فەستيۆال اشىلماس بۇرىن قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەدي ۇلى, «ۇلتتىق كينەماتوگرافيا ونەرى مەن عىلىمدارى اكادەمياسى» قوعامدىق بىرلەستىگىنىڭ پرەزيدەنتى ايمان مۇساقوجاەۆا, استانا قالاسىنىڭ اكىمى اسەت يسەكەشەۆ پەن «وسكار» جانە «التىن گلوۋبس» يەگەرى نيكولاس كەيدج تال وتىرعىزىپ, يگى ءداستۇردى جالعاستىردى.
«وسىنداي تاماشا فەستيۆالدى ۇيىمداستىرۋشى ۇجىمعا, مينيسترلىككە العىس ايتامىن. ەگەر كينو ونەر سالاسىنا ارالاسۋدى ويلاعان بولساڭىز ۇزاق ويلانىپ قاجەتى جوق, تەك العا! كينو وندىرىسىنە اۋەلى ءتوزىم قاجەت. سودان سوڭ كينو جاساقپەن بايلانىس ورناتۋ ماڭىزدى. كەز كەلگەن تابىستى ءفيلمنىڭ كىلتى – كوماندالىق بىرلىكتە. ەگەر مەنىڭ ويىمدى بىلگىلەرىڭىز كەلسە, كينوعا ايناداعى ءوز بەينەڭىزدى كورگەندەي قاراڭىز. وسى جولمەن جۇرەمىن دەگەن ناقتى شەشىم قابىلداۋ تالانتتان دا ماڭىزدى», دەگەن نيكولاس كەيدج قازاقستاندىق بالالاردىڭ بولاشاعىنا ساتتىلىك تىلەدى.
فەستيۆالدىڭ اشىلۋ سالتاناتىندا الەمدىك جانە وتاندىق كينويندۋستريانىڭ جۇلدىزدارىمەن بىرگە ونەر مەن سپورت سالاسىندا ۇلگەرىمى ۇزدىك بالالار دا بولدى.
XIII حالىقارالىق «ەۋرازيا» كينوفەستيۆالى قازاقستان رەسپۋبليكاسىنىڭ مادەنيەت جانە سپورت مينيسترلىگىنىڭ تاپسىرىسىمەن «ۇلتتىق كينەماتوگرافيا ونەرى مەن عىلىمدارىنىڭ اكادەمياسى» قوعامدىق بىرلەستىگىمەن ىسكە اسىرىلادى. ەكسپو-2017 كورمەسىنە ورايلاستىرىلىپ ءوتىپ جاتقان حالىقارالىق كينوفەستيۆالدىڭ «مادەنيەتتەر كوپىرى» تاقىرىبى وتاندىق كينو بيزنەستىڭ دامۋىنا, سونداي-اق, كينوفەستيۆال دەمەۋشىلەرىنىڭ ونىمدەرىن جارنامالاۋعا جول اشا تۇسەتىنى ءسوزسىز.
ايا ءومىرتاي,
"ەگەمەن قازاقستان"
