ارگەنتينانىڭ ۇلتتىق كۇنىنە وسى ەلدىڭ ەكى مينيسترى كەلدى. بىرەۋى - عىلىم, تەحنولوگيالار جانە يننوۆاتسيالار ءمينيسترى نينو باراناو, ەكىنشىسى - بۇقارالىق اقپارات قۇرالدارى جانە قوعامدىق پىكىر ءمينيسترى ەرنان لومباردي. ولاردى قر اقپارات جانە كوممۋنيكاتسيالار ءمينيسترى داۋرەن اباەۆ قارسى الدى.
«قازاقستان ارگەنتينالىقتاردى تاماشا تابيعاتى, باي مادەنيەتى جانە قايتالانباس ۇلتتىق مىنەزى بار حالىق رەتىندە جاقسى بىلەدى. ول جەردەن الەمگە تانىمال تالاي ويشىلدار شىققان. بۋەنوس-ايرەس - اسەرلى تانگونىڭ استاناسى بولىپ سانالادى. ال مارادونا مەن مەسسي سياقتى فۋتبولدىڭ مايتالماندارىن قازاقستاننىڭ جانكۇيەرلەرى دە جاقسى كورەدى. بۇگىن ءبىز وسى ەلدىڭ مادەنيەتى مەن تاريحىمەن جاقىن تانىسا الامىز», دەدى داۋرەن اباەۆ.
ال ارگەنتينانىڭ ەكى ءمينيسترى قازاقتىڭ قوناقجاي حالىق ەكەنىن ەرەكشە اتاپ ءوتىپ, ەكسپو-نىڭ كاسىبي تۇرعىدا ۇلكەن دايىندىقپەن ءوتىپ جاتقانىن جەتكىزدى. ەرنان لومباردي قازاقستان مەن ارگەنتينانىڭ نەگىزگى ۇقساستىعىنا توقتالدى.
«بىزدە سان الۋان ۇلتتار مەن ۇلىستاردىڭ وكىلدەرى تۇرادى. ولاردىڭ ءتىلى دە, ءدىنى دە ءارالۋان. دەگەنمەن, بارلىعى دا تاتۋلىق مەن بەيبىتشىلىكتە ءومىر سۇرەدى. وسىلايشا, ارگەنتينا دا قازاقستان سياقتى مۋلتيمادەنيەتتى قوعامنىڭ بولعانى قالايدى. ءبىز ءۇشىن تابيعي رەسۋرستاردان بۇرىن وسى ادامدار رەسۋرستارى قىمبات بولىپ تۇر. ونسىز ەشقانداي مەملەكەت دامۋدىڭ داڭعىل جولىنا تۇسە المايدى», دەپ اتاپ ءوتتى.
ءوز سوزىندە ول مەركوسۋر ۇيىمى مەن ەۋرازيالىق ەكونوميكالىق وداق اراسىنداعى ارىپتەستىك بايلانىستاردى دا تىلگە تيەك ەتتى. سول ارقىلى ىنتىماقتاستىق بايلانىستار ءۇشىن جاڭا مۇمكىندىكتەر اشىلىپ وتىر.
رەسمي بولىمنەن كەيىن ارگەنتينالىقتار شاعىن كونتسەرتتىك باعدارلامانى ۇسىندى. سودان سوڭ, وسى ەلدىڭ ۇلتتىق پاۆيلونىنا دەيىن مەرەكەلىك شەرۋ ۇيىمداستىرىلدى.
ايتا كەتەيىك, كۇنى كەشە قر اقپارات جانە كوممۋنيكاتسيالار ءمينيسترى داۋرەن اباەۆ پەن ارگەنتينانىڭ بۇقارالىق اقپارات قۇرالدارى جانە قوعامدىق پىكىر ءمينيسترى ەرنان لومباردي ءوزارا ىنتىماقتاستىق تۋرالى مەموراندۋمدى راسىمدەدى. اتالعان قۇجات اياسىندا جۋرناليست مامانداردى بىرلەسىپ دايارلاۋ قاراستىرىلعان.
