21 شىلدەدە باستالعان تۇركيادا ەگە تەڭىزىنىڭ جاعالاۋىنداعى ايماقتاردا جەر سىلكىنىسى مەزگىل-مەزگىل قايتالانىپ وتىر. بودرۋم پروۆينتسياسى اكىمدىگى مەن توتەنشە جاعدايلار باسقارماسىنىڭ مالىمەتتەرىنە سايكەس, 21 شىلدەدە جەرگىلىكتى ۋاقىت بويىنشا شامامەن ساعات 20:09-دا 5 باللدىق ماگنيتۋدادا جەر سىلكىنىسى ءبىر رەت قانا ورىن الدى, سونداي-اق مەزگىل-مەزگىل قايتالانىپ وتىرعان سىلكىنىستەردىڭ 4 باللدىق ماگنيتۋدادان اسپاۋدا. ىستانبۇل تەحنيكالىق ۋنيۆەرسيتەتىنىڭ گەوفيزيكا ءبولىمىنىڭ ماماندارىنىڭ حابارلاۋىنشا ەندىگى كەزەكتە العاشقى جەر سىلكىنىسىنەن كەيىن تاعى ءبىر جوعارى سىلكىنىس بولۋ ىقيمالى وتە از. ءوز كەزەگىندە, 5 بالدان تومەن قوسالقى سىلكىنىستەر 3 اپتاعا سوزىلۋى مۇمكىن.
تر كانديللي جەر سىلكىنىسى وبسەرۆاتورياسىنىڭ ديرەكتورى حالۋك وزەنەردىڭ ايتۋىنشا تۇركيا اۋماعىنىڭ 80-85 پايىزىندا جەر سىلكىنىسى بولۋ قاۋپى بار. ءار 25-30 جىلدا جاڭا ءبىر جەر سىلكىنىسى, ءار 1,5-2 جىلدا كۇشتىلىگى 6 باللدان اساتىن جەر سىلكىنىسى بولىپ وتىرۋى مۇمكىن. قازىرگى تاڭدا تۇرىك ۇكىمەتى اتالعان جاعدايعا بايلانىستى داعدارىس ورتالىعىن قۇرعان. وسى رەتتە, بودرۋم ايماعىنداعى عيماراتتاردىڭ العاشقى جەر دۇمپۋىندە كىشىگىرىم زارداپتاردىڭ ورىن الۋى, وسى ايماقتاعى عيماراتتاردىڭ الاسا بولۋى جانە ساپالى بولۋىنىڭ ارقاسىندا بولىپ وتىر. جەرگىلىكتى رەسمي مالىمەتتەرگە سايكەس, ءزىلزالالار سالدارىنان قازا تاپقاندار تىركەلمەدى, جاراقات العانداردىڭ ىشىندە قر ازاماتتارى جوق.
بودرۋمداعى تۋريستتىك نىساندار جانە جەرگىلىكتى اۋەجاي, حالىقارالىق باعىتتاعى اۋەكومپانيالارىنىڭ ۇشۋلارى تۇراقتى تۇردە جالعاستىرىپ جاتىر.
قر ىستانبۇلداعى باس كونسۋلدىعى جەرگىلىكتى بيلىكپەن, قازاقستاندىق تۋريستىك وپەراتورلارمەن (اسىرەسە, بودرۋم باعىتىندا جۇمىس ىستەيتىن قازاقستاندىق «كومپاس» تۋريستىك كومپانياسىمەن) جانە الماتى - ىستانبۇل (سابيحا گوكچەن حالىقارالىق اۋەجايى) - بودرۋم باعىتى بويىنشا تۇراقتى ۇشاتىن پەگاسۋس اۋەجولدارى كومپانياسىنىڭ وكىلدەرىمەن تىعىز بايلانىس ورناتىلدى. پەگاسۋس اۋە جولدارىنىڭ مالىمەتتەرىنە سايكەس, اۋە كومپانيانىڭ تۇراقتى الماتى-ىستانبۇل-بودرۋم باعىتتارى بويىنشا ۇشۋلارى كەستەگە سايكەس جالعاستىرىلۋدا.
تەلەفون سوققان قر ازاماتتارىمەن جانە بودرۋمدا ورنالاسقان قوناق ۇيلەرمەن جەكە-جەكە بايلانىس قۇرىپ ازاماتتارىمىز جايىندا اقپارات جيناقتاۋ جۇمىستارى جالعاسۋدا.
قازىرگى تاڭدا اتالعان ايماقتارداعى 20-عا جۋىق قر ازاماتتارىمەن بايلانىس ورناتىلدى. قولدا بار اقپاراتقا سايكەس تۋريستىك اگەنتتىكتەر ارقىلى بودرۋم پروۆينتسياسىندا 51 قر ازاماتتارى دەمالۋدا. قر ازاماتتارىنىڭ قالاۋى بويىنشا تۇركيانىڭ باسقا ايماقتارىندا دەمالىستارىن جالعاستىرۋ ءۇشىن تۋريستىك اگەنتتىكتەرمەن حابارلاسىپ, قر ازاماتتارىمەن تىكەلەي بايلانىس ورناتىلدى.
بودرۋم باعىتىندا جۇمىس ىستەيتىن قازاقستاندىق «كومپاس» تۇريستىك اگەنتتىگىنىڭ اقپاراتىنا سايكەس, پەگاسۋس اۋەكومپانياسىمەن الداعى اپتادا شامامەن 60 قر ازاماتتارىنىڭ بودرۋم قالاسىنا ۇشۋلارى كۇتىلۋدە. تۇرىك اۋە جولدارى ءۇ.ج. 22 شىلدەدە جەرگىلىكتى ۋاقىت بويىنشا ساعات 19.00-دا 157 ادامدىق تك 4910 رەيسپەن قوسىمشا تاسىمالداۋ جاسايتىنى جانە كۇندەلىكتى رەيستەرگە جولاۋشى سانىن ارتتىراتىنى تۋرالى حابارلايدى.
جالپى العاندا, ەلشىلىك, ىستانبۇلداعى جانە انتالياداعى كونسۋلدىق احۋالدى باقىلاۋدا ۇستاۋدا. وتانداستارىمىزدىڭ اقپارات جانە كومەك الۋ بويىنشا تىكەلەي جانە جەدەل بايلانىس قۇرىلعان. ولار:
- قازاقستان رەسپۋبليكاسىنىڭ تۇركياداعى ەلشىلىگى (انكارا قالاسى): +90 312 491 91 00- ىشكى ءنومىرى: 9
- قر ىستانبۇلداعى باس كونسۋلدىعى: +90 212 662 53 47/48- ىشكى ءنومىرى: 111
- قر انتالياداعى كونسۋلدىعى: +90 242 324 26 11
