بقو جاستار ساياساتى ماسەلەلەرى باسقارماسىنىڭ باسشىسى ايان ساكوشەۆتىڭ ايتۋىنشا, شارانىڭ ماقساتى - جاستاردىڭ جۇمىسقا ورنالاستىرۋ مۇمكىندىكتەرىن كەڭەيتۋ, جۇمىسسىز جاستاردى جۇمىسقا ورنالاستىرۋ, جاستاردى مەملەكەتتىك باعدارلامالار, حالىقارالىق جانە مەملەكەتتىك ءبىلىم بەرۋ باعدارلامالارى تۋرالى اقپاراتتاندىرۋ.
جارمەڭكەگە وبلىستاعى "ستەكلو-سەرۆيس" جشس, "گيدروپريبور" عزي», "باتىس قازاقستان ەلەكتر جەلىلەرىن تاراتۋ كومپانياسى" اق سياقتى ءىرى ءوندىرىس وشاقتارى مەن كاسىپورىندار, ورال قالاسى مەن اۋداندارداعى مەملەكەتتىك مەكەمەلەردەن بارلىعى 100-گە جۋىق جۇمىس بەرۋشى قاتىسىپ, 1800-دەن استام بوس جۇمىس ورىندارىن ۇسىندى. جارمەڭكە بارىسىندا بارلىعى 700-دەن استام جاس ءوز تۇيىندەمەلەرىن تاپسىردى.
سونىمەن قاتار, جارمەڭكە بارىسىندا جاستارعا ەلباسىنىڭ "100 ناقتى قادام" ۇلت جوسپارىنىڭ ءبىرىنشى باعىتى - كاسىبي مەملەكەتتىك اپپارات قۇرۋ رەفورماسىن جۇزەگە اسىرۋ ماقساتىندا مەملەكەتتىك قىزمەتكە قالاي ورنالاسۋعا بولاتىندىعى, كونكۋرسقا ءتۇسۋ ءتارتىبى, تەستىلەۋدەن ءوتۋ جانە باسقا ماسەلەلەر جونىندە اقپارات بەرىلدى.
قر پرەزيدەنتى جانىنداعى مەملەكەتتىك باسقارۋ اكادەمياسىنا قابىلداۋ بويىنشا سەمينار وتكىزىلىپ, نازارباەۆ ۋنيۆەرسيتەتىنىڭ وكىلى وسى وقۋ ورنىنا ءتۇسۋ مۇمكىندىكتەرى بويىنشا مالىمەت بەردى.
سونداي-اق, جاس ماماندارعا تۇيىندەمە تولتىرۋ, اڭگىمەلەسۋدەن ءوتۋ جانە وزگە ماسەلەلەر بويىنشا كەڭەس بەرىلىپ, "اتامەكەن" ۇلتتىق كاسىپكەرلەر پالاتاسى بقو فيليالى وكىلدەرىنىڭ جاستارعا ءوز كاسىبىن اشۋ بويىنشا وتكىزگەن ترەنينگتەرىنە 100-گە جۋىق جاس قاتىستى.
«اتالمىش بوس جۇمىس ورىندارى جارمەڭكەسى جاستاردى بوس جۇرگىزبەي, جۇمىسقا ورنالاستىرۋ, سونداي-اق ءوز كاسىبىن اشقىسى كەلەتىن نەمەسە مەملەكەتتىك قىزمەتكە كىرگىسى كەلەتىندەرگە, جوعارى وقۋ ورىندارى مەن تەحنيكالىق ءبىلىم بەرۋ ۇيىمدارىن بيىل اياقتاعان تۇلەكتەرگە باعىت بەرۋ ماقساتىندا ۇيىمداستىرىلدى. 2016-2017 وقۋ جىلىندا وبلىس بويىنشا جوعارى وقۋ ورىندارىن 7478 تۇلەك اياقتاپ وتىر. سونىڭ 4 مىڭعا جۋىعى - كۇندىزگى ءبولىم ستۋدەنتتەرى. الداعى ۋاقىتتا وسى تۇلەكتەرىمىزدىڭ, باسقا دا جۇمىسسىز جۇرگەن جاستارىمىزدىڭ جۇمىسقا ورنالاسۋى بويىنشا مونيتورينگ جۇرگىزىلىپ, ولاردى جۇمىسپەن قامتۋ شارالارى كۇشەيتىلەتىن بولادى», دەدى ا.ساكوشەۆ.
ايتا كەتەيىك, وڭىردە ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى اياسىندا دا جاستاردى جۇمىسپەن قامتۋ شارالارى قولعا الىنۋدا. مىسالى, بيىل 515 جاس ماماندى جاستار تاجىريبەسىنە جولداۋ كوزدەلسە, العاشقى التى ايدىڭ ىشىندە سونىڭ 263-ءى جىبەرىلدى.
