وبلىس اكىمى ءباسپاسوز قىزمەتىنىڭ حابارلاۋىنشا, ءوڭىر باسشىسى گاز قۇيۋ بەكەتتەرىنىڭ باسشىلارىنان قانشا كولەمدە سۇيىتىلعان وتىندى الىپ وتىرعانىن, ول قالاي جۇمسالىپ جاتقاندىعىن سۇرادى.
رەيد بارىسىندا كەيبىر گاز قۇيۋ بەكەتتەرىننىڭ قاجەتتى قۇجاتتارى جوق ەكەنى انىقتالدى. سوندىقتان, ءوڭىر باسشىسى سالىق كوميتەتىنە بارلىق گاز قۇيۋ بەكەتتەرىنە ارنايى تەكسەرىس جاساۋىن تاپسىردى. رەيد بارىسىندا ەرالى توعجانوۆ كولىك جۇرگىزۋشىلەرىمەن تىلدەسىپ, ولاردىڭ جان-ايقايىن تىڭدادى. بۇل ماسەلە جاقىن ارادا شەشىلەتىنىن, سابىرلىق پەن ۋاقىت قاجەت ەكەنىن جەتكىزدى.
ماسەلەنى تۇبەگەيلى شەشۋ ءۇشىن بارلىق جەكە گاز قۇيۋ بەكەتتەرىنە تەكسەرىس جۇرگىزۋ قاجەت. سول سەبەپتى, ءوڭىر باسشىسى مەملەكەتتىك كىرىستەر دەپارتامەنتىنە گاز قۇيۋ بەكەتتەرىنىڭ وتكەن جىلعى جانە بيىلعى قۇجاتتارىن تولىق تەكسەرۋىن تاپسىردى.
ايتا كەتەيىك, كوگىلدىر وتىندى گاز قۇيۋ بەكەتتەرىنە جەتكىزەتىن كولىكتەر تولىقتاي GPS قوندىرعىسىمەن جابدىقتالعان. ال, ونى ماڭعىستاۋ وبلىستىق ىشكى ىستەر دەپارتامەنتى باقىلاۋدا ۇستاپ وتىر.
گاز ماسەلەسىن شەشۋ ءۇشىن ءوڭىر باسشىسى بۇگىن اقتاۋ قالاسىنا قوسىمشا 60 توننا گاز بەرىلەتىنىن مالىمدەدى. كوگىلدىر وتىن بارلىق گاز قۇيۋ بەكەتتەرىنە ءبولىنىپ, جەتكىزىلەدى.
سونىمەن قاتار, گاز قۇيۋ بەكەتتەرىنە تەكسەرىس بارىسىندا وبلىس باسشىسى اقتاۋ قالاسىنىڭ اكىمى سەرىكباي ترۇموۆقا - ەسكەرتۋ, قالا اكىمىنىڭ ورىنباسارى تىلەك قوشماعامبەتوۆكە - سوگىس بەردى. جانار-جاعارماي بەكەتتەرىن شولىپ شىققان وبلىس اكىمى بۇل ماسەلە ءبىر ىزگە تۇسكەنىن جەكە ءوزى قاداعالايتىنىن جانە جاقىن كۇندەرى شەشىلەتىنىن ايتتى.
