«استانا وپەرا» عيماراتىندا وسىعان وراي ءباسپاسوز كونفەرەنتسياسى ءوتتى. وعان مادەنيەت جانە سپورت ءمينيسترى ارىستانبەك مۇحامەدي ۇلى, «استانا وپەرا» تەاترىنىڭ ديرەكتورى عالىم احمەدياروۆ جانە پلاسيدو دومينگو قاتىستى.
القالى جيىندا العىسوزدى العان ارىستانبەك مۇحامەدي ۇلى بايقاۋدىڭ قازىلار القاسىمەن قىسقاشا تانىستىرىپ ءوتتى. ولاردىڭ قاتارىندا يتالياداعى «كارلو فەليچە» تەاترىنىڭ كوركەمدىك جەتەكشىسى دجۋزەپپە اكۋاۆيۆا, پاريج ۇلتتىق وپەراسىنىڭ ديرەكتورى يلياس تسەمپەتونيديس, ۆەنا مەملەكەتتىك وپەراسىنىڭ ديرەكتورى دومينيك مەيەر, نيۋ-يوركتەگى مەتروپوليتەن وپەراسىنىڭ كوركەمدىك جەتەكشىسى دجوناتان فرەند سەكىلدى كلاسسيكالىق ونەر الەمىنە تانىمال تۇلعالار بار.
– بايقاۋدىڭ تارتىسقا تولى وتەرىنە كۇمانىم جوق. سەبەبى, بۇعان الەمنىڭ 17 ەلىنەن 40 دارىندى ءانشى قاتىسادى. ولار حالىقارالىق جارىستىڭ اقتىق كەزەڭىنە جولداما الدى. ال ىرىكتەۋ كەزەڭىنەن سۇرىنبەي ءوتۋ وڭاي ەمەس. تاعى ءبىر ايتا كەتەرلىگى, «وپەراليا» وسىعان دەيىن ۆاشينگتون, مادريد, گامبۋرگ, توكيو سەكىلدى الەمنىڭ ءىرى قالالارىندا وتكەن. مۇنداي جاھاندىق شارانى ءوز ەلىمىزدە جوعارى دەڭگەيدە وتكىزۋ ۇلكەن جاۋاپكەرشىلىكتى تالاپ ەتەدى, – دەدى مينيستر.
وپەرا جانىڭدى تەربەتىپ, ءوزىڭدى بەينە ءبىر وزگە الەمگە الىپ كەتكەندەي كۇيدە قالدىرادى. ال وسى وپەرا الەمىندە وزىندىك قولتاڭباسىن قالىپتاستىرعان پلاسيدو دومينگو سەكىلدى ءانشىنىڭ ايگىلى «وپەراليا» كونكۋرسىن استانادا وتكىزۋى – قازاقتىڭ ونەرگە قانشالىقتى جاقىن حالىق ەكەنىنىڭ بىردەن ءبىر دالەلى.
جيىندا ءسوز العان پلاسيدو دومينگو «وپەراليانىڭ» استانا قالاسىندا ەكسپو كورمەسى كەزىندە وتۋىنە مۇمكىندىك جاسالعانى ءۇشىن العىسىن ءبىلدىردى.
– قازاقستان استاناسىنا العاش رەت وسىدان توعىز جىل بۇرىن كەلدىم. وسى ۋاقىت ارالىعىندا قالا ادام تانىماستاي وزگەرىپ كەتكەن دەپ ايتۋعا بولادى. ال قازاق حالقىنىڭ ونەردى جوعارى باعالايتىنىن ءوز باسىم بۇرىننان بىلەمىن. بۇل جولعى بايقاۋ دا جوعارى دارەجەدە وتەدى دەگەن ۇمىتتەمىن. ال فينالعا شىققان دارىندارمەن الداعى ۋاقىتتا تىعىز بايلانىستا بولىپ, انشىلىك قابىلەتتەرىنىڭ ارتۋىنا سەپتىگىمدى تيگىزسەم دەيمىن. نەگىزى وسى جارىستىڭ جەڭىمپازدارى عانا ەمەس قاتىسۋشىلارىنىڭ دا كەيىنىرەك ونەرى ورگە ءجۇزىپ, الەمگە تانىلا باستايدى. سولاردىڭ ءبىرى رەتىندە «وپەراليانىڭ» 1993 جىلعى, ياعني العاشقى جەڭىمپازى اتانعان شۆەتسيالىق نينا شتەمەندى ايتۋىما بولادى. بارىنە ساتتىلىك تىلەيمىن, – دەدى ماەسترو.
بايقاۋعا قازاقستان اتىنان «استان وپەرانىڭ» ءسوليسى, بىرنەشە حالىقارالىق بايقاۋلاردىڭ جەڭىمپازى ماريا مۋدرياك, سونداي-اق, راسۋل جارماعانبەتوۆ, دامير سادۋاقاسوۆ, ستانيسلاۆ لي ەل نامىسىن قورعايدى. ۇمىتكەرلەر الەمدىك وپەرا كلاسسيكاسىنان وزدەرى تاڭداپ العان اريالاردى «وپەراليا» كونتسەرتمەيستەرلەرىنىڭ سۇيەمەلدەۋىمەن ورىندايدى. بايگە شارتى بويىنشا 18 بەن 32 جاس ارالىعىنداعى انشىلەر ىرىكتەلىندى. ال جالپى جۇلدە قورى 180 مىڭ اقش دوللارىن قۇرايدى.
«وپەراليا» بايقاۋىنا رەسەي اتىنان قاتىسقالى وتىرعان ەلەنا گۋسەۆا جارىس الدىنداعى تولقىنىسى جايلى بىلايشا وي ءبولىستى.
– شىنىمدى ايتسام, وپەراعا ىنتىق بولۋىما ءدال وسى پلاسيدو دومينگو تىكەلەي سەبەپ بولدى. سول كىسىنىڭ كونكۋرسىنا قاتىسقالى وتىرعانىما ءالى سەنە الار ەمەسپىن. بۇل بايقاۋعا باس جۇلدەنى يەلەنۋدى ماقسات ەتىپ كەلگەنىم جوق. تەك ءوزىمنىڭ كۋميرىم بولعان ۇلى تۇلعانىڭ ماعان ارناعان ءبىراۋىز جىلى لەبىزىن ەستىسەم, سونىڭ ءوزى مەن ءۇشىن ۇلكەن جەتىستىك, – دەيدى ەلەنا اعىنان جارىلىپ.
ايتا كەتەيىك, 24-26 شىلدە ارالىعىندا شيرەك فينال مەن جارتىلاي فينال كەزەڭدەرى وتەدى. ال 29 شىلدەدە, ياعني اقتىق سىنعا جولداما العان ون ۇمىتكەر ءوزارا جەڭىمپازدى انىقتايتىن بولادى.
ايان ءابدۋالي,
«ەگەمەن قازاقستان»
سۋرەتتەردى تۇسىرگەن
ورىنباي بالمۇرات,
«ەگەمەن قازاقستان»
