن كەيىن كوپ ۋاقىت وتپەي تونالىپ, سۇيەكتى قازعان دا اياعىنان تارتىپ العان. سۋىرىپ الىپ, قولعا تۇسكەن التىندارىن الىپ كەتكەن. قالعان فراگمەنتتەرى سول جەردە جاتىر», - دەيدى بەرىك ابدىعالي ۇلى.
ورتالىق باسشىسى رەكونسترۋكتسيا جاسالعاننان كەيىن جادىگەر مۋزەيلەردىڭ بىرىندە ءوز ورنىن تاباتىنىنا سەنىمدى. تولىققاندى كيىمىن قالپىنا كەلتىرۋگە ءالى دە 1-2 جىلدىڭ جۇمىسى كەرەك. «تابىلعان باس كيىمنىڭ الماتى جاقتاعى ەسىك قورعانىنان تابىلعان التىن ادامنىڭ باس كيىمىنە ۇقسايتىنى ايتىلدى. نە دەسەك تە, زەرتتەۋ جۇمىستارى تولىق اياقتالعاننان كەيىن بەلگىلى بولادى», - دەپ ءتۇيدى بەرىك ابدىعالي ۇلى. ەسكە سالا كەتسەك, «ساكرالدى قازاقستان» عىلىمي-زەرتتەۋ ورتالىعىنىڭ باسشىسى بەرىك ابدىعالي بەرەل قورعانىنان التىن ادامنىڭ تابىلعانىن فەيسبۋك پاراقشاسىندا جاريا ەتكەن بولاتىن. ىزىنشە سول جاقتا قازبا جۇمىستارىن جۇرگىزىپ جاتقان ەكسپەديتسيالىق توپتىڭ باسشىسى زەينوللا ساماشەۆ تابىلعان جادىگەرگە بايلانىستى تۇسىنىك بەرگەن بولاتىن.
