– بۇل «SGS» كومپانياسىنىڭ قازاقستان اۋماعىنداعى ءبىرىنشى كومىر-حيميا زەرتحاناسى. اتالعان كومپانيا كومىردى ينسپەكتسيالاۋ مەن سەرتيفيكاتتاۋ بويىنشا الەمنىڭ كوپتەگەن ەلدەرىندە قىزمەت جاساپ كەلەدى. جاڭا زەرتحانا «شۇباركول پرەميۋمنىڭ» كليەنتتەر بازاسىن ارتتىرىپ, ەكسپورتتىق نارىققا شىعۋىنا سەپتىگىن تيگىزەدى. ءبىزدىڭ سەرتيفيكاتتارىمىزدى الەمدىك ترەيدەرلەردىڭ ءبارى دە مويىندايدى جانە ءبىز ماقۇلداعان ونىمدەردىڭ سانى مەن ساپاسىنا سەنىمدى بولا الادى, – دەدى اشىلۋ سالتاناتىندا كومپانيانىڭ مينەرالدى شيكىزات دەپارتامەنتىنىڭ ديرەكتورى الەكسەي زوتوۆ.
شىنىندا دا, بۇرىن كومىر سىنامالارىن رەسەيدىڭ نوۆوكۋزنەتسك قالاسىنا اپارۋعا تۋرا كەلەتىن ەدى. تالداۋلار ەندى ءوزىمىزدىڭ كەن ورنىندا جاسالاتىن بولدى. زەرتحانا بازاسىندا كومىر ءوندىرۋشى كاسىپورىندارعا حالىقارالىق ۇلگىدەگى ساپا سەرتيفيكاتتارى بەرىلەدى.
– «SGS» كومپانياسىمەن ءبىز ءبىرتالاي ۋاقىتتان بەرى ارىپتەستىك بايلانىستامىز, – دەيدى «شۇباركول پرەميۋم» كومىر رازرەزى باس ديرەكتورىنىڭ ءبىرىنشى ورىنباسارى الەكساندر لونتكوۆسكي. – بۇگىنگى اشىلىپ وتىرعان زەرتحانا – ءبىز ءۇشىن ايتارلىقتاي جەتىستىك. «SGS» كومپانياسىنىڭ كومىر ونىمدەرىنىڭ ساپاسىن باسقارۋ تاجىريبەسىن پايدالانىپ, ءبىزدىڭ كومىرىمىز تەك قازاقستاننىڭ عانا ەمەس, سونداي-اق, رەسەيدىڭ دە نارىعىن جاۋلايدى دەگەن ءۇمىتىمىز زور.
جاڭادان اشىلعان كومىر-حيميا زەرتحاناسى قازىرگى ۋاقىتتا كۇكىرت قۇرامىن ەشكا ادىسىمەن انىقتاۋ, كۇل قۇرامىن انىقتاۋ, ۇشپا زاتتاردىڭ شىعۋىن انىقتاۋ, جالپى ىلعال قۇرامىن انىقتاۋ, وتىن جانۋىنىڭ جوعارى جانە تومەنگى جىلۋىن انىقتاۋ جانە ەلەكتىك تالداۋ جۇمىستارىن جۇرگىزۋدە. قىزمەت تۇرلەرى كەلەشەكتە كوبەيە تۇسپەك. زەرتحانا تالداۋىنا ءوز كومىرلەرىن تىلەك بىلدىرگەن كاسىپورىنداردىڭ ءبارى دە وتكىزە الادى.
ايتا كەتۋ كەرەك, «SGS» كومپانياسى ينسپەكتسيالىق قىزمەت, ساراپتاۋ, سىناۋ جانە سەرتيفيكاتتاۋ سالاسى بويىنشا الەمدىك كوشباسشىلار قاتارىنان سانالادى. ونىڭ دۇنيە جۇزىندە 2 مىڭنان استام كەڭسەلەرى مەن زەرتحانالارى جۇمىس ىستەيدى. ال 2016 جىلدىڭ اقپان ايىندا قۇرىلعان «شۇباركول پرەميۋم» جشس جىلىنا جوعارى ساپالى 7,5 ملن توننا كومىر شىعارادى. قاراعاندىلىق كاسىپورىن مەن الەمدىك كومپانيانىڭ ارىپتەستىك بايلانىسى كومىر ونەركاسىبىن جاڭا بەلەسكە كوتەرەدى دەپ سەنەمىز.
ميراس اسان,
«ەگەمەن قازاقستان»
قاراعاندى وبلىسى,
نۇرا اۋدانى
