قازاقستان قۇراماسى 7 مەدالمەن جارىستى 25-ءشى ورىندا اياقتادى.
ءبىزدىڭ قورجىندا 1 التىن, 1 كۇمىس جانە 5 قولا مەدال بار. بۇل ءبىزدىڭ قۇرامانىڭ سۋردليمپيادا ويىندارى تاريحىندا جەتكەن ەڭ ۇزدىك كورسەتكىشى. ايان ءابدراش 58 كەلىگە دەيىن سالماقتا تاەكۆوندودان التىن مەدال جەڭىپ السا, دزيۋدوشى شاياحمەت قاناپيانوۆ 66 كەلىگە دەيىن سالماقتا كۇمىس مەدال يەلەندى. سۋردليمپيادا ويىندارىنىڭ قولا مەدالى 68 كەلىدە ونەر كورسەتەتىن تاەكۆوندوشى ۆالەنتينا انتونەنكوعا بۇيىردى, گرەك-ريم كۇرەسىنىڭ شەبەرى حايتارحان شونگۋ 130 كەلىگە دەيىنگى سالماقتا مىقتىلىعىن بايقاتىپ, قولا مەدالدى قانجىعاسىنا بايلادى, كاراتەدەن 61 كەلىگە دەيىن سالماقتا ونەر كورسەتەتىن ەلەنا سالميناعا دا قولا مەدال بۇيىردى. ەركىن كۇرەس شەبەرى اسىلجان تاجيەۆ 97 كەلىگە دەيىن ونەر كورسەتەتىن سپورتشىلار اراسىندا قولا مەدالدى ۇتىپ الدى. سونىمەن قاتار, ۇستەل تەننيسىنەن كوماندالىق جارىستا ءبىزدىڭ كوماندا ءۇشىنشى ورىندى يەلەندى. قازاقستان نامىسىن 2016 جىلعى الەم چەمپيوناتىنىڭ كۇمىس جۇلدەگەرلەرى دانيار ەسكەندىروۆ, قانات قونقىباەۆ جانە گايپ دانياروۆ قورعادى.
ەستەرىڭىزگە سالايىق, XXIII سۋردليمپيادا ويىندارى شىلدەنىڭ 18-30 ارالىعىندا تۇركيانىڭ سامسۋن قالاسىندا وتكەن بولاتىن.
تورتجىلدىقتىڭ باستى ويىنىنا ەستۋ قابىلەتى ناشار ءۇش مىڭعا جۋىق سپورتشى قاتىستى. قازاقستاننىڭ اتىنان 9 سپورت ءتۇرى بويىنشا 50-گە جۋىق سپورتشى باردى. ولار ەركىن جانە گرەك-ريم كۇرەسى, سامبو, جەڭىل اتلەتيكا, ءجۇزۋ, تاەكۆوندو, ۇستەل تەننيسى جانە سپورتتىق باعدارلاما بويىنشا سىنعا ءتۇستى.
