سەمينار-كەڭەس بارىسىندا قاتىسۋشىلارعا قانت قىزىلشاسى, جەمىس-جيدەك جانە باسقا دا باقشا داقىلدارىن ءوسىرۋدىڭ تىڭ تاسىلدەرى تانىستىرىلىپ, اتقارىلىپ جاتقان جۇمىستار ناسيحاتتالدى. سەمينارعا وبلىس اكىمى كارىم كوكىرەكباەۆ, اۋدان اكىمدەرى, اۋداندىق اۋىل شارۋاشىلىعى ءبولىمىنىڭ باسشىلارى, وبلىستاعى شارۋاشىلىق جەتەكشىلەرى جانە رەسپۋبليكاداعى عىلىمي-زەرتتەۋ ينستيتۋتتارىنىڭ عالىمدارى قاتىسىپ, سالادا اتقارىلىپ جاتقان جۇمىستارمەن تانىستى.
جالپى, بيىلعى جىلى وبلىستا پايدالانىلماي جاتقان القاپتاردى اينالىمعا ەنگىزۋ ارقىلى ەگىستىك كولەمى 623,0 مىڭ گەكتارعا جەتىپ وتىر. ناتيجەسىندە سوڭعى ءۇش جىلدا پايدالانۋسىز جاتقان جەر كولەمى 26,9 مىڭ گەكتارعا قىسقارعان. سونىمەن قاتار, بيىلعى جىلى جازدىق ارپانىڭ ەگىس كولەمى وتكەن جىلمەن سالىستىرعاندا 7,0 مىڭ گەكتارعا ازايىپ, ناتيجەسىندە باسىم داقىلدار بولىپ سانالاتىن قانت قىزىلشاسى, مايلى داقىلدار, داندىك جۇگەرى, كوكونىس, باقشا القاپتارىنىڭ كولەمى ارتقان.
سونداي-اق, وبلىستا 2015 جىلى العاش رەت وتىرعىزىلعان ۇدەمەلى الما باقتاردىڭ اۋماعى وتكەن جىلى 112 گەكتارعا ۇلعايىپ, 235 گەكتارعا جەتسە, بيىلعى جىلى قوسىمشا 90 گەكتار الما باعى وتىرعىزىلىپ, جالپى كولەمى 325 گەكتاردى قۇرادى. سەمينار بارىسىندا الما ءوسىرۋدىڭ تەحنولوگيالىق كارتاسى جانە الما ساقتايتىن 300 توننالىق مۇزداتقىش قويما تانىستىرىلدى.
وڭىردە بيىلعى جىلى قانت قىزىلشاسى 9,0 مىڭ گەكتارعا ەگىلىپ, وعان قاجەتتى تۇقىم ساتىپ الۋعا وبلىستىق بيۋدجەتتەن 220 ميلليون تەڭگە بولىنگەن بولاتىن. ەندى ءونىمدى جيناۋ ناۋقانى كەزىندە قانت زاۋىتتارىنا 155 مىڭ توننا ءتاتتى ءتۇبىر وتكىزۋ جوسپارلانۋدا. سونداي-اق, وتكەن جىلى سۋ ۇنەمدەۋ تەحنولوگياسى 11 973 گەكتارعا ەنگىزىلسە, اعىمداعى جىلى ونىڭ كولەمى 15 015 گەكتارعا جەتتى.
جالپى ەگىنشىلىكتە وزىق تەحنولوگيالاردى قانت قىزىلشاسىنا ەنگىزۋ قولعا الىنۋدا. بۇل باعىتتاعى جۇمىستار دا سەمينار كەزىندە كوپشىلىككە كورسەتىلدى. مىسالى, بيىلعى جىلى 1 555 گەكتار قانت قىزىلشاسىنا تامشىلاتىپ سۋارۋ تەحنولوگياسى ەنگىزىلسە, 1 325 گەكتارعا جاڭبىرلاتىپ سۋارۋ تەحنولوگياسى ەنگىزىلدى.
سەمينار بارىسىندا تۇقىم شارۋاشىلىعى جايى دا ءسوز بولدى. بۇگىنگى تاڭدا ايماقتا 6 ەليتالىق تۇقىم شارۋاشىلىعى جۇمىس ىستەيدى. سونداي-اق, سوڭعى جىلدارى مەملەكەتتىك قولداۋلار ناتيجەسىندە وڭىردە مال شارۋاشىلىعى قارقىندى دامىپ كەلەتىنىن ايتا كەتۋ كەرەك. ەندى ولاردىڭ ونىمدىلىگىن ارتتىرۋ ءۇشىن ساپالى مال ازىعى بازاسىن جاساۋ كەرەك. «مەركى ەت كومبيناتى» جاۋاپكەرشىلىگى شەكتەۋلى سەرىكتەستىگىندەگى سەمينار وسى ماسەلەگە ارنالدى.
جالپى جىل باسىنان بەرى وبلىستاعى ءمۇيىزدى ءىرى قارا سانى 4,4 پايىزعا ارتسا, قوي سانى 2,1 پايىزعا, جىلقى باسى 5,2 پايىزعا, ەت ءوندىرىسى 6,8 جانە ءسۇت ءوندىرۋ 2,8 پايىزعا ارتقان. ايتا كەتۋ كەرەك, بيىلعى جىلى ءمۇيىزدى ءىرى قارانىڭ انالىق باسى 9,9 پايىزعا ارتىپ وتىر.
قازىرگى كەزدە جامبىل وبلىسىندا 20 مىڭ باس ءىرى قارانى بورداقىلاۋعا ارنالعان 26 بورداقىلاۋ الاڭى جۇمىس جاساپ كەلەدى. وتكەن جىلى بۇل الاڭدار 451,3 توننا سيىر ەتىن ەكسپورتقا شىعارسا, اعىمداعى جىلى سيىر ەتىن ەكسپورتتاۋ كولەمىن 500 تونناعا جەتكىزۋ مىندەتى بەلگىلەنگەن. بۇگىنگى كۇندە تازا جانە قايتا وڭدەلگەن تۇردە 16,5 توننا سيىر ەتى جانە 45,2 توننا قوي ەتى ەكسپورتتالدى.
سەمينار بارىسىندا مال شارۋاشىلىعىندا ەت ەكسپورتىنىڭ كولەمىن ارتتىرۋ جايى دا تالقىلاندى. وبلىستا اتالعان ماسەلەنى كەشەندى تۇردە جوسپارلاپ, جۇزەگە اسىرىپ جاتقان «مەركى ەت كومبيناتى» جاۋاپكەرشىلىگى شەكتەۋلى سەرىكتەسىگى بولسا, ودان بولەك, وبلىستا 2 ءىرى ەت كومبيناتى ءوز جۇمىستارىن باستادى. ونىڭ ءبىرى جىلىنا 1 757 توننا ەت وندىرەتىن جامبىل اۋدانىنداعى «وڭتۇستىك حالال تاعامدارى» سەرىكتەستىگى بولسا, ەكىنشىسى جىلىنا 732 توننا ەت وندىرەتىن قورداي اۋدانىنداعى «پەرۆومايسكيە دەليكاتەسى» سەرىكتەستىگى.
جالپى, سەمينار-كەڭەس بارىسىندا اۋىل شارۋاشىلىعى سالاسىنا يننوۆاتسيالىق تەحنولوگيالاردى كەڭىنەن ەنگىزۋ قاجەتتىگى دە ءسوز بولدى. بۇل ماسەلە توڭىرەگىندە دە ءتيىستى باسشىلارعا تاپسىرمالار بەرىلدى.
حاميت ەسامان,
«ەگەمەن قازاقستان»
